ރައްޔިތުންނަށް ބޭނުންވާ ތަރައްޤީއަކީ ފައިސާ ނެތިގެން ދޫކޮށްލެވޭނެ ކަންކަމެއް ނޫންކަމަށާއި، ރިސްކު ނަންގަވައިގެންވެސް ރައްޔިތުންނަށް ބޭނުންވާ ތަރައްޤީ ގެނެސްދެއްވާނެކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ކ. އަތޮޅު ގުރައިދޫ ބަނދަރުގެ މަޝްރޫޢާއި، ރައްކާތެރި ބޯފެނުގެ ނިޒާމް ޤާއިމުކޮށް ނިންމާ، އެ ދެ މަޝްރޫޢު ރަސްމީކޮށް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. ރައީސުލްޖުމްހޫރިއްޔާ ވިދާޅުވީ ހަމައެކަނި ގުދުރަތީ ވަސީލަތްތަކަށް ބަރޯސާވެވެން ނެތްކަމަށާއި، މާޔޫސްކަމާއި ނާއުއްމީދުގައި ތިބި ރައްޔިތުންނަށް މި ސަރުކާރުން ކަންތައްތަކެއް ކޮށްދޭކަން ރައްޔިތުން މިހާރު ޤަބޫލުކުރާކަމަށެވެ. މިއީ ކުރީގެ ސަރުކާރުތަކާއި ދަޢުލަތްތަކުން އެތައް އަހަރެއްވަންދެން އަޅާނުލައި ދޫކޮށްލާފައިވާ މައްސަލަތައްކަމަށާއި، މިއީ ކުރިން އެ ސަރުކާރުތަކުން ވިސްނާފައިވާ ކަންކަންވެސް ނޫންކަމަށް ރައީސް ޔާމީން ވިދާޅުވިއެވެ. ނަމަވެސް މި ސަރުކާރުގެ ތަފާތަކީ ރިސްކު ނަގައިގެންވެސް ރައްޔިތުންނަށް ބޭނުންވާ އަސާސީ ޚިދުމަތްތަކާއި، ތަރައްޤީ ގެނެސްދިނުންކަމަށް ރައީސް ވިދާޅުވިއެވެ. ރައީސް ވިދާޅުވީ ރައްޔިތުންނަށް ދިމާވެފައިވާ ދަތިކަންތައްތައް ފުދިގެން އަންނައިރު، ތަރައްޤީއާމެދު އުއްމީދުކޮށް، ހަޤީޤަތަކާއި ހަމައަށް އައުމަށް ވިސްނައިދިނީ މި ސަރުކާރުންކަންވެސް އެމަނިކުފާނުގެ ވާހަކަފުޅުގައި ވަނީ ފާހަގަކުރައްވާފައެވެ.
ރައީސް ޔާމީން ވިދާޅުވީ، ދުނިޔޭގެ ހުރިހާ ހިސާބަކުންވެސް ރާއްޖޭގައި ފަތުރުވެރިކަން ތަރައްޤީކުރުމަށް ޝަޢުގުވެރިކަންފާޅު ކުރަމުން އަންނަކަމަށާއި، ނަމަވެސް ސަރުކާރުން ފަތުރުވެރިކަމަށް އިތުރު ސަރަޙައްދުތައް ދޫނުކޮށް މަޑުކޮށްގެންތިބީ، މިހާތަނަށް ފަތުރުވެރިކަން އާއްމު ނޫން ސަރަޙައްދުތަކަށް ގެންދިއުމުގެ ބޭނުމުގައިކަމަށެވެ. އެގޮތުން މިއަދު ސަރުކާރުން އެންމެ ބޮޑަށް ބޭނުންވަނީ ރާއްޖޭގެ އެންމެ އުތުރުން ހއ، ހދ އަދި ށ. އަތޮޅުގައި ފަތުރުވެރިކަމުގެ ސިޔާސަތު ތަރައްޤީކޮށް ކުރިއެރުވުންކަމަށެވެ. އަދި އެކަމަށްޓަކާ ބޭނުންވާ ވަސީލަތްތައް ޤާއިމުކުރުމުގެ މަސައްކަތް ކުރަމުންދާކަމަށްވެސް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ވަނީ ރާއްޖޭގެ ސިޔާސީ މަޝްރަހާއި ގުޅޭގޮތުންވެސް ވާހަކަފުޅު ދައްކަވާފައެވެ. އެމަނިކުފާނު ވިދާޅުވީ އިދިކޮޅު ފަރާތްތަކަށް ޑިމޮކްރަސީ ގޯސްވެގެން އުޅެނީ އެފަރާތްތަކުގެ ޒާތީ އަދި ސިޔާސީ މަންފާއަށް ބޭނުންވާ ޙުކުމްތައް ކޯޓުތަކުން ނުނެރޭތީކަމަށާއި، ކޯޓުތަކަށް އެކިގޮތްގޮތުން ނުފޫޒު ފޯރުވި މީހުން، މިއަދު ފަޟީޙަތްވެފައިވާކަމަށެވެ. ރައީސް ޔާމީންގެ ވާހަކަފުޅުގައި ވަނީ ރާއްޖޭގެ ކޯޓުތަކަށް ނުފޫޒު ނުފޯރުވާނެކަމަށް އެމަނިކުފާނު ވިދާޅުވާ ވިދާޅުވުންވެސް ތަކުރާރުކުރައްވާފައެވެ.