ރީޖަނަލް އެލައިންސަސް ފޯ ފޮސްޓަރިންގް ޔޫތް، ރަފީ ޖަމްޢިއްޔާއިން އިންތިޒާމުކޮށްގެން ކުރިއަށްގެންދާ ސައުތް އޭޝިއަން ޔޫތް ސަމިޓްގެ، ޕްރީ ސަމިޓް ބައްދަލުވުން ބާއްވައިފިއެވެ.
މިއީ ސްރީލަންކާގައި އޮންނަ ސައުތް އޭޝިއަން ޔޫތް ސަމިޓްގައި ރާއްޖޭގެ ފަރާތުން ބައިވެރިވާ ފަރާތްތަކަށް ތަމްރީނުދިނުމަށާއި މިފަދަ ކަންކަމުގައި ޒުވާނުންގެ ދައުރު ފުޅާކުރުމަށް މިމަހުގެ 23 އިން 26 އަށް ކުރިއަށްދާ ޕްރީ ސަމިޓެކެވެ.
ޒުވާނުން ބާރުވެރިކުރުމަށް ޚާއްސަކޮށްގެން ކުރިއަށްގެންދާ މި ޕްރީ ސަމިޓް ބައްދަލުވުން ކުރިއަށްގެންދަނީ އެކި ސެޝަންތަކަށް ބަހާލައިގެންނެވެ. މިގޮތުން މޯލްޑިވްސް ޔޫތް ލީޑާސް ޑައިލޮގްގެ ނަމުގައި ސެޝަނެއް ކުރިއަށް ދިޔައިރު މިސެޝަންގައި މުޖްތަމައުގައި ޒުވާނުންނަށް ދިމާވާ މައްސަލަތަކާއި ހުރި ގޮންޖެހުންތަކާއި އެކަންކަން ހައްލުކުރެވޭނެ ގޮތްތައް ކިޔާދީފައިވެއެވެ. އަދި ދުނިޔެއަށް އަންނަ ބަދަލާއި ޓެކްނޮލޮޖީގެ ބޭނުން ހިފައިގެން ކުރިއަށް ދެވޭނެ ގޮތްތަކާއި މުޖްތަމައުގައި ހުރި ނޭދެވޭ ކަންތައްތަކުން ދުރުހެލިވެ ކުރިއަށް ދިއުމަށް ކުރެވޭނެ ކަންތައްތަކަށްވެސް މި ސެޝަންގައި އަލިއަޅުވާލާފައިވެއެވެ.
ޕީއެސްއެމް ނިއުސްއަށް ދެއްވި ޙާއްސަ ބަސްދީގަތުމެއްގައި ރީޖަނަލް އެލައިންސަސް ފޯ ފޮސްޓަރިންގް ޔޫތް ގެ ރައީސާ އައިޝަތު ރަފިއްޔާ ވިދާޅުވީ މިފަދަ ސަމިޓެއް ބޭއްވުމުގެ މައިގަނޑު ބޭނުމަކީ ޒުވާނުންގެ މެދުގައި ހުރި މައްސަލަތައް ހައްލުކޮށް ޒުވާނުން ބައިވެރިކޮށްގެން އެމީހުންގެ ޝުއޫރު ފާޅުކުރުން ކަމަށެވެ. އަދި މިފަހަރު ރަފީ ޖަމްޢިއްޔާގެ އެންމެ ބޮޑު އަމާޒަކީ މިއަހަރުގެ ސެޕްޓެމްބަރު މަހުގެ 17ގައި ސްރީލަންކާގައި ކުރިއަށްދާ ސައުތް އޭޝިއަން ޔޫތް ސަމިޓުން ކުރީ އަހަރެކޭވެސް އެއްގޮތަށް ބެސްޓް ކަންޓްރީ އެވޯޑް ހޯދުމަށްކަމަށް ރަފިއްޔާ ވިދާޅުވިއެވެ.