ހޮޓެލް ޖެންއިން ކޮފީ ހާދަނެގޮތް ދަސްކޮށްދޭ ވޯރކްޝޮޕެއް ލޯންޗުކޮށްފިއެވެ. "ލާޓޭ އާރޓް ވޯރކްޝޮޕް" ގެ ނަމުގައި ކުރިއަށްގެންދާ މި ވޯރކްޝޮޕަކީ ހޮޓެލް ޖެންއިން ކުރިއަށްގެންދާ ޖެންވައި އާރޓް ޕްރޮގުރާމުގެ ދަށުން މުޅިން އަލަށް ތަޢާރަފްކުރި ޕްރޮގުރާމެކެވެ. ދިވެހިންނަށް ޢަމާޒުކޮށްގެން ކުރިއަށްގެންދިއުމަށް ނިންމާފައިވާ މި ވޯރކްޝޮޕް ލޯންޗުކުރީ ހޮޓެލް ޖެންގައި ބޭއްވި ރަސްމިއްޔާތެއްގައެވެ.
ލާޓޭ އާރޓް ވޯރކްޝޮޕާއި ބެހޭގޮތުން މައުލޫމާތުދެއްވަމުން ހޮޓެލް ޖެންގެ މާރކެޓިންގ އެންޑް ކޮމިއުނިކޭޝަންސް މެނޭޖަރ ނީނާ މުޙައްމަދު ވިދާޅުވީ މިއީ ހޮޓެލް ޖެންއިން ކުރިއަށްގެންދާ ޖެންވައި އާރޓް ޕުރޮގްރާމަށް އިތުރުވެގެންދިޔަ ޙަރަކާތެއްކަމަށެވެ. ކޮންމެ ހަތަރުމަހަކުން އެއްފަހަރު ހޮޓެލް ޖެންގެ "ލާޓޭ އާރޓް ވޯކްޝޮޕް" ކުރިއަށްގެންދާނެކަމަށް ނީނާ ވިދާޅުވިއެވެ. މި ވޯރކްޝޮޕްގައި ބައިވެރިވާން ބޭނުންވާ ހުރިހާ ފަރާތްތަކަށް އެ ފުރުޞަތު ހުޅުވާލެވިފައިވާކަން ނީނާ ފާހަގަކުރެއްވިއެވެ.
"ކުރިއަށްއޮތް ކޮންމެ ކުއާރޓާރއެއްގައިވެސް އަޅުގަނޑުމެން އޯޕަން މިކޮށްލަނީ ހަމަ ޕަބްލިކަށް އަޅުގަނޑުމެންގެ މި ވޯކްޝޮޕްތަކުގައި ބައިވެރިވާން. މީގަ ކިޔަވަދޭނީ ހަމަ ލާޓޭ އާރޓް ވާރކް ހަދާނެގޮތް." ނީނާ މުޙައްމަދު ވިދާޅުވިއެވެ.
ހޮޓެލް ޖެންއިން ކުރިއަށްގެންދާ ލާޓޭ އާރޓް ވޯރކްޝޮޕް ކުރިއަށްގެންދާނީ ސިމްޑީ ގުރޫޕުގެ އިލީކޮފީގެ އެހީތެރިކަމާއިއެކުއެވެ. މި ވޯރކްޝޮޕްގައި ކިޔަވައިދޭނީ ކޮފީހެދުމުގައި ތަޖުރިބާކާރު މީހުންނެވެ.
img:http://s3.psmnews.mv/images/660x400/15219525817247.jpg|ހޮޓެލް ޖެންގެ ކޮޕީ އާޓް ވޯކްޝޮޕްތެރެއިން / ފޮޓޯ ޕީއެސްއެމް
ޖެންވައި އާރޓް ޕުރޮގްރާމަކީ ދިވެހި އާޓިސްޓުންނަށް ފަހި ފުރުޞަތުތަކެއް ހޯދައިދިނުމުގެ ގޮތުން ކުރިއަށްގެންދާ ޕުރޮގްރާމެކެވެ. މި ޕުރޮގްރާމްގެ ދަށުން މެކް މޯލްޑިވްސް އަރޓިސްޓް ކޮމިއުނިޓީއާއިއެކު އާރޓް ސެޝަންތަކެއް މިދިޔަ އަހަރު ކުރިއަށްގެންގޮސްފައިވާކަމަށް ހޮޓެލް ޖެންއިން މައުލޫމާތުދެއެވެ. އަދި މިއަންނަ މަހު ޕެއިންޓިންގ އާރޓް ސެޝަންތަކެއް ފަށާނެކަމަށާއި، މި ފުރޮގްރާމުގެ ދަށުން އާރޓިސްޓުންނަށް އެމީހުންގެ ހުނަރުތައް ހޮޓެލް ޖެންގައި ދައްކާލުމުގެ ފުރުޞަތު ލިބިގެންދާނެކަމަށްވެސް ހޮޓެލް ޖެންއިން ބުނެއެވެ.