ހައިކޯޓްގެ ދެ ފަނޑިޔާރުން ހޯދުމަށް ޖުޑީޝަލް ސާރވިސް ކޮމިޝަނުން އއިުލާންކޮށްފިއެވެ. އެ ކޮމިޝަނުން ކުރި އިއުލާނުގައި ބުނެފައިވަނީ ހައިކޯޓްގެ ފަނޑިޔާރުކަމަށް ޝައުގުވެރިވާ ފަރާތްތަކުން އަންނަ މަހުގެ ފަސްވަނަދުވަހުގެ 11:00 ގެ ކުރިން އެ ކޮމިޝަނަށް ހުށައަޅަންޖެހޭނެކަމަށެވެ.
ފަނޑިޔާރުކަމުގެ މަޤާމަށް އެދި ހުށައަޅާ ފަރާތަކީ އުމުރުން ފަންސަވީސް އަހަރު ފުރިފައިވާމީހަކަށް ވާންޖެހޭނެއެވެ. އަދި އިސްލާމީ ޝަރީއާގެ ރޮގުން ނުވަތަ ޤާނޫނޫގެ ރޮގުން ނުވަތަ ޤާނޫނާއި އިސްލާމީ ޝަރީއާގެ ރޮގުން ފުރަތަމ ޑިގްރީ ހާސިލުކޮށްފައިވާ ފަރާތަކަށް ވާންޖެހޭނެކަމަށްވެސް ޖޭއެސްސީން ބުނެއެވެ. މީގެ އިތުރުން ފަނޑިޔާރުކަމުގައި ނުވަތަ ޤާނޫނީ ވަކީލުކަމުގައި ނުވަތަ އެ ދެކަމުގައި ފަސް އަހަރު ދުވަހު އުޅެ ތަޖުރިބާ ލިބިފައިވާ މީހަކަށް ވާނެޖެހޭނެކަމަށްވެސް ޖޭއެސްސީން ބުނެއެވެ.
ހައިކޯޓްގެ ފަނޑިޔާރުންނަށް އަސާސީ މުސާރައިގެ ގޮތުގައި -/36000 ރުފިޔާއާއި ލިވިން އެލަވަންސްގެ ގޮތުގައި -/15000 ރުފިޔާގެ އިތުރުން ރިސްކް އެލަވަންސްގެ ގޮތުގައި މަހަކު -/3300 ރުފިޔާ ލިބޭނެކަމަށްވެސް ޖޭއެސްސީން ބުނެއެވެ.
ހައިކޯޓަށް ފަނޑިޔާރުން ހޯދުމަށް އިއުލާންކޮށްފައިވާއިރު ހައިކޯޓްގެ އިސް ފަނޑިޔާރު އަލްއުސްތާޛް ޢަބްދުﷲ ދީދީ އާއި ފަނޑިޔާރު އަލްއުސްތާޒް އަބްދުލްޣަނީ މުޙައްމަދު ސުޕްރީމްކޯޓަށް އައްޔަން ކުރެއްވުމަށް ޖޭއެސްސީން އިއްޔެވަނީ ރައީސުލްޖުމްހޫރިއްޔާއަށް ލަފާދެއްވާފައެވެ.
ކޯޓުތަކުގެ ޤާނޫނު ބުނާގޮތުން ހައިކޯޓްގައި ޖުމްލަ 9 ފަނޑިޔާރުން ތިބެންޖެހެއެވެ. އެހެންނަމަވެސް މިވަގުތު ހައިކޯޓްގައި ތިއްބެވީ 8 ފަނޑިޔާރުންނެވެ.