ހައިކޯޓްގެ ފަނޑިޔާރަކު އަވަހާރަކޮށްލަން ރޭވިކަމުގެ ތުހުމަތުގައި ރައްޔިތުންގެ މަޖިލީހުގެ ވިލިނގިލީ ދާއިރާގެ ކުރީގެ މެމްބަރު ސަޢުދު ޙުސެއިންގެ މައްޗަށް ޓެރަރިޒަމްގެ ދަޢުވާ އުފުލައިފިއެވެ.
ސަޢުދު ޙުސެއިންގެ މައްޗަށް ޓެރަރިޒަމްގެ ދަޢުވާ އުފުލާފައިވާއިރު، އޭނާ މިވަގުތު ހުރީ ފުލުހުންގެ ބެލުމުގެ ދަށުގައެވެ. އޭނާ ހޯދުމަށް މިދިޔަ ހަފްތާގެ ތެރޭގައި ފުލުހުން އިޢުލާނުކުރުމުން، އޭނާ ވަނީ ފުލުހުންގެ އިދާރާއަށް ޙާޟިރުވެފައެވެ. އަދި ކޯޓުންވަނީ އޭނާގެ ބަންދަށް 15 ދުވަސް އިތުރުކޮށްދީފައެވެ.
ސައުދު ޙުސެއިންގެ އިތުރުން އެޑިއުކޭޝަން މިނިސްޓްރީގެ ކުރީގެ ސީނިއާ ޕޮލިސީ އެގްޒެކެޓިވް ހަނީފުގެ މައްޗަށްވެސް ފަނޑިޔާރަކު އަވާހަރަކޮށްލަން ރޭވި ކަމުގެ ތުހުމަތުގައި ވަނީ ޓެރަރިޒަމްގެ ދައުވާ އުފުލާފައެވެ.
ހައިކޯޓްގެ ފަނޑިޔާރަކަށް ބިރުދައްކައި، އަވަހާރަކޮށްލަން ރޭވި މައްސަލަ ފުލުހުން ތަޙްޤީޤް ކުރަންފަށާފައިވަނީ މިއަހަރުގެ ކުރީކޮޅުގައެވެ. އަދި މިމައްސަލައާ ސައުދު ޙުސެއިންއާ ގުޅުންވާކަމަށް ސޯޝަލް މީޑިއާގައި ކުރިންވެސް އަޑު ފެތުރިފައިވެއެވެ.