ރާއްޖޭގެ ރިސޯޓުތަކަށް ހެލިކޮޕްޓަރުގެ ޚިދުމަތް ދިނުމަށް އަބޫ ދާބީ އޭވިއޭޝަން (އަޑާ)އިން ހުށައަޅާފައިވާކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ، މަޓީއިން ހާމަކޮށްފިއެވެ.
މަޓީން މިކަން ހާމަކޮށްފައިވަނީ އެޖަމްޢިއްޔާގެ އެނުއަލް ރިޕޯޓުގައެވެ. މިރިޕޯޓު ބުނާގޮތުން ރާއްޖޭގެ ރިސޯޓުތަކަށް ހެލިކޮޕްޓަރ ޓެކްސީ އަދި އެންބިއުލެންސްގެ ޚިދުމަތް ދިނުމާބެހޭގޮތުން އަޑާއިން ޝައުގުވެރިކަން ފާޅުކޮށް، މިކަމާ ގުޅޭ މަޝްވަރާތައް މަޓީއާއެކު ވަނީ ކުރިޔަށް ގެންގޮސްފައެވެ. އަބޫ ދާބީ އޭވިއޭޝަން، އަޑާއިން ރިޒޯޓުތަކަށް ހެލިކޮޕްޓަރުގެ ޚިދުމަތްދިނުމާބެހޭ ޕްރޮޕޯސަލެއް ހުށައަޅާފައިވާކަމަށް ރާއްޖޭގެ ސިވިލް އޭވިއޭޝަން އޮތޯރިޓީންވެސް މަޢުލޫމަތުދެއެވެ. ނަމަވެސް އެއޮތޯރިޓީން ބުނީ އެއްވެސް ކުންފުންޏަކަށް ހެލިކޮޕްޓަރުގެ ޚިދުމަތް ދިނުމާބެހޭ ހުއްދަ ދެވޭނީ ރާއްޖޭގައި އަލުން މިޚިދުމަތް ދިނުމާބެހޭ ގޮތުން ކުރިޔަށް ގެންދިޔަ އެސެސްމަންޓްގެ ނަތީޖާ ޢާންމު ކުރުމަށްފަހުކަމަށެވެ. އިނގިރޭސިވިލާތުގެ ސިވިލް އޭވިއޭޝަން އޮތޯރިޓީއާއެކު ކުރިޔަށް ގެންދިޔަ މިއެއެސްމަންޓްގެ ނަތީޖާ ވަރަށް އަވަހަށް އާންމުކުރާނެކަމަށް ރާއްޖޭގެ ސިވިލް އޭވިއޭޝަނުންބުނެއެވެ.
ރާއްޖޭގައި ކޮމާޝަލް ހެލިކޮޕްޓަރ ޚިދުމަތް ދިނުމަށް ހުށަހަޅާފައިވާ އަބޫދާބީގެ ކުންފުނި، އަޑާއަކީ މެދުއިރުމަތީގެ ޤައުމުތަކުގައި ކޮމާޝަލްކޮށް ހެލިކޮޕްޓަރުގެ ޚިދުމަތްދޭ އެންމެބޮޑު އެއް ކުންފުންޏެވެ. އަޑާގެ ފްލީޓްގައި 61 އެއަރކްރާފްޓް އަދި 57ހެލިކޮޕްޓަރު އޮވެއެވެ.
ރާއްޖޭގައި ކޮމާރޝަލްކޮށް ހެލިކޮޕްޓަރގެ ޚިދުމަތް މީގެ އަހަރުތަކެއްކުރިން ދިންކަމުގައިވިޔަސް ނުރައްކާތެރި އެކްސިޑެންޓްތަކެއް ހިނގުމާ ގުޅިގެން އެޚިދުމަތްވަނީ މެދުކަޑާލާފައެވެ. ނަމަވެސް ރާއްޖޭގެ ސަލާމަތީ ބާރުތަކުންދަނީ ބަލި މީހުންއުފުލުމަށާ، އެހެނިހެން އެމަޖަންސީ ޙާލަތްތަކުގައި ހެލިކޮޕްޓަރުގެ ޚިދުމަތް ރާއްޖޭގައި ދެމުންނެވެ.