ދުނިޔޭގެ ކްރިކެޓްގެ މައި ޖަމްއިއްޔާގެ އޭޝިޔާގެ ރީޖަން ތަމްސީލުކޮށްދޭ މެންބަރަށް ކްރިކެޓް ބޯޑުގެ ރައީސް މުޙައްމަދު އަފްލާހު އިންތިޚާބުކޮށްފިއެވެ.
މިއީ ދުނިޔޭގެ ކްރިކެޓްގެ މައި ޖަމްއިއްޔާ (އައިސީސީ)ގެ މަޤާމަކަށް ރާއްޖޭގެ ބޭފުޅަކު އިންތިޚާބުވި ފުރަތަމަ ފަހަރެވެ. ރާއްޖެ އަކީ އައިސީސީގެ އެސޯސިއޭޓް މެންބަރެކެވެ.
އޭޝިޔާގެ ރެފްރެޒެންޓޭޓިވް މެންބަރުކަމަށް ހަފްލާހު އިންތިޚާބުވީ 80 ޕަސެންޓް ވޯޓް ލިބިގެންނެވެ. އަފްލާހު މިމާޤާމައަށް އިންތިޚާބުވުމުން ރާއްޖޭގެ ރައީސުލް ޖުމްހުރިއްޔާ އަބްދުﷲ ޔާމީން އަބުދުލްޤައްޔޫމް ވަނީ އަފްލާހާއި ބައްދަލުކުރައްވާ މަރުޚަބާ ދަންނަވާފައެވެ.
ރާއްޖެއިން ވަނީ މިއަހަރު ފުރަތަމަ ފަހަރަށް އައިސީސީ ވޯލްޑް ޓްވެންޓީ ޓްވެންޓީ ކްރިކެޓް މުބާރާތުގެ ކޮލިފައިންގައި ވާދަކޮށްފައެވެ.
ކްރިކެޓަކީ ޓީމު އިވެންޓުން ރާއްޖެއަށް ރަން މެޑަލް ގެނައި ފުރަތަމަ ކުޅިވަރެވެ. ރާއްޖެއިން ވަނީ 2005 ވަނަ އަހަރު ބޭއްވި އޭސީސީ އިމާޖިން ނޭޝަން ކްރިކެޓް މުބާރާތް ކާމިޔާބުކޮށްފައެވެ.