އަންނަ އާދީއްތަ ދުވަހަކީ ރަސްމީ ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ޢަބްދުﷲ ޔާމީން އަބްދުލްޤައްޔޫމް ކަނޑައަޅުއްވައިފިއެވެ.
29 ޖުލައި ވާ އާދީއްތަ ދުވަސް ބަންދުކުރަން ރައީސް ނިންމެވީ މިނިވަން ދުވަހުގެ މުނާސަބަތުގައި ބާއްވާ ކުޅިވަރާއި ހެވިކަމުގެ ހަރަކާތްތައް މާދަމާ ރެޔަށް ފަސްކޮށްފައިވާތީ، ހަރަކާތުގައި ގިނަ އަދަދެއްގެ ދަރިވަރުންނާއި ސަރުކާރު މުވައްޒަފުން ބައިވެރިވާތީ ދަރިވަރުންނާއި މުވައްޒަފުންގެ ލުއި ފަސޭހައަށްޓަކައެވެ.
އާދިއްތަ ދުވަސް ބަންދުކުރިކަން ހާމަކުރައްވާ، ރައީސުލްޖުމްހޫރިއްޔާގެ އޮފީހުގެ ތަރުޖަމާން އިބްރާހީމް މުޢާޒް ޢަލީ ކުރެއްވި ޓުވީޓެއްގައި ވިދާޅުވީ، އާދިއްތަ ދުވަސް ބަންދުކުރަން ރައީސުލްޖުމްހޫރިއްޔާ ނިންމަވާފައިވާ ކަމަށާއި، ސަރުކާރުގެ އޮފީސްތައް ދެން ހުޅުވޭނީ 30 ޖުލައި ވާ ހޯމަ ދުވަހުގަ ކަމަށެވެ.
މިރޭ ބާއްވަން ހަމަޖެއްސެވި މިނިވަން ދުވަހުގެ ކުޅިވަރާއި ހެވިކަމުގެ ހަރަކާތްތައް މާދަމާއަށް ފަސްކުރެއްވީ މިރޭ ހިފި ހަނދު ކޭތައާއި ގުޅިގެން، ކީރިތި ރަސޫލާ އިރުޝާދު ދެއްވާފައިވާ ގޮތުގެ މަތިން ކޭތަ ނަމާދުކުރުމަށާއި ދުޢާކޮށް އަޅުކަންކުރުމަށް ވަގުތު ދިނުމަށެވެ.