ޒުވާނުންނަށް އަމާޒުކޮށްގެން ޔުނައިޓެޑް ނޭޝަންސް ޑެވެލޮޕްމަންޓް ޕްރޮގްރާމް، ޔޫއެންޑީޕީއާއި އުރީދޫ މޯލްޑިވްސްއިން ކުރިއަށްގެންދިޔަ "މިޔަހެލި" ކޭމްޕްގެ 3 ވަނަ ބުރު ނިމިއްޖެއެވެ. ޒުވާނުން ހޭލުންތެރިކުރުމަށް ކުރިއަށް ގެންދިޔަ މި ޕްރޮގްރާމް ނިމުމުގެ ރަސްމިއްޔާތު ޝަރަފުވެރިކޮށްދެއްވީ، ރާއްޖޭގައި ހުންނަވާ ޔޫއެންޑީޕީގެ ރެސިޑެންޓް ރެޕްރެޒެންޓޭޓިވް ޝޯކޯ ނޯޑާ އާއި އުރީދޫ މޯލްޑިވްސްގެ ސީއީއޯ ނަޖީބް ޚާންއެވެ. މިރަސްމިއްޔާތުގައި މިކޭމްޕުގެ ބައިވެރިންނަށާއި ހޮވުނު ޓީމްތަކަށް ވަނީ ހަނދާނީ ލިޔުން ހަވާލުކޮށްފައެވެ.
ޔުނައިޓެޑް ނޭޝަންސް ޑެވެލޮޕްމަންޓް ޕްރޮގްރާމް، ޔޫއެންޑީޕީއާއި އުރީދޫ މޯލްޑިވްސްއިން ގުޅިގެން ޖުލައި މަހުގެ 5 ން 8އަކަށް ކުރިއަށްގެންދިޔަ "މިޔަހެލި" ކޭމްޕަކީ މުޖުތަމަޢުގާ ހިނގާ އެކިއެކި ކަންތައްތަކަށް ޒުވާނުން ހޭލުންތެރިކޮށް، އެމައްސަލަތަކަށް ހައްލު ހޯދާ، އަމިއްލައަށް ތަފާތު އުފެއްދުންތެރި މަސައްކަތްކުރާ ބަޔަކަށް ހެދުމަށް ކުރިއަށްދިޔަ ޕްރޮގްރާމެކެވެ.
ޖުމްލަ 4 ޓީމަށް ބާހާލައިގެން ކުރިއަށްގެންދިޔަ މިކޭމްޕުގައި ޒުވާނުންވަނީ ތަފާތު އުފެއްދުންތެރި ޚިޔާލުތައް ހުށަހަޅާފައެވެ. މީގެ ތެރޭގައި ބޭނުންކޮށްފައިވާ ތަކެތި ޑިޖިޓަލް ޕްލެޓްފޯމްތަކުގެ ޒަރިއްޔާއިން ވިއްކާ އެހެން މީހުންނަށް ފޯރުކޮށްދިނުމުގެ ވަސީލަތެއް އުފެއްދުމާއި، އާރޓިފިޝަލް އިންޓެލިޖެންސް ބޭނުންކޮށްގެން ރާއްޖޭގެ ކަނޑުތަކުގައި ދިރިއުޅޭ މަސްމަހާމެހި ދެނެގަތުމުގެ މޮޑެލްއަކާއި، ގެވެށި އަނިޔާގެ ޝިކާރައަކަށްވާ އަންހެނުންނަށް އޮންލައިންކޮށް އެހީތެރިވެދޭނެ ސިސްޓަމެއް ޤާއިމްކުރުމާއި އަދި ރާއްޖެއިން ލޮނު ތައްޔާރުކޮށް އެކްސްޕޯރޓް ކުރުމާއިގުޅޭގޮތުން ހުށެހެޅި ޚިޔާލު ހިމެނެއެވެ.
މީގެތެރެއިން އެންމެ އުފެއްދުންތެރި 2 ޚިޔާލުގެ ގޮތުގައި ހޮވުނީ ކުރިން ބޭނުންކޮށްފައިވާ ތަކެތި ވިއްކަންތައްޔާރުކުރި ޑިޖިޓަލް ޕްލެޓްފޯމުގެ ޚިޔާލާއި ރާއްޖެއިން ލޮނު ތައްޔާރުކޮށް އެކްސްޕޯޓް ކުރެވޭނެ ނިޒާމެއް ޤާއިމްކުރުމުގެ ޚިޔާލެވެ. މިޚިޔާލުތައް ހުށެހެޅި ޒުވާނުންގެ ޓީމަށް ވަނީ "މެންޓަރ ޝިޕް" ގެ ފުރުޞަތާއި ބިޒްނެސް ސެންޓަރ ކޯޕަރޭޝަން މޯލްޑިވްސް އިން ހުޅުވާ ޓްރެއިންނިންގ ފުރުޞަތާއި ޔޫއެންޑީޕީއާއި އުރީދޫ މޯލްޑިވްސްއިން ހުށަހަޅާ 3000 އެމެރިކާ ޑޮލަރުގެ ފައިސާގެ އިނާމް ހަވާލުކޮށްފައެވެ.
ޔޫއެންޑީޕީގެ އެސިސްޓެންޓް ރެސިޑެންޓް ރެޕްރެޒެންޓޭޓިވް އައިޝަތު ރިޒްނާ ވިދާޅުވީ މި ކޭމްޕްގައިވެސް ތަފާތު ޙިޔާލުތައް ހުށެހެޅިކަމަށާއި މިފަދަ ޕްލެޓްފޯމްތަކަކީ ޒުވާނުން ކުރިއަށް ދިއުމުގައި ވަރަށް ބޭނުންތެރި ޕްލެޓްފޯމެއްކަމަށެވެ. އަދި މިފަދަ ކޭމްޕްތަކުގެ ޒަރިއްޔާއިން ޒުވާނުން ބާރުވެރިކުރުވާ އެމީހުންނަކީ މުޖުތަމައުގައި ބަސްބުނެވޭ ބަޔަކަށް ހެދޭނަކަމަށެވެ.
"މިއަހަރުގެ ކޭމްޕްގެ ތަފާތަކީ ކުރީގައި އަޅުގަނޑުމެން ބޭއްވީ ވަރަށް ބޮޑަށް ސޯޝަލް އިނޮވޭޝަންއަށް ފޯކަސް ކޮށްގެން. މިހާރު އަޅުގަނޑުމެން މިބަލަނީ ސޯޝަލް އެންޓަރޕްރައިޒްއަކުން ކޮންކަހަލަ ހައްލުތަކެއްތޯ ނެރެވޭނީ ވިޔަފާރިއަކާއި ދިމާލަށް ގޮސްގެން މިކަންތައްތަކަށް ހައްލެއް ގެނައުމުގެ ގޮތުން" ރިޒްނާ ވިދާޅުވިއެވެ.
އިޤްތިސާދީ ގޮތުން ޒުވާނުން ކުރިއެރުވުމަށްޓަކައި ޔޫއެންޑީޕީއާއި އުރީދޫ މޯލްޑިވްސްއިން ކުރިއަށްގެންދާ "މިޔަހެލި" ކޭމްޕަކީ ޒުވާނުންގެ މެދުގައި ވަރަށް މަޤްބޫލު ކޭމްޕެކެވެ. އުރީދޫ މޯލްޑިވްސްގެ ޕަބްލިކް ރިލޭޝަންސްގެ އެސިސްޓެންޓް މެނޭޖަރ ނޫރާ އިބްރާހިމް ޒާހިރު ވިދާޅުވީ "މެހެލި" ކޭމްގެ އެހީގައި ޒުވާނުންނަށް އިޤްތިސާދީ ދާއިރާއިން ކުރިއަށް ދިއުމުގައި ވަރަށް ބޮޑެތި ފަސޭހަތަކެއް ލިބިގެންދާނެކަމަށެވެ. އަދި އެކި ކުދިންގެ އުފެއްދުންތެރި ޙިޔާލުތަކުގެ ނަތީޖާއަކަށް ވެގެންދާނީ މާދަމާ ބޮޑެތި ވިޔަފާރިތައް ހުޅުވިގެން ދިޔުންކަމަށާއި މިހާރުވެސް މިޒުވާނުންގެ ކިބައިގައި އެހުނަރު އެބަހުރިކަމަށް އޭނާ ވިދާޅުވިއެވެ.
" އަޅުގަނޑަށް ހީވަނީ މިކަހަލަ ކުދި ކުދި ޕްރޮޖެކްތްތަކުން ކުދިންނަށް ވަރަށް ބޮޑު ފައިދާއެއް ލިބިގެން ދާނެޔޭ. ފުރަތަމަ އެންޓަރޕްރޮނާ އެއްގެ ގޮތުގައި ނުވަތަ ބިޒްނަށް އޯނާއެއްގެ ގޮތުގައި ނިކުންނަން ވަރަށް ޖެހިލުންވާ ކުދިން އުޅޭ އެހެންނަމަވެސް މި ކޭމްޕަށް ބަލާލި ކަމުގައި ވީނަމަވެސް ކުދިން މިވަނީ ވަރަށް ބޮޑުތަން ރަނގަޅުކޮށްފަ. ކުޑަކުޑަ އައިޑިއާ އެއް ހޯންވެގެން ގޮސް މާދަމާވެސް އިންވެސްޓާއަކަށް ޕިޗްކޮށްލެވޭނެ އައިޑިއާސްތައް ފެނިގެންދިޔަ" ނޫރާ ވިދާޅުވިއެވެ.
ޔޫއެންޑީޕީއާއި އުރީދޫއާއި ގުޅިގެން ވޭތުވެދިޔަ ދެއަހަރުވެސް ވަނީ "މިޔަހެލި" ކޭމްޕް ކުރިއަށްގެންގޮސްފައެވެ.