ކުޅިވަރަށް ޚިދުމަތް ކުރުމުގެ ހިތްވަރު ދިނުމުގެ ޤައުމީ އިނާމު ތިން ފަރާތަކަށް ރައީސުލްޖުމްހޫރިއްޔާ ދެއްވައިފިއެވެ.
މިނިވަން ދުވަހުގެ ރަސްމީ ޖަލްސާގައި ކުޅިވަރުގެ ދާއިރާއިން، ކުޅިވަރު ހިންގުމާއި ފަންނީ ގޮތުން ކުޅިވަރަށް ޚިދުމަތް ކުރުމުގެ ރޮނގުން ހިތްވަރުދިނުމުގެ ޤައުމީ އިނާމު ލިބިވަޑައިގެންނެވީ މަޝްހޫރު ވޮލީކޯޗު އިބްރާހީމް ރަޝީދު (ސަތޯ)އަށެވެ.
މީގެ އިތުރުން ކުޅިވަރުގެ ދާއިރާއިން، ކުޅިވަރު ކުޅުމާއި މީހުން ތަމްރީން ކުރުމުގެ ރޮނގުން ހިތްވަރުދިނުމުގެ ޤައުމީ އިނާމް ސްޓާފް ސާޖަންޓް އަހުމަދު އަބްދުލްކަރީމް (ލޯންގޭ)އަށްވެސްވަނީ ދެއްވާފައެވެ. އަދި ހަމަ މިދާއިރާއިން ނައުފަލް މޫސާއަށްވެސްވަނީ ހިތްވަރުދިނުމުގެ ގައުމީ އިނާމް ދެއްވާފައެވެ.
ހިތްވަރު ދިނުމުގެ ގައުމީ އިނާމް ލިބުނު ސަތޯއަކީ ރާއްޖޭގެ ވޮލީބޯޅައިގައި މިހާރު ހުރި އެންމެ ތަޖުރިބާކާރު އެއް ކޯޗެވެ. އަތޮޅު ތެރޭގެ ޓީމްތަކަށާއި، ރިސޯޓްތަކުގެ ޓީމްތަކަށް އިރުޝާދުދިނުމުގެ އިތުރުން މިދާއިރާއިން މީހުން ތަމްރީން ކުރުމުގެ ގޮތުން ސަތޯވަނީ އަތޮޅުތެރޭގައި ވޮލީގެ ގިނަ ތަމްރީން ޕްރޮގްރާމްތަކެއް ހިންގާފައެވެ. މީގެ އިތުރުން ފުޓްބޯޅައިގެ ތެރެއިންވެސް އޭނާވަނީ ދިވެހި ކުޅިވަރަށް ގިނަ ޚިދުމަތްތަކެއްކޮށްދީފައެވެ.
ހިތްވަރުދިނުމުގެ ގައުމީ އިނާމް ލިބުނު އަޙުމަދު އަބްދުލްކަރީމް (ލޯންގޭ)އަކީ ޤައުމީ ވޮލީބޯޅަ ޓީމްގެ ކެޕްޓަނެވެ. ރާއްޖޭގެ އެންމެ މޮޅު ވޮލީބޯޅަ ކުޅުންތެރިޔާގެ މާގާމްވެސް މީގެ ކުރިން ހޯދާފައިވާ ލޯންގޭއަށް ވޮލީގައި ނުލިބޭ ކާމިޔާބެއް ނެތޭ ބުނުމަކީ ދޮގަކަށް ނުވާނެއެވެ. ބައިނަލްއަގްވާމީ މުބާރާތްތަކުން ގައުމީ ޓީމް ހޯދި ކާމިޔާބީތަކާއި، ދިވެހި ސިފައިންގެ ކުލަބު ވޮލީގައި ހޯދި ގިނަ ކާމިޔާބީތަކުގެ އެންމެ ބޮޑު ހިއްސާދާރަކީ ލޯންގޭއެވެ.
ކުޅިވަރަށް ހިދުމަތް ކުރުމުގެ ހިތްވަރު ދިނުމުގެ އިނާމު ލިބުނު ނައުފަލް މޫސާވަނީ ފެތުންތެރިން ތަމްރީން ކުރުމުގައި ގިނަ މަސައްކަތްތަކެއް ކޮށްދީފައެވެ. ފެތުމަށް ތުއްތުކުދިން ލޯބި ޖައްސައި، މި ދާއިރާއަށް ގިނަ ފެތުންތެރިން ނެރެދިނުމަށް އޭނާވަނީ ނިއު ލެގޫންސް ސްވިމިންގ ކުލަބުގައިވެސް ގިނަ މަސައްކަތްތަކެއްކޮށްފައެވެ.