ވެރިކަމުގެ ނިޒާމުގައި ހަމަހަމަކަން ގެންގުޅުއްވި ރައީސަކީ ރައީސް ޔާމީންކަމަށާއި އެއީ އެމަނިކުފާނުގެ ޓްރޭޑްމާކެއްކަމަށް މިނިސްޓަރ އޮފް ހައުސިންގ އެންޑް އިންފްރާސްރަކްޗަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރާއްޖޭގެ ރައްޔިތުންގެ މެދުގައި ތަފާތުކުރުމެއްނެތި ހަމަހަމަކަމާއެކު ވެރިކަންކޮށްދޭނެ ކަމަށް އެމްޑީޕީގެ ކެންޑިޑޭޓް އިބްރާހީމް މުޙައްމަދު ސޯލިހު ވިދާޅުވުމުން، އެކަމަށް ރައްދުދެއްވާ މިނިސްޓަރ މުޢިއްޒު ކުރެއްވި ޓުވީޓެއްގައި ވިދާޅުވީ، ރައީސް ޔާމީންއަށްވުރެ ބޮޑަށް ދިވެހި ރައްޔިތުންނަށް ހަމަހަމަކަމާއެކު ތަފާތުކުރުމެއްނެތި ތަރައްޤީ ގެނުވައިދިން ރައީސަކު ރާއްޖެއަށް ނާންނަކަމަށެވެ. އަދި ވެރިކަމުގެ ނިޒާމުގައި ހަމަހަމަކަމަކީ ރައީސް ޔާމީންގެ ޓްރޭޑްމާކެއް ކަމަށެވެ.
މިނިސްޓަރ މުޢިއްޒު އެމްޑީޕީގެ ކެންޑިޑޭޓަށް ރައްދު ދެއްވާ މިގޮތަށް ޓުވީޓު ކުރެއްވިއިރު، ރައީސް ޔާމީންގެ ސަރުކާރުންވަނީ ފާއިތުވި 5 އަހަރު، ރާއްޖޭގެ ހުރިހާ ރަށެއްގައި ތަރައްޤީގެ ބޮޑެތި މަޝްރޫޢުތައް ހިންގާފައެވެ. އަދި މަޝްރޫޢުތައް ކުރިއަށް ގެންދިއުމުގައި، ރަށުގެ ސައިޒަށް ނުވަތަ އާބާދީއަށް ބެލުމެތްނެތި، ރައްޔިތުންނަށް ބޭނުންވާ ޙިދުމަތް ފޯރުކޮށް ދިނުމަށް އިސްކަންދެއްވާފައިވެއެވެ.
އެމްޑީޕީގެ ކެންޑިޑޭޓް މިހާރު ބ. އަތޮޅަށް ކުރައްވަމުންދާ ދަތުރުގައި ބ. ގޮއިދޫގައި ވާހަކަ ދައްކަވަމުން އިބްރާހީމް މުހައްމަދު ސޯލިހު ވިދާޅުވީ، ބ އަތޮޅަކީ މީގެ ކުރިން ސަރުކާރުން އަޅާލާފައިވާ އަތޮޅެއް ނޫން ކަމަށެވެ. ނަމަވެސް، ފާއިތުވި 5 އަހަރު ބ އަތޮޅުގައި 125 މަޝްރޫޢު ސަރުކާރުން ވަނީ ހިންގާފައެވެ. މިމަޝްރޫޢުތަކަށް 745.42 މިލިއަން ރުފިޔާ ސަރުކާރުން ވަނީ ޚަރަދުކޮށްފައެވެ. އަދި ބ. ގޮއިދޫގައި އެކަނިވެސް ތަރައްޤީގެ 13 މަޝްރޫޢެއް ސަރުކާރުންވަނީ ހިންގާފައެވެ. ގޮއިދޫގައި ހިންގާފައިވާ މަޝްރޫޢުތަކުގެ ތެރޭގައި ބަނދަރު ހެދުމާއި ސިއްޚީ މަރުކަޒު މަރާމާތުކުރުމާއި ސްޕޯޓްސް އެރީނާގެ މަސައްކަތާއި އިންޖީނުގެއަށް ބޭނުންވާ ޖަނަރޭޓަރުތައް ފޯރުކޮށްދިނުންފަދަ މުހިއްމު އަސާސީ މަޝްރޫޢުތައް ހިމެނެއެވެ.