ސިޔާސީ ޙަރަކާތްތައް ޤާނޫނީ އިމުގެ ތެރެއިން ހިންގުމަކީ ފުރިހަމަ ޑިމޮކްރަސީއެއް ދެމެހެއްޓުމަށް މުހިންމު ކަމެއް- ސަރުކާރު
ހަރަކާތްތެރި އިދިކޮޅު ސިޔާސީ ޕާޓީއެއް އޮތުން މުހިންމުވާ ފަދައިން ސިޔާސީ ޕާޓީތަކުގެ ޙަރަކާތްތައް ޤާނޫނާ އެއްގޮތަށް ހިންގުމަކީވެސް ފުރިހަމަ ޑިމޮކްރަސީއެއް ދެމެހެއްޓުމަށް މުހިންމު ކަމެއްކަމަށް ދިވެހި ސަރުކާރުން ހާމަކޮށްފިއެވެ.
ދިވެހި ސަރުކާރުން ނެރުނު ބަޔާނެއްގައި ބުނެފައިވަނީ ފުރިހަމަ ޑިމޮކްރަސީއެއް ޤާއިމް ކުރުމަށް އިދިކޮޅު ސިޔާސީ ޕާޓީތަކަށް ފުރުޞަތު ދޭންޖެހޭ ފަދައިން ޕާޓީތަކުން ހިންގާ ހަރަކާތްތައްވެސް ހިންގަންޖެހޭނީ ދިވެހިރާއްޖޭގެ ޤާނޫނު އަސާސީއާއި ސިޔާސީ ޕާޓީތަކުގެ ޤާނޫނާ އެއްގޮތަށް ކަމަށެވެ. އެގޮތުން ދިވެހިރާއްޖޭގެ ޤާނޫނޫ އަސާސީއާއި ޤާނޫނުތަކާ ޚިލާފު އެއްވެސް ކަމަކަށް ޖާގަ ނުދެވޭނެކަމަށާ، އެފަދަ ކަންކަން ހުއްޓުވައި ޤާނޫނު ދެމެހެއްޓުމަށް ދިވެހި ސަރުކާރުން ކުރާ ކަންކަމަކީ ޤާނޫނު އަސާސީން ލިބިދީފައިވާ އަސާސީ ޙައްޤުތަކާއި ޚިޔާލު ފާޅުކުރުމާއި އެއްވެ އުޅުމުގެ މިނިވަންކަން ހަނިކުރުން ކަމަށް ދިވެހި ސަރުކާރުން ނުދެކޭކަމަށްވެސް މި ބަޔާނުގައި ބުނެފައިވެއެވެ.
އަދި ދިވެހި ރައްޔިތުންނަށް ޤާނޫނޫއަސާސީން ލިބިދީފައިވާ ޙައްޤުތައް ކަށަވަރު ކުރުމަށް ކުރަންޖެހޭ ކޮންމެ ކަމެއްވެސް ދިވެހި ސަރުކާރުން ކުރާނެ ކަމަށާ ނަމަވެސް ޤާނޫއަސާސީއާ ޚިލާފު އެއްވެސް ކަމަކަށް ފުރުޞަތު ނުދޭނެކަމަށްވެސް މި ބަޔާނުގައި ބުނެފައިވެއެވެ.
މީގެ އިތުރުން ރާއްޖެއާ ބެހޭގޮތުން ބަޔާންތައް ނެރޭއިރު ރާއްޖޭގައި ހިނގަމުންދާ ކަންތައްތަކުގެ ތެދު މަޢުލޫމާތު ހޯދުމަކީ މުހިންމު ކަމެއްކަމަށާއި، އިދިކޮޅު ފަރާތްތަކަށް ޤާނޫނީ އިމުގެ ތެރެއިން ޙަރަކާތްތެރިވުމަށް ހިތްވަރުދިނުމަށްވެސް ބައިނަލްއަޤވާމީ މުޖުތަމައަށް މި ބަޔާނުގައި ސަރުކާރުން ވަނީ ގޮވާލާފައެވެ. އަދި މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބަކީ މިނިވަން އިންސާފުވެރި އިންތިޚާބެއްކަން ކަށަވަރު ކުރުމަށް ކުރަންޖެހޭ ހުރިހާ މަސައްކަތެއް ކުރާނެކަމުގެ ޔަޤީންކަންވެސް މި ބަޔާނުގައި ދީފައިވެއެވެ.
އަދި މިނިވަން އިންސާފުވެރި އިންތިޚާބެއް ބޭއްްވުމަށްޓަކައި ރާއްޖޭގެ އިލެކްޝަންސް ކޮމިޝަނަށާއި ގުޅުންހުރި އިދާރާތަކަށްވެސް ސަރުކާރުން ފުރިހަމަ އެއްބާރުލުން ދޭނެކަމުގެ ޔަޤީންކަންވެސް މި ބަޔާނުގައި ދީފައިވެއެވެ.