އަންނަމަހުގެ ނިޔަލާ ހަމައަށް ރާއްޖޭގައި މަރުގެ ޙުކުމް ތަންފީޒްކުރުމުގެ ހުރިހާ އިންތިޒާމްތަކެއް ނިމޭނެކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ އެމަނިކުފާނުގެ ޕާޓީގެ ރަސްމިއްޔާތެއްގައި ވާހަކަފުޅު ދައްކަވަމުންނެވެ. ރައީސް ވިދާޅުވީ، ރާއްޖޭގައި މަރުގެ ޙުކުމް ތަންފީޒްކުރުމުގެ ހުރިހާ އިންތިޒާމްތަކެއް އަންނަމަހުގެ ނިޔަލަށް ނިމޭނެކަމަށް ހޯމް މިނިސްޓަރ ޔަޤީންކަން ދެއްވާފައިވާކަމުގައެވެ. ތަނެއް ތައްޔާރުކޮށް އެތަނަށް ބޭނުންވާ ވަޞީލަތްތައް ހަމަކޮށް އަންނަ މަހުގެ ތެރޭގައި ނިމެނޭކަމަށް ރައީސް ވިދާޅުވިއެވެ. އެހިސާބަށް ދާންވާއިރަށް މަރުގެ ޙުކުމް ތަންފީޒްކުރެވޭ މިންވަރަށް ސުޕްރީމް ކޯޓުން ނިންމައި އަދި އިސްލާމީ ކައުންސިލިންއާއި ވާރިސުންގެ ބަހާއި އެނޫންވެސް ކަންކަން އެކަން ކުރަންޖެހިއްޖެ ބައެއްގެ މައްޗަށް އެކަންކުރެވޭވަރަށް ނިޒާމްތައް ހަމަޖެހިގެންދާނެކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ވިދާޅުވިއެވެ.
ރާއްޖޭގައި މަރުގެ ޙުކުމް ތަންފީޒްކުރުމާމެދު ބަޔަކު ސުވާލު އުފެއްދިނަމަވެސް، އެމަނިކުފާނުގެ ޒަޢާމަތުގައި އެކަން ކުރައްވާނެކަމުގެ ޔަޤީންކަން ރައީސް ޔާމީން އެތައްފަހަރަކު ރައްޔިތުންނަށް ވަނީ ދެއްވާފައެވެ. މަރުގެ ޙުކުމް ރާއްޖޭގައި ތަންފީޒް ކުރައްވަނީ މުޅި މުޖުތަމައުގެ މަސްލަޙަތަށް ކަމަށާއި، މަޢުސޫމް ދިވެހި މުޖުތަމަޢު ޚަރާބުވެގެންދާން ބޭނުންފުޅު ނުވާތީކަމަށް ރައީސް ވިދާޅުވެފައިވެއެވެ.