ފަލަސްޠީނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު – ޑރ. އަންވަރު އަލް އަޣާ، ދިވެހިރާއްޖޭގެ ޚާރިޖީ ވަޒީރު – ދުންޔާ މަޢުމޫންއާއި ބައްދަލުކުރައްވައިފިއެވެ. މި ބައްދަލު ކުރެއްވުމުގައި ދުންޔާ ވަނީ ދިވެހިރާއްޖޭގެ ރައްޔިތުންނާ ސަރުކާރުގެ ނަމުގައި ފަލަސްޠީނުގެ ރައްޔިތުންނާ ސަރުކާރަށް ހެޔޮ އެދުންތައް ފޮނުއްވާފައެވެ.
މީގެ އިތުރުން ދާދިފަހުން ނިންމާލި އޭ.އެފް.ސީ. ޗެލެންޖު ކަޕުގައި ފަލަސްޠީނުން ހޯދި ފުރިހަމަ ކާމިޔާބީ ފާހަގަކުރައްވާ ދުންޔާ ވަނީ ފަލަސްޠީނަށް މަރުޙަބާ ވިދާޅުވެފައެވެ.
ދިވެހިރާއްޖެއާއި ފަލަސްޠީނާ ގާތް ގުޅުމެއް އޮންނަ ދެ ފަރާތްކަން ފާހަގަކުރައްވާ ދުންޔާވަނީ، ކުރިޔަށް އޮތް ތަނުގައި މިގުޅުން އިތުރަށް ބަދަހި ވެގެންދާނެކަމަށް ޢުއްމީދު ކުރައްވާކަން ހާމަކުރައްވާފައެވެ. އަދި އިޤްތިޞާދީ ދާއިރާއިން ދިވެހިރާއްޖެއާއި ފަލަސްޠީނުގެ ގުޅުން ބަދަހި ކުރުމާ ބެހޭ ގޮތުންވެސް ދިވެހި ޚާރިޖީ ވަޒީރާ، ފަލަސްޠީނުގެ ސަފީރު ވަނީ ވާހަކަފުޅު ދައްކަވާފައެވެ. މިގޮތުން ޚާއްސަ ގޮތެއްގައި މަސްވެރިކަމާ، ފަތުރުވެރިކަމާ، ދަތުރުފަތުރުގެ އިތުރުން އިންފޮމޭޝަން ޓެކްނޮލޮޖީއާއި ޢިޔާދަ ކުރަނިވި ހަކަތާއިގެ ދާއިރާއިން ދިވެހިރާއްޖެއާއި ފަލަސްޠީނާ ދެމެދު ގުޅުން ބަދަހި ކުރުމާ ބެހޭ ގޮތުން ދިވެހި ޚާރިޖީ ވަޒީރާ ފަލަސްޠީނުގެ ސަފީރު ވަނީ މަޝްވަރާ ކުރައްވާފައެވެ.