ދުންފަތުގެ އިސްތިއުމާލް ނުކުރާ މީހުން ދިރިއުޅޭ ގެތަކަށް އިނާމް ދޭން ނިންމައި، އެކަމާ ބެހޭ އުސޫލުތައް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފިއެވެ.
ޕެރަޑައިސް އައިލެންޑް ރިސޯޓްގައި އޮތް ރަސްމިއްޔާތެއްގައި މިކަން އިޢުލާން ކޮށްދެއްވީ ހެލްތް މިނިސްޓަރ އަބްދުﷲ ނާޒިމް އިބްރާހީމްއެވެ.
މި އުސޫލުގައި ބުނާ ގޮތުން އެ އިނާމު ދިނުމަށް ނިންމީ އާންމުން ފުރިހަމަ ސިއްޙަތެއްގައި ތިބުމަށް ހިތްވަރުދީ، އެކަމުގެ އަގު ސަރުކާރުން ވަޒަން ކުރުމުގެ ގޮތުންނެވެ. އެޗްޕީއޭގެ މި އިޢުލާން އިފްތިތާހް ކޮށްދެއްވުމަށްފަހު ވާހަކަ ދައްކަވަމަން ހެލްތް މިނިސްޓަރ ވިދާޅުވީ މުޖުތަމަޢުގައި ދުންފަތުގެ އިސްތިއުމާލް ކުރާމީހުން މަދުކުރުމަކީ ކޮންމެ މީހެއްގެ ވެސް ޒިންމާއެއްކަމަށެވެ. އަދި މަންޒަރު ނުވަތަ ތަސްވީރު ބޭނުންކޮށްގެން ސިއްހަތުގެ އިންޒާރު ދިނުމާއިބެހޭ ޤަވާއިދުގެ މަސައްކަތް ކުރަމުންދާކަމަށާއި ޤަވާއިދު ފުރިހަމަވުމުން ތަންފީޒްކުރަންފަށަނެކަން މިނިސްޓަރ ފާހަގަކުރެއްވިއެވެ.
ދިވެހިންނަކީ ދުޅަހެޔޮ ސިއްހަތެއްގައި ތިބޭ ބަޔަކަށް ހެދުމަށް ބާރުއެޅުމާއި ދުންފަތުގެ އިސްތިއުމާލުކުރުން ހުއްޓުވަން ކުރަމުން އަންނަ މަސައްކަތުގެ އަގު ވަޒަންކޮށް ހިތްވަރު ދިނުމުގެ އިތުރުން ދިރިއުޅޭ މާހައުލަކީ ދުންފަތުގެ ދުމުން ރައްކާތެރި ތަނަކަށް ހެދުމަކީ ވެސް އިނާމު ދިނުމުގެ މަގްސަދެއް ކަމަށް އެޗްޕީއޭއިން ބުނެއެވެ.
އިނާމަށް ނަން ހުށަހަޅާ ފަރާތްތަކުގެ ޝަރުތުތަކުގެ ތެރޭގައި ދިވެހިން އުޅޭ ގޭބިސީއަކަށް ވުމާއި ގޭބިސީގައި ދިރިއުޅޭ ބަޔަކު ދުންފަތުގެ އިސްތިއުމާލު ނުކުރާތާ މަދުވެގެން އެއް އަހަރު ވުމާއި އެ ގޭބިސީއަކީ ދުންފަތުގެ އިސްތިއުމާލު ނުކުރާ ބަޔަކު އުޅޭ ތަނެއްކަން ސާވޭއިން ކަނޑައަޅަންޖެހޭ ކަމަށް އުސޫލުގައި ބަޔާންކޮށްފައިވެއެވެ.
އަހަރަކު އެއް ފަހަރު ދޭ މި އިނާމު ހައްގުވާ ފަރާތްތައް ކަނޑައަޅާނީ ހެލްތު މިނިސްޓްރީން އެކުލަވާލާ ކޮމެޓީއަކުންނެވެ.
މިރަސްމިއްޔާތުގައިވަނީ ދުންފަތުގެ ބާވަތްތަކުގެ ވިޔަފާރި ނުކުރާ ފަރާތްތަކުގެ އަގު ވަޒަންކުރުމުގެ ގޮތުން ނުވަފަރާތަކަށް އެ އެވޯޑް ދީފައެވެ. މި އެވޯޑަކީ ކޮންމެ އަހަރަކު ދުނިޔޭގެ ދުންފަތުގެ އިސްތިއުމާލު ނުކުރާ ދުވަހުގެ މުނާސަބަތާ ގުޅިގެން އެޗްޕީއެއިން ދެމުން އަންނަ އެވޯޑެކެވެ.
ދުންފަތުގެ އުފެއްދުންތައް ބަންދު ކޮށްފައި ހުންނަ ފޮށީގެ ބޭރުގައި ގްރެފިކް ހެލްތު ވޯނިން ނުވަތަ އިންޒާރުގެ މަންޒަރުތައް މިހާރަށް ވުރެ ގިނަކޮށް، ވަކިން ސިނގިރެޓް ނުވިއްކޭ ގޮތަށް ދުންފަތާ ބެހޭ ގަވާއިދެއް އެކުލަވާލައި ގެޒެޓު ކުރުމަށް މިހާރު ވަނީ ފޮނުވާފައެވެ.