ޖަރުމަންގެ ސަޕޯޓަރުންގެ ފަރާތުން އަމާޒުވެފައިވާ ފާޑުކިޔުންތަކާއިހުރެ އޮޒިލް ގައުމީ ޓީމަށް ކުޅުން ހުއްޓާލައިފިއެވެ.
އޮޒިލްއަށް ޖަރުމަނުގެ ރައްޔިތުންނާއި މީޑިޔާގެ ފާޑުކިޔުން އަމާޒުވާންފެށީ ވޯލްޑް ކަޕް ފެށުމުގެ އެއް މަސް ކުރިން ތުރުކީގެ ރައީސް ރަޖަބު ތައްޔިބު އުރުދުގާންއާ ބައްދަލުކޮށް ނަގާފައިވާ ފޮޓޯއެއް ސޯޝަލް މީޑިއާގައި އާންމުވުމުންނެވެ. މި ބައްދަލުވުމުގައި އޮޒިލްއާއިއެކު ސިޓީގެ ތަރި ގުންޑޮގާންވެސް ބައިވެރިވިއެވެ.
ޖަރުމަންގެ ގައުމީ ޓީމަށް ކުޅުނުކަމުގައިވިޔަސް މި ދެ ކުޅުންތެރިންނަކީ ތުރުކީއަށް އުފަން ދެ ކުޅުންތެރިންނެވެ. އާންމުވި ފޮޓޯއާއި ގުޅިގެން ޖަރުމަނު މީޑިއާ އިން ވަނީ އުރުދުގާނުގެ ކެމްޕޭނުގައި އޮޒިލާއި ގުންޑޮގާން ބައިވެރިވީ ކަމަށް ބުނެފައެވެ.
އޮޒިލް ބުނީ ތުރުކީ އަކީ އޭނާ އުފަން ގައުމުކަމަށާއި، އޭނާގެ އާއިލާވެސް ނިސްބަތްވަނީ އެގައުމަށްކަމަށެވެ. އެހެންކަމުން އެ މީހުންނާ ގުޅުން ބޭއްވުމަކީ އޭނާގެ އިހުތިޔާރުގައި އޮތް ކަމެއް ކަމަށް އޮޒިލް ބުންޏެވެ.
ވޯލްޑްކަޕްގެ ގްރޫޕް ސްޓޭޖުން ޖަރުމަން ބަލިވުމުންވެސް ގިނަ ބަޔަކުވަނީ އޮޒިލްއަށް ފާޑުކިޔާފައެވެ. އަދި އެޓީމް މުބާރާތުން ކެޓީ އޮޒިލްގެ ސަބަބުންކަމަށްބުނެ ގިނަ ބަޔަކު ނުރުހުން ފާޅުކުރިއެވެ.
29 އަހަރުގެ އޮޒިލްވަނީ ގައުމީ ޓީމަށް މިހާތަނަށް 92 މެޗު ކުޅެ 23 ގޯލް ޖަހާފައެވެ.