މިލަދުންމަޑުލު ދެކުނުބުރީ ވެލިދޫގައި ސަރުކާރުން ހެއްދެވި ބަނދަރު ރައީސް ޢަބްދުﷲ ޔާމިން ޢަބްދުލްޤައްޔޫމް ރަސްމީކޮށް ހުޅުއްވާދެއްވައިފިއެވެ.
މި މަޝްރޫޢު ރައީސް ޔާމިން އިފްތިތާޙްކޮށްދެއްވީ، މިލަދުންމަޑުލު ދެކުނުބުރީގެ ބައެއް ރަށްރަށަށާއި، ފާދިއްޕޮޅު ހިންނަވަރަށާއި، މާޅޮސްމަޑުލު ދެކުނުބުރީގެ ބައެއް ރަށްރަށަށް ކުރައްވާ ދަތުރުފުޅެއްގައިއެވެ.
އެމްޓީސީސީއާ ހަވާލުކޮށްގެން މާޅެންދޫގައި ހަދާފައިވާ 800 ފޫޓު ދިގު 250 ފޫޓުފުޅާ ބަނދަރަކީ ސަރުކާރުން 37 މިލިޔަނަށްވުރެ ގިނަ ރުފިޔާ ޚަރަދުކޮށްގެން ހަދާފައިވާ ބަނދަރެކެވެ.
އެމްޓީޓީސީއާ ހަވާލުކޮށްގެން ވެލިދޫ ބަނދަރުގެ މަސައްކަތް ފަށާފައިވަނީ މިދިޔައަހަރު ޖެނުއަރީ މަހުއެވެ. މި މަޝްރޫއު ނިންމާފައިވަނީ މިމަހުއެވެ.
ވެލިދޫގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން ވެލިދޫދާއިރާގެ މެންމަބަރު އަބްދުﷲ ޔާމީން ރަޝީދު ވަނީ އެރަށަށް ރައީސް ޔާމީން ގެނެސްދެއްވި ތަރައްޤީއަށް ޝުކުރު އަދާކޮށްފައެވެ. އޭނާ ވިދާޅުވީ ރައީށް ޔާމީނަކީ ހުއްޓުމެއްނެތި ތަރައްޤީގެ މަޝްރޫއުތައް ކުރިއަށްގެންދަވާ ބޭފުޅެއްކަމަށެވެ. މިހާރުވެސް ވެލިދޫގައި 200 މިލިޔަން ރުފިޔާއަށް ވުރެ ގިނަ ޚަރަދުކުރައްވައިގެން ކުރިއަށްގެންދާ މަޝްރޫއުތައް ފާހަގަކުރައްވާ ޔާމީން ވިދާޅުވީ ވެލިދޫގެ ތަރައްޤީއަށް މަސައްކަތް ކުރަމުންދާ ޓީމަކީ ރައީސް ޔާމީން އުފެއްދެވި ޓީމެއްކަމަށް ވިދާޅުވެފައެވެ.
"ރައީސް ޔާމީނަކީ އިމްޕޮސިބަލްކަންތައްތައް ޕޮސިބަލް ކުރައްވާފަ ހުރި ބޭފުޅެއް. އެހެންވީމާ ވެލިދޫ ކައިރީގައި އަދިއެހެން އެއާޕޯޓެއް އެޅިކަމުގައިވިޔަސް ވެލިދޫކައިރިން އެއާޕޯޓެއް އެޅުމަކީވެސް ރައީސް ޔާމީނަށް ވަރަށް ފަސޭހަކަމެއް. ރައީސް ކަމެއްކުރަން ކަނޑައަޅުއްވައިފިނަމަ އެކަން ބަޖެޓްކޮށް ކުރައްވާނެ" ޢަބްދުﷲ ޔާމީން ރަޝީދު ވިދާޅުވިއެވެ.
ވެލިދޫގައި މިހާރުވެސް ޢުމްރާނީ ތަރައްޤީގެ ގިނަމަޝްރޫޢުތަކެއް ދަނީ ހިންގަމުންނެވެ. އެގޮތުން އެންމެންނަށް ރައްކާތެރި ސާފުފެނާއި ނަރުދަމާ ނިޒާމް ޔަޤީން ކޮށްދެއްވުމަށް ސަރުކާރުން ކުރައްވަމުން ގެންދަވާ މަސައްކަތުގެ ތެރެއިން ޤާއިމްކުރާ ފެނުގެ ނިޒާމާއި ނަރުދަމާ ނިޒާމްގެ މަސައްކަތްވެސް ދަނީކުރަމުންނެވެ. މިމަޝްރޫޢަށް އަށްޑިހަ އެއްމިލިޔަނަށްވުރެ ގިނަ ރުފިޔާ ޚަރަދުވެއެވެ.
މި މަޝްރޫއުގެ މަސައްކަތް އަންނައަހަރު ނިމޭނެކަމަށް ވެލިދޫ ކައުންސިލުން ބުނެއެވެ. މީގެ އިތުރުންވެސް ޒުވާނުންނަށް ޚާއްސަކޮށްގެން ވެލިދޫގައި ހަދާފައިވާ ސްޕޯޓްސް އެރީނާގެ ހުރިހާ މަސައްކަތްތަކެއްވެސް ވަނީ ނިމިފައެވެ.