އައު ސީޒަނަށް ތައްޔާރުވުމަށް ޓީމްތަކުން ކުޅޭ ޗެމްޕިއަންސް ކަޕުގައި ޔުވެންޓަސް މޮޅެއް ހޯދައިފިއެވެ. ދުނިޔޭގެ އެންމެ މޮޅު ކުޅުންތެރިޔާ ރޮނާލްޑޯ ގުޅުނު ޔުވެންޓަސް ރޭގެ މެޗު ކާމިޔާބުކުރީ ދޭއް ސުމަކުންނެވެ.
މެޗުގައި ދެ ޓީމްގެވެސް ވޯލްޑްކަޕްގައި ކުޅުނު ތަރިން ނުކުޅެއެވެ. މެޗުގައި ޔުވެންޓަސްގެ ދެ ލަނޑުވެސް ޖަހައިދިނީ އަންދްރޭ ފަވީލީއެވެ. ބަޔާނަށް މެޗުގައި ލަނޑު ޖަހަން އެންމެ ހުސް ފުރުސަތެއް ލިބުނީ ކިންގްސްލީ ކޯމަންއަށެވެ. ކޯމަން ފޮނުވާލި ހަމަލާދިޔައީ ހުރަސް ދަނޑިމަތިން ބޭރަށެވެ.
ރޭގެ މެޗުގެ ދެ ހާފުގައި ބާޔާނުން ބޭނުންކޮށްފައިވަނީ ތަފާތު އެގާރަ ކުޅުންތެރިންނެވެ. ބަޔާންގެ ކޯޗު ނިކޯ ކޯވަކް އަދި ޔުވެންޓަސްގެ މަސިމިލިއާނޯ އެލެގްރީވަނީ އައު ގިނަ ކުޅުންތެރިންނަށް ރޭގެ މެޗުގައި ފުރުސަތު ދީފައެވެ.
މެޗަށްފަހު ބަޔާންގެ ކޯޗު ނިކޯ ކޯވަކް ބުނީ ތައްޔާރީތައް ދަނީ ރަނގަޅަށްކަމަށާއި، ޓީމުން މިފަހަރު އައު ކުޅުންތެރިން ވިދާލާނެކަމަށެވެ. އިތުރު ކުޅުންތެރިން ހޯދަން މަސައްކަތްކުރަމުން އަންނަތޯ އެހުމުން އޭނާ ބުނީ. އިތުރު ކުޅުންތެރިއަކު ގަންނާނީ ބައެއް ކުޅުންތެރިން ވިއްކާލާފައިކަމަށެވެ.