ސިޔާސީ ޕާޓީއެއްގެ ޓިކެޓްގައި އިންތިޚާބުވެފައިވާ މީހަކު ޕާޓީން ވަކިކުރި ނަމަވެސް، އިންތިޚާބުވި މަޤާމުގައި ދެމި ހުންނާނެކަމަށް، ސިޔާސީ ޕާޓީގެ ޤާނޫނުގައިބުނާ މާއްދާ ބާޠިލުކުރުމަށް ދައުލަތުން ސުޕްރީމް ކޯޓްގައި އެދިއްޖެއެވެ.
ރައްޔިތުންގެ މަޖިލީހުގެ މެމްބަރުކަމުން ވަކިވެއްޖެކަމަށް ކަނޑައަޅާފައިވާ ގއ.ވިލިނގިލީ އަޅިވިލާގޭ ސަޢުދު ޙުސެއިންގެ ފަރާތުން ސުޕްރީމް ކޯޓަށްހުށަހެޅި ދުސްތޫރީ މައްސަލައިގެ މިއަދު އޮތް އަޑުއެހުމުގައި ދައުލަތުގެ ވަކީލް ވިދާޅުވީ، ޕާޓީން ވަކިކުރިނަމަވެސް އިންތިޚާބުވި މަޤާމުގައި ދެމިހުންނާނެ ކަމަށްބުނާ ސިޔާސީ ޕާޓީގެ ޤާނޫނުގެ 16ވަނަ މާއްދާގެ (ބ)އަކީ ސުޕްރީމް ކޯޓުން ޖުލައި 13 ވަނަ ދުވަހުކުރި ޙުކުމާ ތަޢާރަޒްވާ މާއްދާއެއްކަމަށެވެ.
އެހެންކަމުން އެމާއްދާއަކީ ބާޠިލް މާއްދާއެއްގެ ގޮތުގައި ކަނޑައަޅައިދިނުމަށް އެދޭކަމަށް ދައުލަތުގެ ވަކީލާ ވިދާޅުވިއެވެ. ސިޔާސީ ޕާޓީތަކުގެ ގާނޫނުގެ 16 ވަނަ މާއްދާގެ (ބ)ގައި ވަނީ ޤާނޫނުއަސާސީއާއި ޤާނޫނުގައިވާގޮތުގެ މަތިން ދިވެހިރާއްޖޭގައި ބާއްވާ އިންތިޚާބެއްގައި ސިޔާސީ ޕާޓީއެއްގެ ޓިކެޓުގައި އިންތިޚާބުވެފައިވާ މީހަކު ޕާޓީގެ ސުލޫކީ މިންގަނޑާ ޚިލާފުވެގެން ޕާޓީން ވަކިކުރި ކަމުގައި ވިޔަސް އެމީހަކު އިންތިޚާބުވެފައިވާ މަޤާމުގައި ދެމި ހުންނާނެކަމަށެވެ. އެހެންނަމަވެސް ޖުލައި 13 ވަނަ ދުވަހު ސުޕްރީމް ކޯޓުންކުރި ޙުކުމްގައިވަނީ، އިންތިޚާބުވި ޕާޓީން ވަކިކޮށްފިނަމަ ރައްޔިތުންގެ މަޖިލީހުގެ މެމްބަރުކަމުން ވަކިވާނެކަމަށެވެ.
މިއަދުއޮތް ޝަރީޢަތުގެ އަޑުއެހުމުގައި ސަޢުދު ޙުސެއިންގެ ޤާނޫނީވަކީލު ވަނީ ސަޢުދު ޕީޕީއެމުން ވަކި ކޮށްފައިވަނީ ސުޕްރީމް ކޯޓްގެ ޙުކުމުގެ ކުރިން ކަމަށް ބުނާ ބުނުން ތަކުރާރުކޮށްފައެވެ. އެހެންނަމަވެސް ދައުލަތުގެ ވަކީލުން ބުނީ އޭނާ ވަކިކުރިކަން ޕީޕީއެމުން އަންގާފައިވަނީ 18 ޖުލައި 2017 ގައި ކަމުން އޭނާ މެމްބަރުކަމުން ވަކިވެފައިވާކަމަށް ކަނޑައަޅާފައިވަނީ ރަނގަޅަށްކަމަށެވެ.