މިހާރު ހިގަމުންދާ ރިޔާސީ ދައުރު ހަމަވާދުވަހު ދުވަހާއި މެދު ގޮތެއް ކަނޑައަޅާދިނުމަށް އިލެކްޝަންސް ކޮމިޝަނުން އެޓާނީ ޖެނެރަލްގެ އޮފީހުގެ ލަފަޔަކަށް އެދިއްޖެއެވެ.
އިލެކްޝަންސް ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަންގެ ރައީސް އަހުމަދު ޝަރީފު ވިދާޅުވީ މިހާރު ހިގަމުންދާ ރިޔާސީ ދައުރު ހަމަވާ ތާރީހާއި ގުޅޭގޮތުން ކޮމިޝަންގެ މެންބަރުންގެ މެދުގައި ހިޔާލު ތަފާތުވެފައިވާކަމަށެވެ. އަދި މެންބަރުންގެ މެދުގައި ހިޔާލު ތަފާތުވުން އުފެދިފައިވަނީ އަންނަ ދައުރު ގުނަން ފަށާނީ ނޮވެމްބަރު 11 ނުވަތަ 17 ގައިތޯ ކަމާއި މެދުއެވެ.
އިސީގެ ރައީސް އަހުމަދު ޝަރީފު ވިދާޅުވީ ކޮމިޝަންގެ މެންބަރުންގެ މެދުގައި އުފެދިފައިވާ ހިޔާލު ތަފާތުވުމަށް ލަފަޔަކަށް އެދި ދައުލަތުގެ ބަންޑާރަ ނައިބުގެ އޮފީހަށް ހުށައަޅާފައިވާކަމަށެވެ. އަދި އެޖީގެ ލަފާ ލިބުމުން އެކަން ހާމަކުރައްވާނެކަމަށްވެސް ޝަރީފު ވިދާޅުވިއެވެ.
2013 ވަނަ އައަހރު ބޭއްވި ރޔާސީ އިންތިހާބުގައި ދިމާވި އެކި މައްސަލަތަކަށްފަހު އިންތިހާބު ކާމިޔާބުކުރައްވާ ރައިށްކަމުގެ މަޤާމުގެ ހުވާ މިހާރު ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމް ކުރެއްވީ 2013ވަނަ އަހަރުގެ ނޮވެމްބަރު މަހުގެ 17 ވަނަދުވަހުއެވެ.
ނޫސްވެރިންނަށް މައުލޫމާތުދެއްވަމުން ޝަރީފު ވިދާޅުވީ އަންނަ ރިޔާސީ އިންތިހާބު ބޭއްވުމަށް އިއުލާންކޮށްފައިވާ ދުވަހަށްވުރެ ލަސްނުވާނެކަމަށެވެ. އަންނަ ރިޔާސީ އިންތިހާބު ބޭއްވުމަށް ހަމަޖެހިފައިވަނީ އަންނަ ސެޕްޓެމްބަރު މަހުގެ 23 ވަނަދުވަހުއެވެ.