ޔޮޓް ޓުއަރސް އިން މީރާއަށް ދައްކަންޖެހޭ ފައިސާ ދައްކާފައިނުވާތީ އެ ކުންފުނީގެ އެކައުންޓައް ފުރީޒްކޮށްފައިވަނީ ޤާނޫނާއި ޚިލާފަށް ނޫންކަމަށް ސިވިލްކޯޓުން ހުކުމްކޮށްފިއެވެ.
ސިވިލްކޯޓުން މި ހުކުމްކޮށްފައިވަނީ ޔޮޓް ޓުއަރސްގެ އެކައުންޓަތައް ފުރީޒުކޮށްފައިވަނީ ޤާނޫނާއި ހިލާފަށްކަމަށް ބުނެ އެކުންފުނިން މިރާއާއި ދެކޮޅަށް ކުރި މައްސަލަ ނިންމާ އިއްވި ހުކުމުގައެވެ.
ޔޮޓް ޓުއާރސް މޯލްޑިވްސް ޕްރައިވެޓް ލިމިޓެޑްގެ އެކައުންޓްތައް މީރާއިން ފްރީޒްކޮށްފައިވަނީ އެ ކުންފުންޏަށް ދޫކޮށްފައިވާ ބައެއް ރަށްތަކަށް ދައްކަންޖެހޭ ކުއްޔާއި ޖޫރިމަނާ ދައްކާފައި ނުވާތީއެވެ. ޔޮޓް ޓުއަރސް އިން ދައުލަތަށް 29 މިލިއަން ޑޮލަރަށްވުރެ ގިނަ ފައިސާ އެއް އަހަރު ދުވަހުގެ ތެރޭގައި ދެއްކުމަށް ސިވިލްކޯޓުން ވަނީ މިދިޔަ ހަފްތާގައި ހުކުމްކޮށްފައެވެ. އަދި އެ ފައިސާ ޖޫން މަހުގެ 20 ވަނަ ދުވަހުން ފެށިގެން އެއް އަހަރު ދުވަހުގެ ތެރޭގައި ދެއްކުމަށްވެސް ސިވިލްކޯޓުގެ ހުކުމްގައިވެއެވެ.
ޔޮޓް ޓުއަރސްގެ އެކައުންޓްތައް މިރާއިން ފްރީޒުކޮށްފައިވަނީ އެކުންފުނިން ހިގަމުން އަންނަ ހއ އަލިދޫއާއި ހއ ބީނާފުއްޓާއި ކަނޑާލިފިނޮޅުގެ ކުއްޔާއި ޖުރިމަނާގެ ފައިސާ ދައްކާފައިނުވާތީއެވެ.
ޔޮޓް ޓުއަރސް މޯލްޑިވްސް ޕްރައިވެޓް ލިމިޓެޑަކީ، ކުރީގެ ރައީސް މުޙައްމަދު ނަޝީދުގެ ޕޮލިޓިކަލް އެޑްވައިޒަރުގެ މަޤާމު ފުރުއްވާފައިވާ އަދި ކާށިދޫ ދާއިރާގެ ކުރީގެ މަޖިލިސް މެމްބަރ ޢަބްދުﷲ ޖާބިރު ކުންފުންޏެވެ. ހއ. އަލިދޫގައި ރިސޯޓެއް ތަރައްޤީ ކުރަން ލީސް އެގްރީމަންޓެއް ޓޫރިޒަމް މިނިސްޓްރީއާއެކު ޔޮޓް ޓުއަރސް އިން ހަދާފައިވަނީ 2005ވަނަ އަހަރުގެ ތެރޭގައެވެ.