ރާއްޖޭގައި ހިންގާ އިޤްތިޞާދީ މަޝްރޫޢުތަކަށް އިސްލާމީ ފައިނޭސްގެ އުސޫލްތަކާ އެއްގޮތަށް ކުރިއަށް ގެންދިއުމަށް ސަރުކާރުން އިސްކަންދޭކަމަށް ރައީސުލްޖުމްހޫރިއްޔާގެ ނާއިބު ޢަބްދުﷲ ޖިހާދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ހަތަރު ވަނަ މޯލްޑިވްސް އިސްލާމިކް ބޭންކިންގ އެންޑް ފައިނޭންސް އިންޑަސްޓްރީ ކޮންފަރެންސް ފަށްޓަވާދެއްވާ ވާހަކަފުޅު ދައްކަވަމުންނެވެ.
ހަތަރު ވަނަ މޯލްޑިވްސް އިސްލާމިކް ބޭންކިން އެންޑް ފައިނޭންސް އިންޑަސްޓްރީ ކޮންފަރެންސަކީ ސްރީލަންކާގެ ޔޫޑީއޯ އެޑިޔު ކޮންސަލްޓަންޓް ކުންފުންޏާއި ވިމެން އޮން ބޯޑު ގުޅިގެން ކުރިއަށް ގެންދިޔަ ކޮންފަރެންސެކެވެ. މި ކޮންފަރެންސްގެ މިއަހަރުގެ ތީމަކީ ސްޓޭރެޓައިޒިންގަ މޯލްޑިވިއަން އިސްލާމިކް ބޭންކިން އެންޑް ފައިނޭންސް އިންޑަސްޓްރީ ފޮރ އަ ބެޓަރ ޓުމޯރޯ"އެވެ.
މި ކޮންފަރެންސް ފަށްޓަވާދެއްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނާއިބު ޢަބްދުﷲ ޖިހާދު ވިދާޅުވީ، ރާއްޖޭގައި ކުރިޔަށް ގެންދާ މަޝްރޫއުތައް އިސްލާމިކް ފައިނޭންސްގެ އުސޫލުން ކުރިއަށް ގެންދިޔުމަށް ސަރުކާރުން މަސައްކަތްކުރައްވާކަމަށެވެ. އަދި އިސްލާމިކް ފައިނޭންސްގެ މައި ހަބަށް ރާއްޖެ ހެދުމަށް މި ސަރުކާރުން ހިފާފައިވާ އަމާޒަށް ވާސިލްވުމަށް ކުރާ މަސައްކަތަށް ގިނަ ކުރިއެރުންތަކެއް ލިބެމުން އަންނަކަމަށް ނާއިބު ރައީސް ފާހަގަކުރެއްވިއެވެ. އެމަނިކުފާނުގެ ވާހަކަފުޅުގައި ރާއްޖޭގެ އިސްލާމިކް ފައިނޭންސްގެ ދާއިރާގައި އަންހެނުންގެ ދައުރު ފުޅާވަމުން އަންނަކަން ފާހަގަކުރައްވާ ސަރަޙައްދީ ޤައުމުތަކާ އަޅާބަލާއިރު މި ދާއިރާގައި އަންހެނުންގެ ދައުރު ނިސްބަތުން އިތުރުކަން ފާހަގަކުރެއްވިއެވެ.
މީގެ އިތުރުން ހަލާލް ޓޫރިޒަމް ތަޢާރަފްކުރުމުގެ ގޮތުން ފުރަތަމަ ފަހަރަށް ރާއްޖޭގައި އެކަމަށް ޙާއްޞަ ފަތުރުވެރިކަމުގެ ރަށެއް ތަރައްޤީކުރަމުން އަންނަކަން ފާހަގަކުރައްވާ ނާއިބު ރައީސް ވިދާޅުވީ، ބައިނަލްއަޤްވާމީ މައިދާނުގައި ރާއްޖެ ފަތުރުވެރިކަމުގެ ސިނާއަތުން ކުރި އެރުންތަކެއް ހޯދަމުން އަންނަކަމަށެވެ. އަދި އެކަމުން ލިބޭ ފައިދާ ސޮވެރިންގ ފަންޑަށް ޖަމާކޮށް އެންމެ ބޭނުންޖެހިފައިވާ ކަންކަމަށް ހޭދަކުރުމަށް ހަމަޖެހިފައިވާކަމަށްވެސް ނާއިބު ރައީސް ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން މޯލްޑިވްސް ސެންޓަރ ފޮރ އިސްލާމިކް ފައިނޭންސްގެ ޗެއަރޕާސަން ޑރ.އައިޝަތު މުނީޒާ ވިދާޅުވީ، އިސްލާމިކް ފައިނޭންސް ކުރިއެރުވުމަށް ރާއްޖޭގައި ކުރާ މަސައްކަތުގެ ދަށުން އިސްލާމިކް ފައިނޭންސްގެ ޚިދުމަތްދޭ 13 މުއައްސަސާ ރާއްޖޭގައި މިހާރު ޤާއިމްކޮށްފައިވާކަމަށެވެ. މުނީޒާ ވަނީ މިދާއިރާ ކުރިއެރުވުމަށް ކުރާ މަސައްކަތްތަކަށް އަލިއަޅުއްވާލައްވާ ވާހަކަ ދައްކަވާފައެވެ.
އެއްދުވަހުގެ މުއްދަތަށް ކުރިއަށް ގެންދިޔަ މި ކޮންފަރެންސްގައި އިސްލާމިކް ފައިނޭންސް ދާއިރާގައި ހަރަކާތްތެރިވާ ފަރާތްތަކަށް ދިމާވާ އެކިއެކި ގޮންޖެހުންތައް ހައްލުކުރާނެ ގޮތްތަކާއި އައު އީޖާދުތައް ތަޢާރަފްކުރާނެ ގޮތްތަކާ ގުޅޭގޮތުން ބައިބެރިން މަޝްވަރާކޮށްފައިވެއެވެ. މި ކޮންފަރެންސްގައި ރާއްޖޭގެ މާލީ ދާއިރާގައި ހަރަކާތްތެރިވާ ގިނަ މުއައްސަސާތަކާއި އިދާރާތަކުން ބައިވެރިވެފައިވެއެވެ.