އިންދިރާ ގާންދީ މެމޯރިއަލް ހޮސްޕިޓަލް އައިޖީއެމްއެޗުން އޮންލައިން މެދުވެރިކޮށް ޓޯކެން ނެގުމާއި، ލެބޯޓްރީ ރިޕޯރޓްތައް ނެގުމާއި އަދި އޮންލައިންކޮށް އެޕޮއިންޓްމެންޓް ހެއްދުމުގެ އިންތިޒާމު ހަމަޖައްސައިފިއެވެ. އައިޖީއެމްއެޗްއިން މި ޙިދުމަތްތައް ތަޢާރަފްކޮށްފައިވަނީ އެހޮސްޕިޓަލުން އިފްތިތާހުކުރި އާ ވެބްސައިޓު މެދުވެރިކޮށެވެ.
އައިޖީއެމްއެޗުގެ އާ ވެބްސައިޓުން ލިބޭ ޚިދުމަތްތަކަށް ބަލާލާއިރު، ލޮގިން ނުވެ މެމޯ ހައްދަން ޓޯކެންނެގުމާއެކު، ކިއު ސްޓޭޓަސްތަކާ ޑޮކްޓަރުންގެ ޑިއުޓީ ބަލާލެވެއެވެ. އަދި ލޮގިން ވެލުމަށްފަހު ޓޯކެން ނެގުމާއި، އެޕޮއިންޓްމެންޓް ނެގުމާއި ރިޕޯރޓުތައް ބަލާލުމުގެ ފުރުޞަތު ހުޅުވިގެންދާނެކަމަށް އައިޖީއެމްއެޗުން ބުނެއެވެ. އަދި ޓޯކެން ނަގާއިރު ކޮންމެ ފަހަރަކު ނެގޭނީ އެންމެ ޓޯކެންއެއްކަމަށާއި އަދި އަލަށް ތަޢާރަފްކުރި މި ޚިދުމަތުގެ ސަބަބުން މެނުއަލީ ކުރަމުންދާ އެއްވެސް ކަމަކަށް ބަދަލެއްނާންނާނެކަމަށްވެސް އައިޖީއެމްއެޗުން ބުނެއެވެ.
ވެބްސައިޓު މެދުވެރިކޮށް އައިޖީއެމްއެޗުން އަލަށް ތަޢާރަފްކުރި ޚިދުމަތް ހޯދުމަށް ލޮގިން ވުމަށް އައިޑީ ކާރޑް ނަންބަރާއި އެމީހަކަށް ކަނޑައަޅާފައިވާ ޕާސްވޯރޑް ޖެހުމުން ފަސޭހަކަމާއިއެކު ލޮގިން ވެވޭނެއެވެ. އަދި އައިޖީއެމްއެޗުގައި ބަލިމީހާ ރަޖިސްޓްރީ ވާއިރު ސިސްޓަމްގައި އެ ބަލިމީހާ ގެނަންބަރު އިންނާނެކަމަށާއި މި ޕާސްވޯޑް ލޮގިންވާއިރު އެމީހަކު އެދޭ ފޯނު ނަންބަރަށް ފޮނުވާނެކަމަށް އައިޖީއެމްއެޗުން ބުނެއެވެ.
އައިޖީއެމްއެޗުން އިފްތިތާޙުކުރި މި ވެބްސައިޓް މިހާރު އިނގިރޭސިބަހަށް ޚާއްޞަކުރެވިފައި ވީނަމަވެސް، ކުރިއަށް އޮތް ތާނގައި ދިވެހިބަހުންވެސް މި ވެބްސައިޓްގެ ބައިތައް ބަދަލުކުރާނެ ކަމަށް އައިޖީއެމްއެޗުން ބުނެއެވެ.