މިޤަރުނުގައި ހިފާ އެންމެ ދިގު، ފުރިހަމަ ހަނދު ކޭތަ ހިފައިފި

މިޤަރުނުގައި ހިފާ އެންމެ ދިގު، ފުރިހަމަ ހަނދު ކޭތަ ހިފައިފިއެވެ. މިރޭ ހިފި ހަނދުކޭތަ، ރާއްޖޭއާއި ދުނިޔޭގެ ގިނަ ހިސާބުތަކަށް ވަރަށް ސާފުކޮށް ފެނުނެވެ.

މިރޭ ފުރިހަމަ ހަނދުކޭތަ ހިފަން ފެށުމުގެ ކުރިން 11:24 ގައި ފަޅި ހަނދު ކޭތައެއް ހިފިއެވެ. ފަޅިކޭތައަށްފަހު ފުރިހަމަ ހަނދުކޭތަ ރާއްޖެ ގަޑިން ދަންވަރު 1:21 އިން ފެށިގެން މެންދަމު 2:13 އަށް ފެނުނެވެ. މި ވަގުތު ހަނދު ފެނުނީ ރަތް އޮރެންޖު ކުލައެއްގައެވެ. މިއީ އިރުގެ އަލި ދުނިޔޭގެ ވައިގެ ފަށަލަތަކުގެ ތެރެއިން ގޮސް ހަނދަށް އެޅުމުން ފެނުނު ކުލައެކެވެ. ފުރިހަމަ ހަނދުކޭތަ ގާތްގަނޑަކަށް އެއް ގަޑިއިރާއި 43 މިނެޓް ވަންދެން ހިފާފައި ހުރިއެވެ. އަދި ފަޅި ކޭތައާއި ފުރިހަމަ ކޭތަ އެއްކޮށް، ޖުމުލަ 6 ގަޑައިރާއި 40 މިނެޓަށް ކޭތަ ދެމިގެންދާނެއެވެ. ކޭތަ ވީއްލާ ނިމޭނެ ކަމަށް ލަފާ ކުރެވެނީ ފަތިހު 04:28 ގައެވެ. އެހެންކަމުން މިއީ މިޤަރުނުގައިވެސް ފެންނާނެ އެންމެ ދިގު ހަނދުކޭތައެވެ.

ޔޫރަޕާއި އިރުމަތީ އޭޝިޔާ، އޮސްޓްރޭލިޔާއާއި ބައެއް އެހެނިހެން ސަރަޙައްދުތަކަށް ފެނުނީ ފަޅި ކޭތައެކެވެ. ނަމަވެސް އިރުމަތީ އެފްރިކާ، މެދުއިރުމަތި އަދި ސެންޓްރަލް އޭޝިޔާގެ ޤައުމުތަކާއި ރާއްޖެ ހިމެނޭ އިންޑިއާ ކަނޑުގެ ޖަޒީރާތަކަށް ފުރިހަމަ ހަނދުކޭތަ ވަރަށް ރީތިކޮށް ފެނުނެވެ.

ހަނދު ކޭތައާއި ގުޅިގެން ރާއްޖޭގެ މީހުން ދިރިއުޅޭ ހުރިހާ ރަށެއްގައިވެސް ވަނީ ކޭތަ ނަމާދުކޮށްފައެވެ. މާލެ ސިޓީ ސަރަހައްދުގައި އިސްލާމީ މަރުކަޒުގައާއި، ވިލިނގިލި ހުންނަ މަސްޖިދުލް އިޚްލާޞްއާއި އަދި ހުޅުމާލޭގައި ހުންނަ މަސްޖިދުއް ޝައިޚް ޤާސިމް ބިން މުޙައްމަދު އާލް ޘާނީ މިސްކިތުގައި ކޭތަ ނަމާދުކުރި. އަދި ކޭތަ ނަމާދަށްފަހު ޚާއްޞަ ޚުޠުބާއެއް ވަނީ ކިޔާފައެވެ.

އިރުކޭތަ އަދި ހަނދުކޭތަ ހިފަނީ، ދުނިޔެ ވަށައިގެން ހަނދު ދައުރުކޮށް، އަދި އިރު ވަށައިގެން ދުނިޔެއާއި ހަނދު ދައުރުކުރާތީ އެވެ. އެތަކެތި ދައުރުކުރަމުންދާއިރު، ބައެއްފަހަރު، އިރާއި ދުނިޔެއާ ދެމެދަށް ހަނދު ވަދެއެވެ. މިހެންވާއިރު ހިފަނީ އިރުކޭތަ އެވެ. ބައެއްފަހަރު، އިރާއި ހަނދާ ދެމެދަށް ދުނިޔެ ވަދެއެވެ. މިހެން ވާއިރު، ހިފަނީ، ހަނދުކޭތަ އެވެ.