ފުޓްބޯލް ފްރެންޑްޝިޕް އިންޓަރނޭޝަނަލް ޕްރޮގްރާމްގައި ބައިވެރިވާ ރާއްޖޭގެ ބާރަ އަހަރުން ދަށުގެ ދެ ކުޅުންތެރިން ރަޝިޔާއަށް ހިނގައްޖެއެވެ.
މިޕްރޮގްރާމްގައި ރާއްޖެއިން ބައިވެރިވަނީ މުޙައްމަދު އުވެއިޝްއާއި، އަހުމަދު ޒަހާން ނަޒީރުއެވެ. މީގެތެރެއިން މުޙައްމަދު އިވެއިޝްއަކީ ވޭލް ޝާރކް ޓީމްގެ ޑިފެންޑަރެކެވެ. އޭނާއަކީ ފަސް އަހަރުގައި ފުޓްބޯޅަ ކުޅެންފެށި ޖަމާލުއްދީން ސްކޫލްގެ ދަރިވަރެކެވެ. މިޕްރޮގްރާމްގައި ވާދަކުރާނީ ބައްތިރީސް ޓީމެވެ.
އަހުމަދު ޒަހާން ނަޒީރު އަދާކުރާނީ ޒުވާން ނޫސްވެރިއެއްގެ ދައުރެވެ. ޒަހާންއަކީ އާލީ ޓަޗް ފުޓްބޯޅަ އެކަޑަމީގައި ތަމްރީނު ވަމުން އަންނަ ޒުވާން ކުޅުންތެރިއެކެވެ. މިޕްރޮގްރާމްގައި ބައިވެރިވާ ކުޅުންތެރިން މުބާރާތުގެ ކުރިން މޮސްކޯގައި ތިން ދުވަހުގެ ތަމްރީނު ޕްރޮގްރާމެއްވެސް ފުރިހަމަކުރާނެއެވެ. އަދި ވޯރކްޝޮޕަކާއި، މަޝްހޫރު ފަރާތްތަކާއެކު ބައެއް ސެޝަންތަކުގައިވެސް ބައިވެރިވާނެއެވެ. މި ޕްރޮގްރާމްގައި ބައިވެރިވި ޓީމްތަކަށް ކޯޗުންގެ ގޮތުގައި އިރުޝާދުދޭނީ ޤައުމުތަކުން ނެގި ސާދަ އަހަރާއި، ސޯޅަ އަހަރާ ދެމެދުގެ ކޯޗުންނެވެ. މޮސްކޯގައި ކުރިއަށްގެންދާ މިޕްރްގްރާމްގައި 210 ޤައުމަކުން ކުޅުންތެރިން ބައިވެރިވާނެއެވެ.
ރާއްޖޭގެ ޒުވާން ދެ ކުޅުންތެރިން ބައިވެރިވަނީ ހަ ވަނަ ފުޓްބޯލް ފޮރ ފްރެންޑްޝިޕް އިންޓަރނޭޝަނަލް ޗިލްޑްރަންސް ފޯރަމްގައެވެ. ޕްރޮގްރާމް އޮންނާނީ މިމަހުގެ އަށްވަނަ ދުވަހުއެވެ.