މިސްރުގެ މުފްތީ ފަޟީލަތުލް އުސްތާޒު ޑރ. ޝައުކީ އިބްރާހިމް އައްލާމް އަލް މަދަރުސަތުލް އަރަބިއްޔަތުލް އިސްލާމިއްޔާއަށް ޒިޔާރަތްކުރައްވައިފިއެވެ. މި ޒިޔާރަތުގައި އިސްލާމިކް މިނިސްޓަރ ޑރ. އަހުމަދު ޒިޔާދާއި އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ. އަބްދުﷲ ނަޒީރު ބައިވެރިވެޑައިގެންނެވިއެވެ.
މި ޒިޔާރަތަށް ފަހު ވާހަކަފުޅު ދައްކަވަމުން ޑރ ޝައުކީ ވަނީ އަރަބި އިސްލާމީ ތައުލީމު ފުޅާކުރުމަށް ދިވެހި ސަރުކާރުން ކުރަމުންދާ މަސަތްކަތަކަށް މިސްރު ސަރުކާރާއި އަލް އަޒްހަރު ޔުނިވަރސިޓީ ގުޅިގެން އެހީތެރިކަން ދެއްވާނޭކަމުގެ ޔަޤީންކަން ވަނީ ދެއްވާފައެވެ. އަދި މިސްރު ސަރުކާރުން ރާއްޖެއަށް ދެމުންދާ ސްކޮލަރޝިޕްތައް އިތުރުކޮށް ސަޤާފީގޮތުންވެސް ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާކުރުމަށް މަސައްކަތްކޮށްދެއްވާނެކަމަށްވެސް ޑރ ޝައުކީ ވިދާޅުވިއެވެ.
އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ. އަބްދުﷲ ނަޒީރު ވިދާޅުވީ އަރަބި އިސްލާމީ ތައުލީމް ކުރިއެރުވުމަށް ދިވެހި ސަރުކާރުން ކުރަމުންދާ މަސަތްކަތްތަކަށް އަލްއަޒްހަރު ޔުނިވަރސިޓީ އަދި މިސްރު ސަރުކާރުން އެހީތެރިކަން ފޯރުކޮށްދިނުމަށް ނިންމެވީތީ އެކަމާ އުފާކުރައްވާކަމަށެވެ.