ސައުތު އޭޝިއަން ޓްރެވެލް އެވޯޑްސް (ސަޓާ) އަށް ނޮމިނޭޓްކުރުމުގެ ފުރުސަތު މިމަހުގެ 15 ގައި ހުޅުވާލާނެކަމަށް ހައިރައިޒުން ބުނެފިއެވެ. ސަޓާ އެވޯޑަކީ ދެކުނު އޭޝިއާ ސަރަހައްދަށް ޚާއްސަކޮށްގެން ދޭ އެންމެ ޝަރަފްވެރި ޓްރެވަލް އެވޯޑްސްއެވެ.
ހައިރައިޒުން އިންތިޒާމްކޮށްގެން ބާއްވަމުން އަންނަ ސައުތު އޭޝިއަން ޓްރެވެލް އެވޯޑްސް (ސަޓާ) އެވޯޑަށް ނޮމިނޭޓްކުރުމުގެ ފުރުސަތު މިމަހުގެ 15 ގައި ހުޅުވާލާއިރު ދެކުނު އޭޝިޔާ ސަރަހައްދުގެ ފަސް ގައުމަކުން މި އެވޯޑަށް އަންނަނީ ވާދަކުރަމުންނެވެ. އެއީ ދިވެހިރާއްޖެ، ސްރީލަންކާ، އިންޑިޔާ، ނޭޕާލް، އަދި ބޫޓާންއެވެ.
ޕީއެސްއެމް ނިއުސްއަށް މައުލޫމާދުދެއްވަމުން ހައިރައިޒްގެ ޖެނެރަލް މެނޭޖަރ މުޙައްމަދު ޝާމިން ވިދާޅުވީ މިމަހުގެ 15 ގައި ސަޓާ އެވޯޑަށް ނޮމިނޭޓްކުރުމުގެ ފުރުސަތު ހުޅުވާލުމާއިއެކު އެވޯޑް ގެ ޖަޖިންގ ޕެނަލްވެސް އިޢުލާންކުރާނެކަމަށެވެ. ޝާމިން ވިދާޅުވީ މިއަހަރުގެ އެވޯޑްސްއަށް ދުނިޔޭގެ ބޮޑެތި ބްރޭންތައް ވާދަކުރާނެކަމަށާއި، މިއަހަރު ވެގެންދާނީ އެންމެ ގިނަ ނޮމިނޭޝަންތައް ލިބިގެންދާނެ އަހަރު ކަމަށެވެ. އެގޮތުން 1000 ހަށްވުރެ ގިނަ ފަރާތުން މިފަހަރުގެ އެވޯޑަށް ނޮމިނޭޓްކުރާނެކަމަށް ލަފާކުރެވޭކަމަށް ޝާމިން ވިދާޅުވިއެވެ. މިހާރުވެސް ރާއްޖޭގެ ގިނަ ގެސްޓްހައުސްތަކަކުން ޝައުޤުވެރިކަން ފާޅުކޮށްފައިވާކަން ޝާމިން ފާހަގަކުރިއެވެ.
ސައުތު އޭޝިއަން ޓްރެވެލް އެވޯޑްސް، އެންމެ ފުރަތަމަ ބާއްވާފައިވަނީ 2016 ވަނަ އަހަރު ސްރީލަންކާގެ ކޮލަންބޯގައެވެ. މިދިޔަ އަހަރުގެ އެވޯޑް ރާއްޖޭގެ އެންމެ ދެކުނުން އައްޑޫ ސިޓީގެ އިކުއޭޓަރ ވިލެޖްގައި ބާއްވާފައިވާއިރު މިއަހަރުގެ އެވޯޑް ބޭއްވުމަށް ހަމަޖެހިފައިވަނީ އިންޑިއާގައެވެ. ނަމަވެސް އެވޯޑް ހަފްލާ ބާއްވާނީ އިންޑިއާގެ ކޮން ސިޓީއެއްގައިކަމެއް އަދި އިޢުލާނެއް ނުކުރެއެވެ.
ސައުތު އޭޝިއަން ޓްރެވެލް އެވޯޑްގައި ފާއިތުވި 2 އަހަރުވެސް އެންމެ ގިނަ އަދަދެއްގެ އެވޯޑް ޙާސިލްކޮށްފައިވަނީ ރާއްޖެއިންނެވެ. މިދިޔަ އަހަރުވެސް ރާއްޖެއިންވަނީ ޝައުތު އޭޝިއަން ޓްރެވެލް އެވޯޑްގެ 24 އެވޯޑެއް ކާމިޔާބުކޮށްފައެވެ. ސަޓާ އެވޯޑް އޮންނާނީ މިއަހަރުގެ ފަހުކޮޅުއެވެ.