އިނގިރޭސިވިލާތުގައި ފުޓްބޯޅައިން ދެވޭ އެންމެ ފާހަގަކޮށްލެވޭ އެވޯޑްކަމަށްވާ ޕީއެފްއޭ، އަހަރުގެ އެންމެ މޮޅު ފުޓްބޯޅަ ކުޅުންތެރިޔާގެ އެވޯޑް ލިވަޕޫލްގެ މުހައްމަދު ސަލާ ހޯދައިފިއެވެ.
ލީގުގައި ވާދަކުރާ ޓީމްތަކުގެ ކުޅުންތެރިންގެ ވޯޓުން ހޮވާ އެވޯޑަށް ސަލާއާއި އެންމެ ގާތުން ވާދަކުރީ މެންޗެސްޓާރ ސިޓީގެ ކެވިން ޑިބްރައިނާއެވެ. މީގެ އިތުރުން އަހަރުގެ މޮޅު ކުޅުންތެރިޔާގެ އެވޯޑަށް ދެން ވާދަކުރީ ސިޓީގެ ލޮރޭ ސަނޭ، ޑޭވިޑް ސިލްވާ، މެންޗެސްޓާރ ޔުނައިޓެޑްގެ ޑޭވިޑް ޑެޚެއާ އަދި ޓޮޓްނަމްގެ ހެރީ ކޭންއެވެ.
މޮޅު ކުޅުންތެރިޔާގެ އެވޯޑް އުފުލާލުމަށްފަހު މުހައްމަދު ސަލާ ބުނީ ކުޅުންތެރިންގެ ވޯޓުން ހޮވާ އެވޯޑެއް ލިބުމަކީ އޭނާއަށް ލިބޭ ބޮޑު ޝަރަފަކާއި، ހިތްހަމަޖެހުމެއްކަމަށެވެ. ޗެލްސީގައި އޭނާއަށް ފުރުސަތު ނުލިބުމުން އެނބުރި ލިވަޕޫލަށް އައީވެސް އޭނާގެ އަސްލު ފެންވަރު ދައްކަންކަމަށާއި، އޭރު އޭނާއަށް ފާޑުކީ މީހުންނަށް ރަނގަޅު ރައްދެއް ދެވިއްޖެކަމަށް ސަލާ ފާހަގަކުރިއެވެ.
ސަލާ އެވޯޑް ހޯދުމުން ލިވަޕޫލްގެ ކޯޗު ޔާގެން ކްލޮޕް ބުނީ ސަލާގެ ކޯޗަކަށްވުމަކީ ފަޚުރުވެރިކަމެއްކަމަށެވެ. ލިވަޕޫލާއިއެކު އިތުރު އެވޯޑްތަކެއް ސަލާ ހޯދާނެކަމަށް އުއްމީދުކުރާކަމަށްވެސް ކޯޗު ކްލޮޕް ބުންޏެވެ.
އަހަރުގެ އެންމެ މޮޅު ޒުވާން ކުޅުންތެރިޔާގެ އެވޯޑް ހޯދީ ލޮރޭ ސަނޭއެވެ. ސަނޭއާއި އެންމެ ގާތުން މި އެވޯޑަށް ވާދަކުރީ ޓޮޓްނަމްގެ ހެރީ ކޭންއެވެ. ކޭންގެ އިތުރުން ރަހީމް ސްޓާލިން އަދި ސިޓީގެ ކީޕަރު އެޑަރސަން މޮރައެސްވެސް މި އެވޯޑަށް ވާދަކުރިއެވެ. އަހަރުގެ އެންމެ މޮޅު އަންހެން ކުޅުންތެރިޔާގެ އެވޯޑް ހޯދީ ޗެލްސީގެ ފްރެން ކާރބީއެވެ.