މިޔަންމާގެ ރޮހިންޔާ ދަރިކޮޅުގެ މުސްލިމުންނާ ދެކޮޅަށް އެ ގައުމުގެ ސަރުކާރުން ހިނގަމުންދާ ލާއިންސާނީ ޢަމަލުތަށް އިތުރުވެފައިވާތީ އެކަމާ ދެކޮޅަށް އަޑު އުފުލުމުގެ ގޮތުން ސަރުކާރު ހިންގާ މައިޕާޓީ ޕީޕީއެމްއިން ޖަލްސާއެއް ބާއްވައިފިއެވެ.
ރުމާލު ދޭއް ޖަގަހާގައި މިރޭ ބޭއްވި ޖަލްސާގައި ވަޒީރުންނާއި ރައްޔިތުން މަޖިލީހުގެ މެމްބަރުންގެ އިތުރުން ޕީޕީއެމްއަށް ތާޢީދު ކުރާ ގިނަ ޢަދަދެއްގެ ޢާއްމު ރައްޔިތުން ވަނީ ބައިވެރިވެފައެވެ.
މި ޖަލްސާގައި ވާހަކަދައްކަވަމުން އިސްލާމިކް މިނިސްޓަރ ޑރ. އަޙްމަދު ޒިޔާދު ވިދާޅުވީ އިސްލާމްދީނާ މުސްލިމް އެންމެހާ ލޮބުވެތި އަޚުންނާއި އުޚުތުންނަށްޓަކައި ކުރަންޖެހުނު ކޮންމެ ކަމެއް ކުރުމަށް އަދުގެ ރައީސް ޢަބްދުﷲ ޔާމީން ޢަބްދުލްޤައްޔޫމް ކުރައްވާނެކަން މިއަދު ހާމަވެގެން ގޮސްފައިވާ ކަމަށެވެ. މި ޖަލްސާގައި ރައްޔިތުންގެ މަޖިލީހުގެ ބައެއް މެމްބަރުންވެސް ވާހަކަދައްކަވާފައިވާއިރު ބައެއް މެމްބަރުން ވަނީ މިޔަންމާގެ ލީޑަރުންނާއި ދުނިޔޭގެ އެހެން ބައެއް ގައުމުތަކުގެ ލީޑަރުންނާ އަޅާ ކިޔާފައެވެ.
img:http://s2.psmnews.mv/images/660x400/15046409161706.jpg|މިރޭގެ ޖަލްސާގެތެރެއިން - ފޮޓޯ: ޕީއެސްއެމް
މިޔަންމާގެ ރަކީން ސްޓޭޓްގައި އެގައުމުގެ އަސްކަރިއްޔާ އިން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެން، ވޭތުވެ ދިޔަ 10 ވަރަކަށް ދުވަހުގެ ތެރޭގައި މިޔަންމާ ދޫކޮށް، ބަނގްލަދޭޝަށް ހިޖްރަކުރި ރޮހިންޔާ ދަރިކޮޅުގެ މުސްލިމުންގެ އަދަދު 90،0000 އަށް އަރާފައިވާކަން ފާހަގަކޮށްލެވެއެވެ.