އައު ސީޒަނަށް ތައްޔާރުވަމުން އަންނަ ލިވަޕޫލާއި ބޮރޫޝިޔާ ޑޯޓްމުންޑް ވާދަކުރި މެޗުން ލިވަޕޫލް ބަލިވެއްޖެއެވެ.
ސީޒަނަށް ތައްޔާރުވުމުގެ ގޮތުން ކުޅޭ އިންޓަނޭޝަނަލް ޗެމްޕިއަންސް ކަޕްގައި ޑޯޓްމުންޑުން ލިވަޕޫލް ބަލިކުރީ ލިވަޕޫލުން ލަނޑެއް ޖަހައި ލީޑް ނަގާފައިވަނިކޮށް ފަހަތުން އަރާ ތިން ލަނޑު ޖަހައިގެންނެވެ.
މެޗުގައި ލިވަޕޫލްގެ ލަނޑު ޖަހައިދިނީ ވާޖިލް ވެންޑައިކެވެ. ޑޯޓްމުންޑުން ނަތީޖާ ހަމަހަމަކުރީ ކްރިސްޓިއަން ޕުލިސިޗް ކާމިޔާބުކުރި ޕެނަލްޓީންނެވެ. ކައުންޓަރ އެޓޭކެއްގައި ޑޯޓްމުންޑަށް ލީޑް ނަގައިދިނީވެސް ޕުލިސިޗެވެ. އެޓީމްގެ ތިންވަނަ ލަނޑު ޖަހައިދިނީ ޔަކުބް ލާސަންއެވެ.
ވޯލްޑްކަޕްގައި ކުޅުނު ލިވަޕޫލްގެ އެއްވެސް ކުޅުންތެރިއެއް ރޭގެ މެޗުގައި ނުކުޅެއެވެ. ދެ ތަރިންކަމަށްވާ ސަދިއޯ މާނޭ އަދި މުހައްމަދު ސަލާވެސް އިނީ މެޗު ބަލާށެވެ. ދެ ކުޅުންތެރިން ފަރިތަކުރުންތަކަށް ނިކުންނާނީ އަންނަ ހުކުރުދުވަހެވެ.
ރޭގެ މެޗުގައި ލިވަޕޫލާއި ކުރިއަށް އޮތް ސީޒަނަށް ގުޅުނު ފަބީނިއޯ އަދި ނަބީ ކެއިޓާވަނީ ރަނގަޅު ކުޅުމެއް ދައްކާފައެވެ.