ފިންލޭންޑް އިންޓަރނޭޝަނަލް ސްކޫލެއް ރާއްޖޭގައި ހުޅުވުމަށް ނިންމައިފިއެވެ. މިކަމަށްޓަކައި ވެފައިވާ އެއްބަސްވުމުގެދަށުން ރާއްޖޭގައި މިހާރުވެސް ހިންގަމުންދާ ކޮންމެވެސް އެއްސްކޫލެއް ފިންލޭންޑް އިންޓަރނޭޝަނަލް ސްކޫލްގެ ހިންގުމާ އެއްގޮތައް ބަދަލްކުރުމާއި ފިންލޭންޑް އިންޓަރނޭޝަނަލް ފްރެންޗައިޒްގެ މުޅިން އާ ސްކޫލެއް ރާއްޖޭގައި ހުޅުވުން ހަމަޖެހިފައިވެއެވެ.
ތަޢުލީމީ ދާއިރާއިން ދުނިޔޭގައި އެންމެ ކުރި އަރާފައިވާ އެއްޤައުމުކަމަށްވާ ފިންލޭންޑްގެ މަޝްހޫރު ސްކޫލް ފްރެންޗައިޒް ފިންލޭންޑް އިންޓަނޭޝަނަލްގެ ސްކޫލެއް މާލެ އާއި ހުޅުމާލޭގައި ހުޅުވުމުވާބެހޭ އެގްރީމަންޓުގައި ސޮއިކުރުމަށް ހޮޓެލް ޖެންގައި ވަނީ ޚާއްޞަ ރަސްމިއްޔާތެއް ބާއްވާފަވެއެވެ. މިރަސްމިއްޔާތުގައި މި އެއްބަސްވުމުގައި ސޮއިކޮށްފައިވަނީ ރާއްޖޭގައި ފިންލޭންޑުގެ ސްކޫލް ހިންގުމަށް ޙަވާލުވެފައިވާ އައިލޭންޑާޒް އެޑިއުކޭޝަންގެ "އެޑިއުކަނެކްޓް"ގެ ފަރާތުން މެނޭޖިން ޑިރެކްޓަރ އަޙްމަދު އަދްލީ ރަޝީދެވެ. ފިންލޭންޑުގެ އެޑިއު ކްލަސްޓަރގެ ފަރާތުން ސޮއިކުރީ ޑިރެކްޓަރ ރިކާ ހަސީއެވެ.
މި އެއްބަސްވުމުގެ ދަށުން އަންނަ އަހަރުގެ ޖެނުއަރީމަހުގެ ނިޔަލަށް، މާލޭގައި މިހާރުވެސް ހިންގަމުންދާ ކޮންމެވެސް ސްކޫލެއް ފިންލޭންޑް އިންޓަނޭޝަނަލް ސްކޫލްގެ ދަށަށް ބަދަލްކުރާނެއެވެ. އަދި 2020ވަނަ އަހަރުގެ ތެރޭގައި މިސަރަހައްދުގައި ހުޅުވޭ ފިންލޭންޑް އިންޓަނޭޝަނަލްގެ ފުރަތަމަ ސްކޫލް ހުޅުމާލޭގައި ހުޅުވާނެއެވެ. ފިންލޭންޑްގެ ތަޢުލީމީ ދާއިރާއަކީ ތަޢުލީމީގޮތުން ދުނިޔޭގައިވެސް ފާހަގަކޮށްލެވޭ ލާމަސީލު ދާއިރާއެކެވެ. އަދި ދުނިޔޭގެ ނިސްބަތުންވެސް ތަޢުލީމީ ދާއިރާއިން އެންމެ މޮޅެތި ދަރިވަރުން އުފައްދާ ޤައުމުތަކުގެ ތެރޭގައި ފިންލޭންޑު ހިމެނެއެވެ.
މީޑިއާއަށް މައުލޫމާތުދެމުން "އެޑިއުކަނެކްޓް"ގެ މެނޭޖިން ޑިރެކްޓަރ އަޙްމަދު ޢަދްލީ ރަޝީދު ވިދާޅުވީ ފިންލޭންޑްގެ ތަޢުލީމީ ކޮންސެޕްޓުގެ މައްޗަށް ހުޅުވާ މިސްކޫލްތަކުގައި ކިޔަވާދޭ ކަރިކިއުލަމް ތަފާތުވިޔަސް މީގެތެރޭގައި އިސްލާމް، ޢަރަބި، ދިވެހި ހިމެނޭނެކަމަށެވެ. އަދި މިސްކޫލްގެ ކަރިކިއުލަމް ބައްޓަން ކުރާނީ ރާއްޖެއާގުޅޭހެންކަމަށެވެ. އަދި މިސްކޫލްގެ ކޮންސެޕްޓް ރާއްޖޭގައި މިހާރު ހިންގަމުންދާ ސްކޫލްތަކާ ވަރަށް ތަފާރުވާނެކަމަށްވެސް ޢަދްލީ ފާހަގަކުރެއްވިއެވެ.
އެޑިއު ކްލަސްޓަރގެ ޑިރެކްޓަރ ރިކާ ހަސީ ބުނީ ރާއްޖޭގައި ހުޅުވާ ސްކޫލްތައް ބައްޓަންކުރާނީ ރާއްޖޭގެ ސަޤާފަތާ ގުޅޭ ގޮތަށްކަމަށާ، ނަމަވެސް ފިންލޭންޑް ސްކޫލްތަކުގެ ކޮލިޓީ ހިފެހެއްޓުމުގެ މަޤްސަދުގައި މިސްކޫލްތަކުގައި ކިޔަވާދިނުމަށް ރާއްޖޭގެ ޓީޗަރުންނަށް ޚާއްޞަ ތަމްރީންތަކެއް ދެވޭނެކަމަށްވެސް އޭނާ ވިދާޅުވިއެވެ.
މިރަސްމިއްޔާތުގައިވަނީ ހުޅުމާލޭގައި މުޅިން އަލަށް ޤާއިމްކުރުމަށް ހަމަޖެހިފައިވާ ފިންލޭންޑް އިންޓަނޭޝަނަލްގެ ސްކޫލުގެ ޢިމާރަތަށް ބޭނުންވާ ބިންމުގެ އެގްރީމަންޓުގައި ހައުސިން ޑިވެލޮޕްމަންޓް ކޯޕަރޭޝަމް (އެޗްޑީސީ)ގެ މެނޭޖިން ޑިރެކްޓަރ މުޙައްމަދު ސައިމަންއާއި އައިލޭންޑާޒް އެޑިއުކޭޝަންގެ ޗެއަރމަން ޢަބްދުއްރަޝީދު ސޮއިކުރައްވާފައެވެ.
އަލަށް ހުޅުވަން ތައްޔާރުވެފައިވާ ފިންލޭންޑް އިންޓަނޭޝަނަލްގެ ސްކޫލަކީ އެ ޤައުމުގެ މަޝްހޫރު ޖޭވާސްކީލާ ޔުނިވާސިޓީގެ ދަށުން ހިންގާ ސްކޫލެކެވެ. ބިލަބޮންގް ހައި އަދި ކެންގަރޫ ކިޑްސްގެ ހިންގަމުންދާ އައިލެންޑާސް އިން އަލަށް ހުޅުވާ ސްކޫލަކީ މި ސަރަހައްދުގައި ހުޅުވޭ ފިންލޭންޑްގެ ފުރަތަމަ އިންޓަނޭޝަނަލް ސްކޫލެވެ. ފިންލޭންޑުގެ އެޑިއުކްލަސްޓަރއިން މިހާރު ވެސް އަންނަނީ ޤަތަރުގެ ވެރިރަށް ދޯހާގައި، އެ ޢައުމުގެ ޝާހީ ޢާއިލާއާއި ސަރުކާރާ ގުޅިގެން އިންޓަނޭޝަނަލް ސްކޫލެއް ހިންގަމުންނެވެ.