މިއަހަރު ޝަރަފުވެރިކަމުގެ ޤައުމީ އިނާމު 5 ބޭފުޅަކަށް އަދި ހިތްވަރު ދިނުމުގެ ޤައުމީ އިނާމު 15 ބޭފުޅަކަށް ދެއްވުމަށް ޤައުމީ އިނާމާބެހޭ ކޮމިޓީން ނިންމައިފިއެވެ.
ޝަރަފްވެރިކަމުގެ ޤައުމީ އިނާމު ދެނީ ދިވެހި ޤައުމަށާއި މުޖުތަމައަށް ފައިދާހުރި ގޮތެއްގައި މަދުވެގެން 35 އަހަރު ޚިދުމަތް ކޮށްފައިވާ ފަރާތްތަކަށެވެ. އަދި ހިއްވަރުދިނުމުގެ ޤައުމީ އިނާމުދެނީ 2 ގިންތިއަކަށް ބަހާލައިގެންނެވެ. އެއީ އެދާއިރާއަކުން 7 އަހަރު ޚިދުމަތްކޮށްފައިވާ ފަރުދުންނާއި، 10 އަހަރު ޚިދުމަތްކޮށްފައިވާ މުއައްސަސާތަކުގެ ގިންތިއާއި، ވަކި ދާއިރާއަކަށް މަދުވެގެން 5 އަހަރު ޚިދުމަތްކޮށްފައިވާ ޒުނާވުންނާއި އަންހެނުންނަށް ޚާއްޞަ ގިންތިއެވެ.
މިއަހަރު ޝަރަފުވެރިކަމުގެ ޤައުމީ އިނާމު ލިބިވަޑައިގަންނަވާ 5 ބޭފުޅުންގެ ތެރެއިން 4 ބޭފުޅުންނަކީ، މީގެކުރިން ހިތްވަރު ދިނުމުގެ ޤައުމީ އިނާމު ލިބިވަޑައިގެންފައިވާ ބޭފުޅުން ކަމަށް ރައީސުލްޖުމްހޫރިއްޔާގެ އޮފީހުން ބުނެއެވެ.
ޤައުމީ އިނާމު ދޭނެ 33 ދާއިރާ ޤައުމީ އިނާމު ކޮމިޓީން ކުރިންވަނީ ޢާންމުކޮށްފައެވެ. އޭގެތެރޭގައި ދީނާއި، އިޖްތިމާއި ޚިދުމަތާއި، ދައުލަތް ހިންގުމާއި، އެކި ސިނާއަތްތަކާއި، ކުޅިވަރާއި ޒުވާނުންނާއި ގުޅުންހުރި ދާއިރާތައް ހިމެނެއެވެ.
މިބޭފުޅުންނަށް ރައީސުލްޖުމްހޫރިއްޔާ ދެއްވާ ޝަރަފުވެރިކަމުގެ ޤައުމީ އިނާމާއި، ހިތްވަރު ދިނުމުގެ ޤައުމީ އިނާމު ދެއްވުން އޮންނާނީ، މިނިވަންދުވަހުގެ މުނާސަބަތުގައި، ބާއްވާ ޚާއްޞަ ޖަލްސާގައެވެ.
މިދިޔަ އަހަރު ޝަރަފުވެރިކަމުގެ ޤައުމީ އިނާމު 2 ބޭފުޅަކަށް، އަދި ހިއްވަރު ދިނުމުގެ ޤައުމީ އިނާމު 25 ފަރާތަކަށް ރައީސުލްޖުމްހޫރިއްޔާ ދެއްވާފައިވެއެވެ.