ސާފް ޗެމްޕިއަންޝިޕުގައި ކުޅެން ބޭނުންވިކަމަށް ގައުމީ ފުޓްބޯޅަ ޓީމްގެ ކުރީގެ ކެޕްޓަން އަލީ އަޝްފާގު ބުނެފިއެވެ.
ސާފް ޗެމްޕިއަންޝިޕަށް ކޯޗު ޕީޓަރ ސެގާޓް އެކުލަވާލި 30 ކުޅުންތެރިންގެ ސްކޮޑުން އަޝްފާގަށް ފުރުސަތު ނުދިން ބައެއް ސަބަބުތަކުގެ ގޮތުގައި ކޯޗު ބުނީ އޭނާގެ އުމުރާއި، މުސްތަގްބަލަށް އައު ޓީމެއް ބިނާކުރަން ބޭނުންވުންކަމަށެވެ. އަދި މީގެ އިތުރުން ގައުމީ ޓިމަށް ކުޅޭނެކަން ނުވަތަ ނޫންކަން ޔަގީން ނުވާ ކުޅުންތެރިއެއް އޭނާ ބޭނުންނުވާކަމަށް ކޯޗުވަނީ ބުނެފައެވެ.
އަޝްފާގު މިއަދު ސޯޝަލް މީޑިޔާގައި ބުނެފައިވަނީ ސާފް ޗެމްޕިއަންޝިޕްގައި ކުޅެން ވަރަށް ބޭނުންވިކަމަށާއި، އެކަމަށް މަސައްކަތްވެސް ކުރިކަމަށެވެ. އެހެންނަމަވެސް ގައުމީ ޓީމަށްވެސް ނުވަތަ މުބާރާތުގައިވެސް ކުޅެވޭނީ ކޯޗު ފުރުސަތުދީގެންކަމަށާއި، ކޯޗު އޭނާއަށް ފުރުސަތު ނުދޭން ނިންމި ނިންމުމަށް އިޚުތިރާމް ކުރާނެކަމަށްވެސް އަޝްފާގު ބުންޏެވެ. އަދި ޕްރޮފެޝަނަލް ކުޅުންތެރިއަކަށްވެ ހުރި ކޯޗުގެ ނިންމުމަށް އިޚުތިރާމްކުރަން ޖެހޭނެކަމަށްވެސް އޭނާ ބުންޏެވެ.
އެފްއޭއެމްގެ އިސްއޮފިޝަލުންނާއިއެކު ކޯޗު އަޝްފާގާއި ބައްދަލުކޮށްފައިވާކަމަށް ރޭ އެފްއޭއެމުންވަނީ ބުނެފައެވެ. އެފްއޭއެމްގެ ޖެނެރަލް ސެކްރެޓަރީ ހުސައިން ޖަވާޒު ބުނީ އެހެންނަމަވެސް އެ ބައްދަލުވުމުގައި އަޝްފާގު ގައުމީ ޓީމަށް ކުޅެން ބޭނުންވާކަމަށް ބުނެފައިނުވާކަމަށެވެ.