އިސްލާމްދީނުގެ ކަރާމާތާ ޤަދަރަށް އުނިކަން ގެނައުމަށާއި، އިސްލާމްދީން ނިކަމެތިވާ އެއްވެސް ކަމެއްކުރުމަށް ވަކާލާތުކޮށް އެކަމުގެ ޚިޔާލު ގެންގުޅޭ މީހުންނަށް ރާއްޖޭގެ އެންމެ މަތީވެރިކަމުގެ ޖާގަ ދިވެހި ފަސްގަނޑުން ދެވިގެން ނުވާނެކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ޕީޕީއެމުން މާފަންނުގައި ހެދި "ފިޔާތޮށި ޖަގަހަ" ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. މިރަސްމިއްޔާތުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވަނީ 2008 ވަނަ އަހަރު ވެރިކަން ބަދަލުކުރުމަށް ސިޔާސީ ފަރާތްތަކާއި ދީނީ ޢިލްމުވެރިން ކުރެއްވި މަސައްކަތްތަކުގެ މައްޗަށް އަލިއަޅުއްވާލައްވާފައެވެ.
ރައީސް ޔާމީން ވިދާޅުވީ، 2008 ވަނަ އަހަރު ޒުވާނުން ގޮވަމުން ގެންދިޔައީ ރައީސް މައުމޫންގެ ވެރިކަން ނިންމާ، އައު ބަދަލަކަށްކަމަށެވެ. އެބަދަލުގެ ނަތީޖާއަކަށްވީ މުޅި ނިޒާމް ހަލާކުވެގެން ދިއުންކަމަށް ރައީސް ވިދާޅުވިއެވެ. އަދި މުޅި ރާއްޖެއަށް ޢާންމުވެގެން ދިޔައީ ހިންގަންތިބި މީހުންގެ ނާގާބިލްކަމުގެ ފިލާވަޅުކަމަށާއި، ދިވެހި ދައުލަތަށް އިތުބާރުކުރާ ރައްޔިތުންނާއި ބޭރު މީހުން ނެތިގެން ދިޔަކަމަށް ރައީސް ވިދާޅުވިއެވެ.
ރައީސް މައުމޫންގެ ދައުރުގެ ފަހު ދުވަސްވަރު ރައްޔިތުން ގޮވަމުންދިޔައީ ބަދަލަކަށްކަމަށާއި، ވަރަށް ޢިލްމުވެރި ބޭފުޅުން ވާރެއާއި އަވީގައި ކުރެއްވި ދުޢާ އަކީ އިސްލާމް ދީން ހިމާޔަތްކުރުމަށްޓަކައި، އިސްލާމީ އަޤީދާ ދެމެހެއްޓުމަށްޓަކާ ރައީސް ނަޝީދު ރައީސްކަމަށްް އިންތިޚާބުކޮށްދެއްވުންކަމަށެވެ. އިލްމުވެރިންގެ އެ ދުޢާތަކަކީ ވަރަށް އަސަރުގަދަ ތަޤްރީޜްތަކެއްކަމަށާއި، މި ކުޑަ ޤައުމަކީ އިސްލާމް ދީނަށް ލޯބިކުރާ ރައްޔިއްކަމަށްވާތީ އެމީހުންގެ ހިތުގެ އެންމެ ހިމަ ނާރުތަކާ އެ ދުޢާތައް ކުޅެލިކަމަށް ރައީސް ސިފަކުރެއްވިއެވެ. އެއިރުވެސް ރައީސް ނަޝީދަކީ ކޮންކަހަލަ ފިކުރެއްގެ އަދި ދީނީ ކަންކަމަށް ކިހާވަރެއްގެ ސަމާލުކަންދޭ މީހެއްކަން ދެނެވަޑައިނުގަންވާ މީހުން މަދެއް ނުވާނެކަމަށް ރައީސް ވިދާޅުވިއެވެ.
ރައީސް ޔާމީން ވިދާޅުވީ، މިކަންކަން މިއަދު ހަނދާނަށް ގެންނަންޖެހޭކަމަށެވެ. މިގޮތުން މިފަދަ ވަސްވާހުގައި ޖެހިގެން ރައީސް ނަޝީދު އިންތިޚާބު ކުރުމުން އެންމެ ފުރަތަމަވެސް ދައުވަތު ދީގެން ގެންނެވީ ރައީސް މައުމޫންގެ ޒަޢާމަތުގައި ނަޞާރާ ދީން ރާއްޖޭގައި ފެތުރުމަށް މަސައްކަތްކުރިކަމުގެ ތުހުމަތުގައި ޑީޕޯޓްކޮށްލި ހަ ބޭފުޅުންކަން ރައީސް ފާހަގަކުރެއްވިއެވެ. އަދި ނަޞާރާ ދީން ރާއްޖޭގައި ފެތުރުމަށް މަސައްކަތްކުރީތީ ޑީޕޯޓްކޮށްލި އިތުރު ތޭރަ މީހުން އިމިގްރޭޝަނުން ބްލެކް ލިސްޓްކޮށްފައިވަނިކޮށް، އެމީހުން އެ ލިސްޓުން ނަންގަވާ ރާއްޖެއަށް އެތެރެވުމުގެ ހުއްދަ ރައީސް ނަޝީދު ދެއްވިކަމަށް ރައީސް ތުހުމަތުކުރެއްވިއެވެ.
ރައީސް ވިދާޅުވީ، ޒުވާނުން ގޮވަމުން ދިޔަ ބަދަލުގެ ނަތީޖާއަކަށް ވެގެންދިޔައީ، އެ ބަދަލު އައުމުން އިސްލާމް ދީން ނޫން އެހެން ދީންތަަކަށް ފުރުޞަތު އޮތްތޯ ބެލުމަށް ސުވާލު އުފެދުންކަމަށެވެ. އަދި ފެނިގެން ދިޔައީ ސަގާފީ ގޮތުން ދިވެހިން ދަމަހައްޓަމުން ދިޔަ ރީތި ސިފަތައް ގާދޫކޮލުން ބޭރުކޮށް ބީވެގެންދިޔަ ތަންކަމަށް ރައީސް ވިދާޅުވިއެވެ. ރައީސް ވަނީ ރައީސް ނަޝީދުގެ ސަރުކާރުގެ ބައެއް ސިޔާސަތުތައްވެސް ތަފްސީލްކޮށްދެއްވާފައެވެ.
img:http://s4.psmnews.mv/images/660x400/15093876815725.jpg|ޕީޕީއެމުން މާފަންނުގައި ހެދި ފިޔާތޮށި ޖަގަހަ ހުޅުވުމަށް ބޭއްވި ރަސްމިއްޔާތުގެ ތެރެއިން / ފޮޓޯ: ޕީއެސްއެމް
ނަޝީދުގެ ވެރިކަމުގައި މުޅި މާލެއާއި އަތޮޅެތެރެ ނާމާންތަކަށް ބަދަލުވެ، ދުވަހަކުވެސް ފޫނުބެއްދޭ ވަރަށް ޤައުމު ދަރަނިވެރިވިކަމަށާއި، ޒުވާނުންގެ އަޚްލާގު ގޯސްވެ ޖަރީމާތައް ހިންގާ، މަސްތުވާތަކެއްތި ޢާންމުވެ އަމާންކަންގެއްލި ރާއްޖެއަކީ ނާމާންތަކަށް ބަދަކުވިތަންކަމަށް ރައީސް ސިފަކުރެއްވިއެވެ.
ތަޢުލީމީ ނިޒާމް ބޮއްސުންލާ ސިއްޙީ ތަންތަން މަރާތުކުރަން ބޭނުންނުވެ، ފަޅުރަށްތައް އެތައްބަޔަކަށް ވިއްކާ ބިޔަ ބަޖެޓްތައް ފާސްކޮށް ރާއްޖެ ދަރަނިވެ ބައިނަލްއަޤްވާމީ ގުޅުމާއި ޢަރަބި އިސްލާމީ ގުޅުންތައް މުޅިން ކެނޑިގެންދިޔައީކަމަށް ރައީސް ވިދާޅުވިއެވެ. އަދި އަވަށްޓެރި ޤައުމުތަކުގެ ބަސް ހޯދައިގެން ނޫނީ ކަންކަން ނުކުރެވޭ ބަޔަކަށް ދައުލަތް ބަދަލުވެގެން ދިޔަކަމަށް ރައީސް ވިދާޅުވިއެވެ.
މިހާރު ސިޔާސީ މީހުން ހައްޔަރުކޮށްފައިވާ ވާހަކަ ދައްކާއިރު ސިޔާސީ ސަބަބަކަށްޓަކައި އެއްވެސް މީހަކު ހައްޔަރުކޮށްފައި ނުވާނެކަމަށް ރައީސް ވިދާޅުވިއެވެ. މީހުން ހައްޔަރުކޮށް ޝަރީއަތް ހިންގާފައިވަނީ، އެމީހަކު ކުރި ކުށަކާ ގުޅިގެންކަމަށާއި، އެއީ ރައީސް މަރާލުމަށް މަސައްކަތްކުރުމާއި، ހަތިޔާރު ގެންގުޅުމާއި ވެރިކަން ވައްޓާލުމަށް އުޅުންފަދަ ކުށްތަކުގައިކަމަށް ވިދާޅުވިއެވެ. އަދި އެމީހުން ހުކުމް ތަންފީޒްކުރަމުން ދަނީ ޝަރީއަތާއި ޤާނޫގެ ތެރެއިންކަމަށް ރައީސް ވިދާޅުވިއެވެ.
ރައީސް މައުމޫންގެ ވެރިކަން ނިންމާ ގެންނެވި ބަދަލުން ފެނުނީ، ސިޔާސީ މީހުންނާމެދު އެއްވެސް ތަޙްޤީޤެއް ނެތި ހިތުހުރި ގޮތަކަށް މީހުން ހައްޔަރުކޮށް ވުޖޫދަުން ފޮރުވާ ފަނޑިޔާރުން ވަގަށް ނެގުންކަން ރައީސް ފާހަގަކުރެއްވިއެވެ. ނަމަވެސް މި ސަރުކާރުން މިކުރަނީ އެކަންކަން ރަނގަޅުކުރުމުގެ މަސައްކަތްކަމަށް ރައީސް ޔާމީން ވިދާޅުވިއެވެ. ޑިމޮކްރަސީއަކީ އެބަޔަކު ބޭނުންވާ ކަންކަން ބައްދަލުކުރާ ނިޒާމެއްކަމަށް ރައީސް ވިދާޅުވިއެވެ.
ރައީސް ވިދާޅުވީ، އިސްލާމް ދީނަށް ކޫޑާމީސްވާކަމެއް، އަދި އިސްލާމްދީނުގެ ކަރާމާތާ ޤަދަރަށް އަދި އިސްލާމްދީން ނިކަމެތިވާ އެއްވެސްކަމަކަށް ކުރަން ވަކާލާތުކޮށް ޚިޔާލު ގެންގުޅޭ މީހުންނަށް ރާއްޖޭގެ އެންމެ މަތީވެރިކަމުގެ ޖާގަ ދިވެހި ފަސްގަނޑުން ދެވިގެން ނުވާނެކަމަށެވެ. މިއީ ކުޑަ ޤައުމެއްކަމަށާއި މިއީ ދިވެހިން ފަޚުރުވެރިވާ، ކާބަފައިންގެ ލެއިން ހޯދާދިން ފަޚުރުވެރި ބިމެއްމަށާއި މި ބިމުގެ ވެރިކަންކުރަން ލިބުމުން ވެރިކަން ދޫކޮށްލާ މި ބިމަށް ގެއްލުންވާގޮތަށް މަސައްކަތްކުރާ އެއްވެސް މީހަކަށް ފުރުޞަތު ނެތްކަން ރައްޔިތުން ޤަބޫލްކުރަންޖެހޭކަމަށްވެސް ރައީސް ވިދާޅުވިއެވެ.
މާފަންނުގައި ހެދި ފިޔާތޮށި ޖަގަހަ ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާ ވަނީ އަލަށް ޕީޕީއެމާ ގުޅިވަޑައިގަތް ބައެއް މެމްބަރުންގެ ފޯމްތަކާ ހަވާލުވެވަޑައިގެންފައެވެ.