އައްޑޫ ސިޓީގައި ދިރިއުޅޭ އުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ މީހުންގެ ހާލަތު ދެނެގަތުމަށް ދިރާސާއެއް ފަށަން ހިއުމަން ރައިޓްސް ކޮމިޝަން އެޗް.އާރް.ސީ.އެމް އިން ނިންމައިފިއެވެ. އައްޑޫ ސިޓީ ކައުންސިލްގެ އިދާރާއާއި މޯލްޑިވްސް ޕެންޝަން އެޑްމިނިސްޓްރޭޓަޝަން އޮފީހާއި ގުޅިގެން ކުރިއަށްގެންދާ މި ދިރާސާގައި އައްޑޫ ސިޓީގެ ހުރިހާ އަވަށެއްގެ އުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ މީހުން ދިރިއުޅޭ ގޭބީސީތަކަށް ޒިޔާރާތްކޮށް މައުލޫމާތު އެއްކުރާނެކަމަށް އެޗް.އާރް.ސީ.އެމުން ބުނެއެވެ.
މިއީ އައްޑޫ ސިޓީގައި ދިރިއުޅޭ އުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ މީހުންނަށް ލިބިދޭ ރައްކާތެރިކަން ކަށަވަރުވެފައި އޮތް މިންވަރު ދެނެގަނެ، އެމީހުންގެ ޙާލަތު މޮނިޓަރކުރެވޭނެ ނިޒާމެއް ޤާއިމުކުރުމަށް މަގުފަހިކޮށްދިނުމުގެ މަޤުސަދުގައި ކުރިއަށްގެންދާ ދިރާސާއެއްކަމަށް އެޗްއާރުސީއެމުން ބުނެއެވެ.
މިދިރާސާ ފެށުމަށް ހަމަޖެހިފައިވަނީ އަންނަ ހޯމަ ދުވަހުގައެވެ. ތިން ދުވަހުގެ މުއްދަތަކަށް ކުރިއަށްގެންދާ މިދިރާސާގައި 1500 އަށްވުރެ ގިނަ މީހުންގެ މައުލޫމާތު ހޯދުމަށް ނިންމާފައިވާކަމަށް އެޗްއާރްސީއެމުން ބުނެއެވެ. އަދި މިދިރާސާ ކުރިއަށް ގެންދިއުމަށް އެނިއުމަރޭޓަރުންގެ ގޮތުގައި ބައިވެރިވުމުގެ ފުރުސަތު މިމަހުގެ 19 ވަނަ ދުވަހުގެ ނިޔަލަށް ހުޅުވާލާފައިވާކަމަށްވެސް އެޗްއާރްސީއެމުން ބުނެއެވެ.