މިދުވަސްވަރު ރާއްޖޭގެ އެކި ކަންކޮޅުތަކުގައި އަރިދަފުސް ރޯގާއާއި ވައިރަލް ހުން ފެތުރެމުންދާތީ އެކަމަށް ރައްކާތެރިވެ ތިބުމަށް ހެލްތް ޕްރޮޓެކްޝަން އެޖެންސީން އިލްތިމާސްކޮށްފިއެވެ.
އެޗްޕީއޭއިން މިހެން އިލްތިމާސްކޮށްފައި ވަނީ މިދުވަސްވަރަކީ ޙައްޖުގެ އަޅުކަމަށްފަހު ޙައްޖާޖީން އެނބުރި ރާއްޖެއައިސްފައިވާ ދުވަސްވަރެއްކަމުންނެވެ. އަރިދަފުސް ރޯގާޖެހިއްޖެނަމަ ކެއްސައި، ކިނބިހި އަޅާއިރު އަނގަމަތީގައާއި ނޭފަތުގައި ކުޑަރުމާލެއް ނުވަތަ ޓިޝޫއެއް ފަދަ އެއްޗެއް ބޭނުންކުރުމާއި ބޭނުންކޮށްފައިވާ ޓިޝޫ ފަދަތަތަކެތި ހާމައަށް ނުބެހެއްޓުމާއި، އާއްމު ސާފުތާހިރުކަމަށް، ޚާއްސަކޮށް ސައިބޯނިލައިގެން އަތްދޮވުންފަދަ ކަންކަމަށް ސަމާލުކަންދިނުމަށް އެޗްޕީއޭއިން އިލްތިމާސްކުރެއެވެ.
ރޯގާ ޖެހި،ކެއްސާނަމަ، މީހުން އެއްވެ އުޅޭ ތަންތަނަށް ދިއުންމަދުކުރުމާއި، ޚާއްސަކޮށް މިފަދަ ތަންތަނަށް ކުޑަކުދިން ނުގެންދިޔުމާއި ކުޑަކުދިންކައިރިއަށް ނުދިޔުމާއި އެކުދިން އުރާ ނުހެދުމަށްވެސް އެޗްޕީއޭއިން އިލްތިމާސްކުރެއެވެ.
ހުން އަދި އިރިދަފުސް ރޯގާ ޖެހިއްޖެނަމަ، ގޭގައިދެވިދާނެ ފަރުވާތަކުގެ ތެރޭގައި ގިނައިން ދިޔާތަކެތި ބޭނުންކުރުމާއި،ކަޅުސައި، ލުނބޯ،އިނގުރު، މާމުއި ފަދަ ބުއިންތައް ބޭނުންކުރުން ހިމެނޭ. މީގެ އިތުރުން ހުންގަދަނަމަ ތާފަނާފެން ހޭކުމާއި، ޕެރެސިޓަމޯލް ފިޔަވައި އެހެން ބޭހެއް ޑޮކްޓަރެއްގެ މަޝަވަރާޔާ ނުލާ ބޭނުން ނުކުރުމަށް އެޗްޕީއޭއިން އިލްތިމާސްކުރެއެވެ.
ހުންއައިސް ރޯގަޖެހި ތިންދުވަހަށްވުރެ އިތުރުވާނަމަ ޑަކްޓަރެއްގެ ލަފާޔާ އިރުޝަދު ހޯދުމަށް ވެސް އެޗްޕީއޭއިން އިލްތިމާސްކުރެއެވެ.