އަލް ހާފިޒް އަޙްމަދު ނަބީޙުގެ ފުރަތަމަ އަމިއްލަ މަދަހަ ސީޑީ "އަޅުގަނޑުގެ ދަތުރު" ނެރެފިއެވެ. 6 މަދަހަ އެކުލެވޭ މި ސީޑީގެ ކޮޕީއެއް ވަނީ ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހީމަށް އަރުވާފައެވެ.
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމްގެ އަނބިކަނބަލުންނަށް މިސީޑީ އެރުއްވީ މެޑަމް ފާތުމަތު އިބްރާހީމަކީ ނުކުޅެދުންތެރިކަން ހުންނަ ކުދިންގެ ޙައްޤުގައި މަސައްކަތްކުރާ ކަނބަލަކަށްވާތީއާއި އެކަމަނާގެ ދީލަތި އެހީ އެފަދަ ގިނަ ކުދިންނަށް ލިބޭތީކަމަށް ނަބީހުގެ މަންމަ ބުންޏެވެ.
އަލް ހާފިޒް އަޙްމަދު ނަބީހުގެ އެންމެ ފުރަތަމަ މަދަހަ ސީޑީ "އަޅުގަނޑުގެ ދަތުރު" ގައި ހިމެނޭ 6 މަދަހައިގެ ތެރެއިން އެއް މަދަހައަކީ އަމިއްލަ ރާގާއި ޅެން އެކުލެވޭ މަދަހައެކެވެ. ދެން ހިމެނޭ ފަސް މަދަހަ ނަބީހު ކިޔާފައިވާ އެކި ބޭފުޅުންގެ މަދަހަތަކެވެ. ނަބީހުގެ އަޑުން ކިޔާފައިވާ މަދަހަ ސީޑީއެއް ނެރުމުގެ އެންމެ ބޮޑު ބޭނުމަކީ ނުކުޅެދުންތެރިކަން ހުންނަ ކުދިންގެ ހުނަރު ތަރައްޤީކޮށް މިފަދަ އެހެން ކުދިންވެސް ހޭލުންތެރިކުރުވުމެވެ. ނަބީހު ކިޔައިދިން ގޮތުގައި މަދަހަ ސީޑީގެ މަސައްކަތަކީ ދެތިން މަސްދުވަހުގެ މަސައްކަތެވެ. ނަބީހުއަށް ލިޔަން ކިޔަން އެނގޭތީ މަދަހަތައް ދަސްކުރަން ވަރަށް ފަސޭހަވިކަމަށް ނަބީހު ބުންޏެވެ.
މި މަދަހަ ސީޑީއަށް "އަޅުގަނޑުގެ ދަތުރު" މިނަން ކިޔުނު ގޮތާމެދު ވާހަކަ ދައްކަމުން ނަބީހުގެ މަންމަ ބުނީ މިއީ ނުކުޅެދުންތެރިކަން ހުންނަ ދަރިފުޅު ގޮވައިގެން ކުރި ވަރަށް ބުރަ ބަނަ ދަތުރެއްކަމަށެވެ. އަދި ހިތްވަރަކާއެކު ކުރި މަސައްކަތުން ދަތުރު އަލިވެގެން ދިޔައީކަމަށް ނަބީހުގެ މަންމަ ބުންޏެވެ. ނަބީހުގެ މަންމަ ބުނީ، ހިތްވަރާއެކު ކުރާ ކޮންމެ މަސައްކަތަކީވެސް ކާމިޔާބު މަސައްކަތެއްކަމަށާއި، ކޮންމެ ކަމަކަށް އެކުއްޖެއްގެ މަންމައާއި ބައްޕަގެ ހެޔޮ ދުޢާ ބޭނުންވާކަމަށެވެ.
ނަބީހުގެ މަންމަ ކިޔައިދިން ގޮތުގައި މަދަހަ ދަސްކުރުމަށާއި ރެކޯޑްކުރުމަށް އެންމެ ފަސޭހަވީ ނަބީހުއަކީ ތޫނުފިލި، ލިޔަންކިޔަން ދަންނަ ކުއްޖަކަށްވީތީކަމަށެވެ. މިކަމުގައި ނަބީހުއަށް ސްޕީޗްތެރަޕީ ދެއްވާ ޑރ.ފަރުޒާނާ ޝައުޤީއާއި އޭނާގެ އާޢިލާ މި މަދަހަ ސީޑީ ނެރުމުގައި ވެދެއްވި އެހީ ނަބީހުއާއި މަންމަ ބަލައިގަންނަނީ ޝުކުރުވެރިކަމާއެކުއެވެ. ޖުމްލަކޮށް މިކަމުގައި އެހީތެރިވެދިން ހުރިހާ ފަރާތްތަކަށް ޝުކުރު އަދާކުރިއެވެ.
އިސްލާމިކް ޔުނިވާރސިޓީގެ ޗާންސެލަރ ޑރ.މުޙައްމަދު ޝަހީމް ޢަލީ ސަޢީދު ދެއްވި ހިތްވަރަކީ ނަބީހު ފަދަ ކުއްޖަކު ގޮވައިގެން ކުރިއަށް ދިއުމަށް ލިބުނު އެންމެ ބޮޑު ހިތްވަރުކަމަށާއި، އެފަދަ ދީނީ ޢިލްމުވެރިންގެ ހިތްވަރަކީ މިކަމުގައި ތެދުވުމަށް ލިބުނު އިތުރު ފަސޭހައެއްކަމަށް ނަބީހުގެ މަންމަ ސިފަކުރިއެވެ.
ނަބީހުގެ މަސައްކަތް ފެނި މިފަދަ އިތުރު ކުދިން ގޭގައި ތިބުމުގެ ބަދަލުގައި މުޖުތަމަޢުއަށް ނެރެ އެކުދިންގެ މަސައްކަތް ފެންނަން ފަށާފައިވާކަން ފާހަގަކޮށް އެކަމާ ނަބީހު މަންމަ އުފާކުރެއެވެ.
ނަބީހުގެ މަދަހަ ސީޑީއަކީ ވިޔަފާރީގެ އުސޫލުން ނެރުނު އެއްޗެއް ނޫންކަމަށާއި މިއީ މިފަދަ ކުދިންނަށް ހިތްވަރު ދިނުމަށް ނެރުނު ސީޑީއެއްކަމަށް ނަބީހުގެ މަންމަ ބުންޏެވެ. އަދި ނަބީހުގެ މަދަހަ ސީޑީ ބަހަން ނިންމާފައިވާކަމަށްވެސް ބުންޏެވެ.