އިންޑިއާ ކަނޑުގެ 15 ޤައުމަކުން ބައިވެރިވާ، އިންޑިއަން އޯޝަން މެމޮރެންޑަމް އޮފް އަންޑަސްޓްޑޭންޑިންގ، އައިއޯއެމްއޯޔޫގެ 20ވަނަ ކޮމިޓީ ބައްދަލުވުން ރާއްޖޭގައި ފަށައިފިއެވެ.
އައިއޯއެމްއޯޔޫއަކީ އިންޑިއާ ކަނޑުގެ ސަލާމަތާއި ރައްކާތެރިކަން ޕްރޮމޯޓްކޮށް، ޤައުމީ ބަނދަރުތަކަށް އަންނަ ބޯޓު ފަހަރުގެ ސަލާމަތާއި ރައްކާތެރިކަން ކަށަވަރުކޮށްދިނުމަށް ޤައިމްކޮށްފައިވާ ބައިނަލްއަޤްވާމީ ޖަމިއްޔާއެކެވެ.
ޕެރަޑައިސް އައިލެންޑް ރިސޯޓުގައި މިމަހުގެ 20 ވަނަ ދުވަހުން 24 ވަނަ ދުވަހަށް ކުރިއަށްދާ އިންޑިއަން އޯޝަން މެމޮރެންޑަމް އޮފް އަންޑަސްޓްޑޭންޑިންގ، އައިއޯއެމްއޯޔޫގެ 20 ވަނަ ބައްދަލުވުމުގައި އެ ޖަމިއްޔާގެ މެމްބަރު އަށާރަ ޤައުމުގެ ތެރެއިން ފަނަރަ ޤައުމަކުން ބައިވެރިވެފައިވެއެވެ.
މި ބައްދަލުވުން ފެށުމުގެ ރަސްމިއްޔާތު ޝަރަފްވެރިކޮށްދެއްވާ މިނިސްޓަރ އޮފް ސްޓޭޓް ފޮރ އިކޮނޮމިކް ޑިވެލޮޕްމަންޓް ޢަބްދުލްލަތީފް މުޙައްމަދު ވަނީ ރާއްޖެއަށް އައިއޯއެމްއޯޔޫގެ މުޙިއްމުކަން ފާހަގަކުރައްވާފައެވެ. އެގޮތުން މިފަދަ ޖަމިއްޔާއެއްގެ ސަބަބުން ރާއްޖެއަށް ކަނޑުމަގުން ގެންނަ މުދާ ގެންނަ ބޯޓު ފަހަރުތަކަށް ކަނޑުތަކުގައި ރައްކާތެރިކަން ލިބިގެންދާކަން ލަތީފް ފާހަގަކުރެއްވިއެވެ.
ޑެޕިއުޓީ ޑިރެކްޓަރ ޖެނެރަލް ޢަބްދުއްނާޞިރު މުޙައްމަދު ވިދާޅުވީ މި ބައްދަލުވުމުގައި ކަނޑުތަކާ ގުޅުންހުރި ޤަވާޢިދުތަކާ ގުޅޭގޮތުން މަޝްވަރާކުރުމަށް ހަމަޖެހިފައިވާ ކަމަށާ، އޭގެތެރެއިން އާގު ބޯޓުތަކާއި ގުޅޭގޮތުން އެންމެ ފަހުން ތަޢާރަފްކޮށްފައިވާ ޤަވާއިދުތަކާއި ގުޅޭގޮތުން މަޢުލޫމާތު ބަދަލުކޮށް ހެދުމަށް ހަމަޖެހިފައިވާ ކަމަށެވެ.
އައިއޯއެމްއޯޔޫގެ މެމްބަރު ޤައުމަކަށް ރާއްޖެ ވެފައިވަނީ ދެހާސްތިން ވަނަ އަހަރުއެވެ. އަހަރަކު އެއްފަހަރު އައިއޯއެމްއޯޔޫގެ ކޮމިޓީ ބައްދަލުވުން ބާއްވާއިރު 2005 ވަނަ އަހަރުގެ އައިއޯއެމްއޯޔޫގެ ކޮމިޓީ ބައްދަލުވުންވެސް ބާއްވާފައި ވަނީ ރާއްޖޭގައެވެ.