އާންމުކޮށް ލޭ ހަދިޔާ ކުރާ މީހުންނަށް، އެމީހަކު ލޭ ހަދިޔާކުރަންޖެހޭ މުއްދަތު އެސް.އެމް.އެސްއެއް މެދުވެރިކޮށް އެނގޭނެ ނިޒާމެއް މޯލްޑިވިއަން ބްލަޑް ސަރވިސަސްއިން ޤާއިމްކޮށްފިއެވެ.
މޯލްޑިވިއަން ބްލަޑްސާވިސްއިން މި ޚިދުމަތް ފަށާފައިވަނީ ލޭ ބޭނުންވާ ކުދިންނާއި މީހުނަށް ލޭ ލިބުމުގައި މިހާރު ހުރި ދަތިތައް ހައްލުކޮށްދިނުމުގެ ގޮތުންނެވެ.
ޕީއެސްއެމް ނިއުސްއަށް މަޢުލޫމާތުދެމުން މޯލްޑިވިއަން ބްލަޑްސާވިސްގެ ޑިރެކްޓަރ ޒަހުމަތު ވިދާޅުވީ ވަރަށް ގިނަ ޑޯނަރުން 3 މަސް ހަމަވުމުންވެސް ލޭ ބޭނުންވާ ފަރާތެއްގެ އިޝާރާތަކަށް މަޑުކޮށްލައިގެން ތިބޭ ކަމަށެވެ. އަދި ބައެއް ޑޯނަރުން ހަނދާންނެތިގެން ލޭ ނުދީވެސް މަޑުކުރާކަމަށެވެ. އެހެންކަމުން މިގޮތަށް އެސްއެމްއެސްއަކުން ހަނދާންކޮށްދޭން ފެށުމުން މިހާރު ލޭ ލިބުމުގައި ހުރިދަތިތަކަށް އެކަށީގެންވާ ހައްލެއް ލިބިގެންދާނެކަމަށް ޒަހުމަތު ވިދާޅުވިއެވެ.
ޒަހުމަތު ވިދާޅުވީ ތެލެސީމިޔާކުދިންނަށް ލޭ ލިބުމުގައި އަދިވެސް ދަތިތަކެއް އެބަހުރިކަމަށާއި، އެކަން ހައްލުކުރުމަށް މޯލްޑިވިއަން ބްލަޑްސާވިސްއިން ގިނަ މަސައްކަތްތަކެއް މިހާރުވެސް ކުރަމުންދާކަމަށެވެ. އެގޮތުން ލޭ ދިނުމާ ގުޅޭގޮތުން އާންމުން ހޭލުންތެރިކުރުމަށް މިއަހަރުވެސް ޕްރޮގްރާމްތަކެއް ހިންގުމަށް ހަމަޖެހިފައިވާކަމަށް އޭނާ ވިދާޅުވިއެވެ.
މޯލްޑިވިއަން ބްލަޑްސާވިސްގެ ތަފާސްހިސާބުތައް ދައްކާ ގޮތުން ރާއްޖޭގައި ލޭ ހަދިޔާކުރާ މީހުންގެ ތެރެއިން، އަމިއްލައަށް އިސް ނަގައިގެން ދަރުމަ އަށް ލޭ ހަދިޔާ ކުރަނީ 33 އިންސައްތަ މީހުންނެވެ. ޑަބްލިއުއެޗްއޯ އިން ވަނީ 2020 ވަނަ އަހަރު އަންނަންވާއިރަށް، ކޮންމެ ޤައުމަކަށްވެސް ބޭނުންވާ ލެއަކީ ދަރުމަ އަށް ލޭ ހަދިޔާ ކުރާ މީހުންގެ ފަރާތުން ލިބޭ ލެޔަށް ހެދުމަސް ކަނޑައަޅާފައެވެ.
މިއަހަރުގެ ލޭ ހަދިޔާ ކުރާ ދުވަހުގެ ޝިއާރަކީ، "އެހެން މީހަކަށް އެހީތެރިވެދެއްވުމަށް ހުންނަވާށެވެ. ލޭ ހަދިޔާ ކުރައްވާށެވެ. ދިރިއުޅުން ޙިއްސާކުރައްވާށެވެ."