ކުޅިވަރުގެ ދާއިރާއިން، ކުޅިވަރު ކުޅުމާއި ކުޅިވަރު ހިންގުމާއި މީހުން ތަމްރީން ކުރުމުގެ ރޮނގުން ޝަރަފުވެރި ކަމުގެ ގައުމީ އިނާމު ހ. ހީނާގަސްދޮށުގެ، އަޙުމަދު ސަލީމަށް ރައީސުލްޖޫމްހޫރިއްޔާ ދެއްވައިފިއެވެ.
ހީނާ އަޙްމަދު ސަލީމަކީ، ވަރަށް ޅަ އުމުރުގައި ކުޅިވަރު ކުޅުއްވަން ފެށްޓެވި އަދި ކުޅިވަރަށް ޚިދުމަތް ކުރައްވަމުން ގެންދަވާ ބޭފުޅެކެވެ. އޭނާގެ ހުނަރު އެންމެ ފުރަތަމަ ފެނިގެންދިޔައީ، މަރްޙޫމް މުޙައްމަދު ޒާހިރު ނަޞީރު ހިންގެވި، ނާޞިރު ސްޕޯޓްސް އެކެޑަމީންނެވެ. އޭގެފަހުން 1979 ވަނަ އަހަރު ކްލަބް ވެލެންސިއާ، ދިވެހި ވުޖޫދަށް ގެންނެވުމުގައި އެންމެ އިސްކޮށް ހުންނެވި އެއް ބޭފުޅަކީވެސް ހީނާ ސަލީމެވެ.
ހީނާ އަޙްމަދު ސަލީމަކީ، ރާއްޖެއިން ބޭރުގައި ރާއްޖެ ތަމްސީލުކުރި ފުރަތަމަ ޤައުމީ ފުޓްބޯޅަ ޓީމުގައި ކުޅުނު ކުޅުންތެރިއެކެވެ. 1979 ވަނަ އަހަރު ރި-ޔޫނިއަންގައި ބޭއްވި އިންޑިއަން އޯޝަން އައިލެންޑް ގޭމްސްގައި ކުޅުނު ފުޓްބޯޅަ ޓީމުގެ އެންމެ ޒުވާން ކުޅުންތެރިއަކީވެސް އޭނާއެވެ. އޭގެފަހުން 1991 ވަނަ އަހަރު، ސާފް ގޭމްސްއިން ދިވެހިރާއްޖެ ރިހި މެޑެލް ހޯދި ޓީމުގެ އެސިސްޓެންޓް ކޯޗަކީވެސް އޭނާއެވެ.
ކްލަބް ވެލެންސިއާ އެންމެ ފުރަތަމަ ފުޓްބޯޅައިގެ ޗެމްޕިއަންކަން ހޯދީ 1988 ވަނަ އަހަރުގައެވެ. އެ އަހަރު ތަޢާރުފްކުރި އެފް.އޭ.ކަޕް ވެލެންސިއާ ހޯދީ ހީނާގެ އެސިސްޓެންޓް ކޯޗުކަމުގެ ދަށުންނެވެ. އަދި ހީނާ ސަލީމުގެ ކޯޗުކަމުގެ ދަށުން 1997ވަނައަހަރު ނިއުރޭޑިއަންޓް ސްޕޯޓްސް ކްލަބަށް ޕޮމިސްކަޕްގެ ޗެމްޕިއަންކަންވެސް ހޯއްދަވައިދެއްވާފައިވެއެވެ.
ހީނާ އަޙްމަދު ސަލީމްގެ ހިތްޕުޅުގައި ކުޅިވަރަށް އޮތް ލޯބި ބޮޑުކަމުން ޒުވާން ކުޅުންތެރިންނަށް ކުޅުމުގެ ފުރުޞަތު ހޯއްދަވައިދެއްވުމުގެ ގޮތުން 1991 ވަނަ އަހަރު ޔޫތު ސްޕޯޓްސް ކްލަބް އުފެއްދެވިއެވެ. އެ ކްލަބުން ފާހަގަކުރެވުނު ގިނަ ކުޅުންތެރިން ރާއްޖޭގެ ކުޅިވަރުގެ އެންމެމަތީ ފަންތީގައި ހިމެނެއެވެ. ރާއްޖޭގެ އެކި ރަށްރަށުގެ ޓީމުތަކަށް ކޯޗް ކޮށްދެއްވުމުގެ އިތުރުން، އެކިއެކި ޓްރޭނިންގ ކޭމްޕްތައްވެސް އެކި ރަށްރަށުގައި ހީނާ ހިންގަވާފައިވެއެވެ.
ހީނާ އަޙްމަދު ސަލީމަކީ ރާއްޖޭގައި އުފެދުނު މޮޅު ފުޓްބޯޅަ ރެފްރީއެއްވެސްމެއެވެ. މީގެއިތުރުން، އެކިއެކި މުބާރާތްތަކުގެ ފަނޑިޔާރުކަން ކޮށްދެއްވުމާއި، އަތޮޅުތެރޭގައި ކުޅިވަރު ފުޅާކުރެއްވުމަށް އަމިއްލަފުޅު ޚަރަދުގައި ކުޅިވަރުކުޅޭ ތަކެތި ހަދިޔާކުރެއްވުމަކީވެސް މެދުނުކެނޑި ހީނާ ކުރައްވަމުން ގެންދަވާ ޚާއްޞަ ޚިދުމަތެކެވެ.
ހީނާ އަޙްމަދު ސަލީމުގެ އެންމެބޮޑު އަމާޒަކީ، ފެންވަރު ރަނގަޅު ޒުވާން ފުޓްބޯޅަ ކުޅުންތެރިންތަކެއް ބިނާކުރެއްވުމެވެ. މިގޮތުން، މި ހަރަކާތް ފުޅާކުރެއްވުމަށް 2004 ވަނަ އަހަރު ރަޖިސްޓަރީ ކުރައްވައިގެން ކުރިއަށް ގެންދަވާ "އާލީޓަޗް ފުޓްބޯޅަ އެކެޑެމީ" އިން ގެންދަނީ، ރާއްޖޭގެ އެކި ހިސާބުތަކުގައި އެކެޑެމީ ޤާއިމުކޮށް، ދެޖިންސުގެ ކުޑަކުދިންނަށް ފުޓްބޯޅަ ދަސްކޮށްދެއްވައި، ފުޓްބޯޅާ ކުޅުމުގެ ފުރުޞަތު ހޯއްދަވައިދެއްވަމުންނެވެ. "އާލީޓަޗް ފުޓްބޯޅަ އެކެޑެމީ" އިން ބައިނަލްއަޤްވާމީ މުބާރާތްތަކުގައިވެސް ޓީމުތައް ބައިވެރިކޮށް ރާއްޖެއަށް ރީތިނަން ހޯއްދަވައިދެއްވަމުން ގެންދަވައެވެ. މިގޮތުން 2017 ވަނަ އަހަރު މެލޭޝިޔާއާއި ސްރީލަންކާއާއި ރާއްޖޭގައި ބޭއްވުނު ތަފާތު ތިން މުބާރާތެއްގައި ބައިވެރިވެ، ދެ މުބާރާތަކުން ތަށި ހޯދާފައިވެއެވެ. މީގެ އިތުރުން، އެ އެކެޑެމީއިން ހޯދައިދިން ފުރުސަތެއްގައި އެކެޑެމީގެ ތެރެއިން ތަމްރީނުވި ދެކުއްޖަކު މިހާރުވެސް ސްޕޭންގެ ބާސެލޯނާގެ ފުޓްބޯޅަ އެކެޑެމީގައި ފުޓްބޯޅައިގެ ތަމްރީނުތައް ފުރިހަމަކުރަމުން ގެންދާކަމީ، ރާއްޖޭގެ ފުޓްބޯޅައިގެ ކުރިމަގު އުޖާލާވާނެކަމުގެ ހެއްކެކެވެ.
ސަރުކާރުން ދެއްވާ ޢާންމު ޚިދުމަތުގެ އިނާމު 1994 ވަނަ އަހަރު ހީނާ އަޙްމަދު ސަލީމަށްވަނީ ލިބިވަޑައިގެންފައެވެ. އެއީ، ކުޅިވަރަށް ޚިދުމަތްކުރުމުގެ ރޮނގުންނެވެ. އަދި މިއަހަރު [މިހާރު] ނޫހުން ހޮވި، [ލައިފްޓައިމް އެޗީވްމަންޓް މުޙައްމަދު ޒާހިރު ނަޞީރު އެވޯޑް] ވެސް ވަނީ ލިބިވަޑައިގެންފައެވެ.