ފޮރިން މިނިސްޓަރ ޑރ.މުޙައްމަދު އާސިމް، އދ ގެ ސެކްރެޓަރީ ޖެނެރަލް އެންތޯނިއޯ ގުތަރޭޝްއާއި ބައްދަލުކުރައްވައިފިއެވެ.
މިބައްދަލްކުރެއްވުން ކުރިޔަށް ގެންގޮސްފައިވަނީ އދގައި ކުރިޔަށްދިޔަ ދެމެހެއްޓެނިވި ތަރައްޤީގެ ލަނޑުދަޑިތަކާ ގުޅޭ ޚާއްސަ ބައްދަލްވުމުގައި ބައިވެރިވެ ވަޑައިގަތުމަށް ފޮރިން މިނިސްޓަރ ނިއުޔޯކަށް ކުރެއްވި ރަސްމީ ދަތުރުފުޅުގެ ތެރެއިންނެވެ. ފޮރިން މިނިސްޓަރ ވަނީ ދެމެހެއްޓެނިވި ތަރައްޤީގެ ލަނޑުދަޑިތަކާ ގުޅޭ ޚާއްސަ ބައްދަލުވުމުގައި ތަޤުރީރުވެސް ކުރައްވާފައެވެ.
އދގައި ކުރިޔަށްދިޔަ ދެމެހެއްޓެނިވި ތަރައްޤީގެ ލަނޑުދަޑިތަކާ ގުޅޭ ޚާއްސަ ބައްދަލްވުމުގައި ބައިވެރިވެ ވަޑައިގަތުމަށް ފޮރިން މިނިސްޓަރ ޑރ. މުޙައްމަދު އާސިމް ނިއުޔޯކަށް ކުރެއްވި ރަސްމީ ދަތުރުފުޅުގައި ވަނީ މި ބައްދަލުވުމުގައި ބައިވެރިވެ ވަޑައިގެންނެވި ބޭރުގެ އެކި ޤައުމުތަކުގެ އިސް މަންދޫބުންނާއި އދ ގެ ސެކްރެޓަރީ ޖެނެރަލް އެންތޯނިއޯ ގުތަރެޝްގެ އިތުރުން އދގެ އާންމު މަޖިލީހުގެ ރައީސް މިރޮސްލޮފް ލަޖަކާއާވެސް ބައްދަލުކުރައްވާފައެވެ.
މި ބައްދަލުވުންތަކުގައި މުހިންމު މަޝްވްރާތަކެއް ކުރައްވާފައިވާކަމަށް ފޮރިން މިނިސްޓްރީން ބުނެއެވެ. މިގޮތުން އދގެ އާންމު މަޖިލީހުގެ ރައީސް މިރޮސްލޮފް ލަޖަކާއާއެކު ބޭއްވެވި ބައްދަލްކުރެއްވުމުގައި އދގެ އާންމު މަޖިލީހުގައި މިހާރު ކުރިޔަށްދާ މުހިންމު މަޝްވަރާތަކާއި ކުދި ޖަޒީރާ ޤައުމުތަކުން އދގައި އަދާކުރަމުންދާ ރޯލު ހަރުދަނާކުރުމާ ބެހޭ ގޮތުން މުހިންމު މަޝްވަރާތަކެއް ކުރައްވާފައިވާކަމަށް ފޮރިން މިނިސްޓްރީން ބުނެއެވެ.
މި ދަތުރުފުޅުގައި މިނިސްޓަރ ޑރ. އާސިމް ވަނީ އދގައި ހިމެނޭ ކެރީބިއަން ޤައުމުތަކުގެ މަންދޫބުންނާވެސް ބައްދަލުކުރައްވާފައެވެ. މިބައްދަލްކުރެއްވުންތަކުގައި މިނިސްޓަރ ވަނީ ދުނިޔޭގެ މޫސުމަށް އަންނަމުންދާ ނޭދެވޭ ބަދަލުތަކާއި އެހެނިހެންވެސް މިފަދަ ކަންތައްތަކާ ގުޅުވައިގެން އދގައި ކުރިޔަށް ގެންދާ މަޝްވަރާތަކާއި ނިންމުންތަކުގައި ކުދި ޖަޒީރާ ޤައުމުތަކުން އަދާކުރާ ރޯލް ހަރުދަނާކުރުމާ ބެހޭ ގޮތުން މަޝްވަރާކުރައްވާފައެވެ.
މީގެއިތުރުން މި ބައްދަލުވުމުގައި ބައިވެރިވި އެފްރިކާގެ މަންދޫބުންނާވެސް މިނިސްޓަރ ވަނީ ބައްދަލުކުރައްވާފައެވެ. މި ބައްދަލުވުމުގައި މިނިސްޓަރ ވަނީ، ރާއްޖެއިން އދގެ ސެކިއުރިޓީ ކައުންސިލްގެ މެންބަރުކަމަށް ކުރިމަތިލާއިރު، އެޤައުމުތަކުގެ އެއްބާރުލުން ބޭނުންވާކަން ފާހަގަކުރައްވާ އެކަމާބެހޭގޮތުން މަޝްވަރާ ކުރައްވާފައެވެ.
މި ދަތުރުފުޅުގައި ފޮރިން މިނިސްޓަރ ޑރ.އާސިމް ވަނީ އެންމެ ކުޑަކޮށް ތަރައްޤީވެފައިވާ ޤައުމުތަކަށް، ތަރައްޤީވެފައިވާ ޤައުމުތަކުގެ ލިސްޓަށް ގްރެޖުއޭޓުވުމުގައި ހުރި މައްސަލަތަކާބެހޭގޮތުން ޚާއްސަ އިވެންޓެއްވެސް ކުރިޔަށް ގެންގޮސްފައެވެ. މީގެ އިތުރުން މިނިސްޓަރ ވަނީ އދގެ އާންމު މަޖިލީހުގެ ރައީސްގެ އިސްނެންގެވުމުގެ މަތިން ކުރިޔަށް ގެންދިޔަ "އިންޓަރނޭޝަނަލް ޑިކޭޑް ފޮރ އެކްޝަން: ވޯޓަރ ފޮރ ސަސްޓެއިނަބަލް ޑިވެލޮޕްމަންޓް 2018-2028"ގައި ބައިވެރިވެ ވާހަކަފުޅުވެސް ދައްކަވާފައެވެ. މި ބައްދަލުވުމުގައި މިނިސްޓަރ ދެއްކެވި ވާހަކަފުޅުގައި ވަނީ ދެމެހެއްޓެނިވި ތަރައްޤީގެ ލަނޑުދަޑިތަކުގެ ތެރެއިން ފެނާ ގުޅުން ހުރި ލަނޑުދަޑިތައް ހާސިލްކުރުމަށް ހުރި ގޮންޖެހުންތަކާއި މިކަންތައްތައް ކާމިޔާބުކުރެވޭނެ ގޮތްތަކާ ބެހޭ ގޮތުން ވާހަކަފުޅު ދައްކަވާފައެވެ. އަދި ދިވެހި ސަރުކާރުން ރާއްޖޭގެ ރަށްތަކުގައި ދެމެހެއްޓެނިވި ސާފުފެނުގެ ނިޒާމް ޤާއިމްކުރުމަށް ކުރަމުންދާ މަސައްކަތްތައްވެސް މިނިސްޓަރ ވަނީ ފާހަގަކުރައްވާފައެވެ.