ވޮލީބޯޅައިގައި ކުރިއެރުން ހޯދަން ބޭނުންނަމަ ލިބޭ ކޮންމެ ފުރުޞަތެއްގެ ބޭނުން ހިފަންޖެހޭކަމަށް ދުނިޔޭގެ ވޮލީބޯޅައިގެ މައި އިދާރާ އެފްއައިވީބީގެ ރައީސް އަރީ ޑަ ސިލްވާ ވިދާޅުވެއްޖެއެވެ.
ރާއްޖެވެސް ހިމެނޭގޮތަށް އޭޝިޔާގެ ވޮލީބޯޅަ ފެޑެރޭޝަންތަކުގެ އެންމެ އިސް ފަރާތްތަކާ މުޙާތަބުކުރައްވާ ވާހަކަ ދައްކަވަމުން އޭނާ ވިދާޅުވީ ލިބޭ ފުރުޞަތަކީ ބޮޑު ފުރުޞަތެއްތޯ ނުވަތަ ކުޑަ ފުރުޞަތެއްތޯ ނުބަލާ ބޭނުން ކުރަން ޖެހޭކަމަށެވެ. އަދި މުބާރާތްތައް ހޯސްޓް ކުރަން ލިބޭ ފުރުޞަތުތައް ދޫކޮށް ނުލުމަށްވެސް އޭނާ ގޮވާލެއްވިއެވެ. ވިދާޅުވީ މުބާރާތް ހޯސްޓް ކުރެވެނީ ސެވަން ސްޓާރ ނުވަތަ ފައިވް ސްޓާގައިތޯ ބެލުން މުޙިއްމު ނޫންކަމަށާއި، މުހިއްމީ އެފުރުޞަތުގެ ބޭނުން ހިފައިގެން އެކަން ކުރުންކަމަށެވެ. ކުޑަ ޤައުމަކަށް ވެގެން ކުރިއަށް ދިއުމުގައި ހުރަހެއް ނެތްކަމަށާއި، ވިސްނަންވީ ހަރުފަތަކަށް ފަހު ހަރުފަތެއް ގިރާކޮށް، ވޮލީބޯޅައިގައި ހަރަކާތްތެރިކަން އިތުރުކުރަން ކަމަށް އޭވީސީ ކޮންގްރެސްގައި ޚާއްޞަ މެހުމާނެއްގެ ގޮތުން ބައިވެރިވެ ވަޑައިގެން ޤައުމުތަކާ މުޙާތަބުކުރައްވާ ވިދާޅުވިއެވެ.
" ކުޑަ ޤައުމަކަށް ވެގެން ކުރިއަށްދާން ހުރަހެއް ނެތް. ފުރަތަމަ ލެވެލްގައި އޮތްނަމަ މަސައްކަތް ކުރަންވީ ލެވެލް ދޭކަށް ދާން، ދެން ތިނަކަށްދާން. އެގޮތަށް ގޮސް ކުރިއަށްދާންވީ. ލިބޭ ފުރުޞަތުތަކެއް ބޭނުން ހިފުން ވަރަށް މުހިއްމު. ސެވަން ސްޓާރގައި ކުރުން ނުވަތަ ފައިވް ސްޓާރގައި ކުރިން މުޙިއްމެއްނޫން " ޕީއެސްއެމް ސްޕޯރޓްސްއަށް ދެއްވި އެކްސްކްލޫސިވް އިންޓަރވިއުގައިވެސް އެފްއައިވީބީގެ ރައީސް ވިދާޅުވިއެވެ.
އޭނާ އަދި ވިދާޅުވީ އެފްއައިވީބީ އޮތީ ހުރިހާ ޤައުމުތަކަށްވެސް އެހީވާން ތައްޔާރަށް ކަމަށާއި، ހުށައަޅާ ރަނގަޅު ޕްރޮޖެކްޓްތަކާއި، ޕްރޮޕޯސަލްތަކަށް އެފްއައިވީބީން އެހީތެރިކަން ފޯރުކޮށްދޭނެކަމަށެވެ.
ރާއްޖެއަށް މިވަގުތު އޮތް އެންމެ ރަނގަޅު ފުރުޞަތަކީ އޭވީސީ ނަވާރަ އަހަރުން ދަށުގެ ބީޗް ވޮލީބޯޅަ މުބާރާތް ބޭއްވުމުގެ ފުރުޞަތު. އަންނަ އަހަރުގެ މާރޗް މަހުގެ ކުރިން ބާއްވަން ކަނޑައަޅާފައިވާ މުބާރާތް ޓޫރިޒަމް އިވެންޓެއްގެ ގޮތުގައި ހޮސްޓްކުރެވޭތޯ ރާއްޖޭގެ ވޮލީބޯޅަ އެސޯސިއޭޝަނުން އަންނަނީ މަސައްކަތް ކުރަމުންނެވެ.