ރާއްޖެއާ ތުރުކީގެ ފޮރިން މިނިސްޓްރީގެ މެދުގައި ގުޅުން ބަދަހިކުރުމާ އެކު މަސައްކަތްކުރުމާބެހޭ ދެ އެއްބަސްވުމެއްގައި ދެޤައުމުގެ ހާރިޖީ ވަޒީރުން ސޮއިކުރައްވައިފިއެވެ.
މިއެއްބަސްވުމުގައި ސޮއިކޮށްފައިވަނީ މިހާރު ރާއްޖޭގެ ހާރިޖީ ވަޒީރު ޑރ. މުހައްމަދު އާސިމް ތުރުކީވިލާތުގެ އަންކާރާއަށް ކުރައްވަމުންގެންދަވާ ދަތުރުފުޅުގެ ތެރެއިން އެޤައުމުގެ ހާރިޖީ ވަޒީރު މެވްލުތް ޝަވުޝޫލޫ ބޭއްވި ބައްދަލްވުމަށްފަހުއެވެ. މިގޮތުން މިއަދު ރާއްޖެއާ ތުރުކީ ވިލާތުގެ ސަރުކާރުން ސޮއިކުރެއްވި އެއްބަސްވުންތަކަކަކީ ޚާރިޖީ ވުޒާރާތަކުން ގުޅިގެން މަސައްކަތްކުރުމާ، އަރުޝީފް ހިއްސާކުރުމުގެ އެބަސްވުމެކެވެ.
މިއެއްބަސްވުންތަކުގައި ސޮއިކުރެއްވުމަށްފަހު ދެޤައުމުގެ ހާރިޖީ ވަޒީރުން ވަނީ ނޫސްވެރިންނާ ބައްދަލްކުރައްވާ، ދެއެއްބަސްވުމުގެ ދަށުން ކުރެއްވުމަށް ހަމަޖެހިފައިވާ މަސައްކަތުގެ މައްޗަށް އަލިއަޅުވާލައްވާ ވާހަކަދައްކަވާފައެވެ. އަދި މިދެއެއްބަސްވުމުގެ ސަބަބުން ދެޤައުމުގެ މެދުގައި އޮތް ދާހިލީ ގުޅުން އިތުރަށް ފުޅާވެގެންދާނެކަމަށް ޚާރިޖީ ވަޒީރުންވަނީ ވިދާޅުވެފައެވެ.
މިއަދު ތުރުކީވިލާތާ ރާއްޖެއިން ސޮއިކުރި ހާރިޖީ ވުޒާރާތަކުގެ ގުޅުން ބަދަހިކުރުމުގެ އެއްބަސްވުމުގެ ދަށުން ދެޤައުމުގެ މެދުގައި އޮތް ދޭދޭ ގުޅުމާ، ހާރިޖީ ގުޅުން އަދި އެހެން ދާއިރާތަކުންވެސް ގުޅުން ބަދަހިވެ، ދެޤައުމުގެ މެދުގައި މައުލޫމާތު ބަދަލްކުރުމާ، ކަންކަން ހިއްސާކުރުމަށް މަގުފަހިވެގެންދާނެއެވެ. އަދި އަރްޝީފް ހިއްސާކުރުމުގެ އެއްބަސްވުމުގެ ދަށުން ދެޤައުމުގެ މުއައްސަސާތައް ހަރުދަނާ ކުރުމަށް މަޤުފަހިވެގެންދާނެއެވެ.
މީގެ އިތުރުން ރަސްމީ ދަތުރުފުޅެއްގައި މިހާރު ތުރުކީއަށް ވަޑައިގެން އުޅުއްވާ ރާއްޖޭގ ޚާރިޖީ ވަޒީރު ޑރ. މުހައްމަދު އާސިމް އެޤައުމުގެ ޚާރިޖީ ވަޒީރު މެވްލުތް ޝަވަޝޫލޫގެ އަރިހަށް އިޙްތިރާމްގެކުރައްވާފައެވެ.
މިއަދު ހެނދުނު ތުރުކީގެ އަންކާރާގައި ބޭއްވެވި ބައްދަލުކުރެއްވުމުގައި ދެ ބޭފުޅުންވަނީ ވިޔަފާރިއާއި އިޤްތިޞާދުގެ އިތުރުން ފަތުރުވެރިކަމާއި އިންސާނީ ވަޞީލަތް ހަރުދަނާކުރުމާއި ގުޅޭގޮތުން މުހިއްމު މަޝްވަރާތަކެއް ކުރައްވާފައެވެ.
މީގެ އިތުރުން ދެޤައުމުގެ ދެމެދުގައި ޤާއިމުވެފައިވާ ގާތް ގުޅުން އިތުރަށް ހަރުދަނާ ކުރުމާއި ގުލޭގޮތުންވެސް މަޝްވަރާތައް ކުރައްވާފައިވެއެވެ. މި ބައްދަލުކުރެއްވުމުގައި ޑރ.އާސިމް ވަނީ ތުރުކީން ރާއްޖެއަށް އެކި ދާއިރާތަކުން ވެދެއްވަމުން ގެންދަވާ އެހީތެރިކަން ފާހަގަކުރައްވާ އެ ޤައުމުގެ ސަރުކާރަށް ޝުކުރު އަދާކުރައްވާފައެވެ.
އަދި ޚާއްސަކޮށް ސަރުކާރުގެ އޮފިޝަލުން ތަމްރީމުކުރުމާއި ފުލުހުންގެ މުއައްސަސާ ހަރުދަނާ ކުރުމަށް ތަފާތު ތަމްރީނު ޕްރޮގްރާމްތައް ރާވާ ކުރިއަށް ގެންދިޔުމުގައި ވެދެއްވާ އެހީތެރިކަމަށް ވަނީ ޝުކުރު އަދާކުރައްވާފައެވެ. މީގެ އިތުރުން ބައިނަލް އަޤުވާމީ މައިދާނުގައި، ޚާއްސަކޮށް އަ.ދ އާއި އޯ.އައި،ސީ ގައި ދެޤައުމުން ގުޅިގެން މަސައްކަތް ކުރުމަށް ދެ ބޭފުޅުންވަނީ އެއްބަސްވެ ވަޑައިގެންފައެވެ.
މި ފުރުސަތުގައި ޑރ.އާސިމް ވަނީ ތުރުކީން ބައިނަލް އަޤުވާމީ މައިދާނުގައި، ވަކިން ޚާއްސަކޮށް މުސްލިމުންނަށް ދިމާވެފައިވާ މައްސަލަތައް ހައްލުކުރުމުގައި އަދާކުރައްވަމުންދާ އިސް ރޯލަށް ތައުރީފުކުރައްވާ މިކަމަށް ޝުކުރު އަދާކުރައްވާފައެވެ.