މިރޯދަމަހު މަޤްބޫލު އުޒުރެއްނެތި ތަކެތީގެ އަގު ބޮޑުކުރާ ފަރާތްތަކާއިމެދު ފިޔަވަޅު އަޅުއްވާނޭކަމަށް އިކޮނޮމިކް މިނިސްޓްރީން ހާމަކުރައްވައިފިއެވެ.
އިކޮނޮމިކް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑެޕިއުޓީ އިކޮނޮމިކް މިނިސްޓަރ އަބްދުﷲ މުހައްމަދު ވިދާޅުވީ، އެ މިނިސްޓްރީން ރޯދަމަހު ބާޒާރުގެ އަގުތައް މޮނިޓަރކުރައްވަމުން ގެންދަވާނޭކަމަށެވެ. އަދި މިނިސްޓްރީން ވިޔަފާރިވެރިންނާއި ބައްދަލުކޮށް ބާޒާރުގެ އަގުތަކާއި ބެހޭގޮތުން މައުލޫމާތު ބަދަލުކޮށްފައިވާކަމަށްވެސް ޑެޕިއުޓީ މިނިސްޓަރ ވިދާޅުވިއެވެ. މިގޮތުން ވިޔަފާރިވެރިން ވަނީ، ޤުދުރަތީ ކާރިސާއެއް، ނުވަތަ ރާއްޖެއިން ބޭރުން މުދާ ގަންނަން ލިބޭ އަގުތައް ބޮޑުވެގެން ނޫންގޮތަކަށް ރަމަޟާންމަހު ބާޒާރުގައި ތަކެތީގެ އަގު މައްޗަށް ނުދާނޭކަމުގެ ޔަގީންކަން ދީފައެވެ.
އަބްދުﷲ ވިދާޅުވީ، ޑިމާންޑް ބޮޑުވެ، މުދާ މަދުވުމުގެ ސަބަބުން އަގުތައް ބޮޑުކުރާނަމަ، އެފަދަ ފަރާތްތަކާއިމެދު ފިޔަވަޅު އަޅުއްވާނޭކަމަށެވެ. އިކޮނޮމިކް މިނިސްޓްރީން ވަނީ، މުދަލުގެ އަގުތައް ބޮޑުކުރާ ފަރާތްތަކުގެ މައުލޫމާތު އެމިނިސްޓްރީއާ ހިއްސާކުރެއްވުމަށް އާއްމުނަށް އިލްތިމާސްކުރައްވާފައެވެ.