އުތުރު ކޮރެއާގެ ނިއުކްލިޔަރ އަދި މިސައިލް ޕްރޮގްރާމްގެ މައްސަލައިގައި ދަތިކުރުމުގެ ފިޔަވަޅުތައް މެދުވެރިކޮށް އެގައުމަށް އިތުރު ފިއްތުންތައް ކުރިމަތިކުރުމަށް، އެމެރިކާގެ ރައީސް ޑޮނާލްޑް ޓްރަމްޕާއި ދެކުނު ކޮރެއާގެ ރައީސް މޫން ޖެއިން އެއްބަސްވެވަޑައިގެންނަވައިފިއެވެ.
ދެ ގައުމުގެ އިސްވެރިން މިކަމަށް އެއްބަސްވެވަޑައިގެންފައި ވަނީ ޓްރަމްޕާއި މޫން ކުރިއަށްގެންދެވި ފޯނު ކޯލެއްގައިކަމަށް ދެކުނު ކޮރެއާގެ ރިޔާސީ އޮފީހުން ވަނީ ހާމަކޮށްފައެވެ.
ދެކުނު ކޮރެއާގެ ރިޔާސީ ތަރުޖަމާނު ޕާކް ސޫ ހިއުން ވިދާޅުވީ، ދެ ގައުމުގެ އިސްވެރިން ވަނީ އުތުރު ކޮރެއާއިން ހިންގާ ޖެއްސުންކުރުމުގެ ޢަމަލުތަކާ ދެކޮޅަށް ދަތިކުރުމުގެ ވަރުގަދަ ފިޔަވަޅުތައް އެޅުމަށާއި، މިކަމުގައި ދެގައުމުން ގުޅިގެން މަސައްކަތްތައްކުރުމަށް އެއްބަސްވެވަޑައިގެންފައިކަމަށެވެ.
ޕާކް ވިދާޅުވީ، ޓްރަމްޕާއި މޫން ވަނީ އުތުރު ކޮރެއާއިން އެންމެ ފަހުން ކޮށްފައިވާ މިސައިލް ޓެސްޓް ހަރުކަށި އިބާރާތުން ކުށްވެރިކުރައްވާފައި ކަމަށާއި، އުތުރު ކޮރެއާއާ ދެކޮޅަށް އދގެ ސަލާމަތީ މަޖިލީހުން އެންމެ ފަހުން އެޅި ފިޔަވަޅުތައް ތަންފީޒުކުރުމުގައި ބައިނަލްއަޤުވާމީ ދުނިޔެއާއެކު މަސައްކަތްކުރުމަށް ދެގައުމުން އެއްބަސްވިކަމަށެވެ.
އދގެ ސަލާމަތީ މަޖިލީހުން ވޭތުވެދިޔަ ދެ މަސް ދުވަހުގެ ތެރޭގައި ދެ ފަހަރެއްގެ މަތިން އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅުތައް އެޅިއެވެ. އެހެންނަމަވެސް އެ ފިޔަވަޅުތަކަށްފަހު، އެ ޤައުމުން ވަނީ ނިއުކްލިޔަރ ޓެސްޓެއް ކޮށް، ބެލެސްޓިކް ދެ މިސައިލް އުދުއްސާލާފައެވެ.
އެގައުމުން ކުރި ނިއުކްލިޔަރ ޓެސްޓަކީ މިހާތަނަށް އެގައުމުން ކުރި އެންމެ ވަރުގަދަ ނިއުކްލިޔަރ ޓެސްޓް ކަމަށް ދެކުނު ކޮރެއާއާ ޖަޕާނުގެ ސައިންސްވެރިން އިއްތިފާޤުވެއެވެ. އަދި ދަތިކުރުމުގެ ފިޔަވަޅުތަކަށްފަހު އުތުރު ކޮރެއާއިން އުދުއްސާލި ދެ ބެލެސްޓިކް މިސައިލުވެސް އުދުއްސާލާފައި ވަނީ ޖަޕާނުގެ ވައިގެ ސަރަހައްދުގެ ތެރެއިންނެވެ.