ނަރުހުންގެ އިންސާނީ ޚިދުމަތަކީ އިސްލާމްދީނުގައި އޭގެ އަގުވަޒަންކުރާ ޚިދުމަތެއް ކަމަށް މިއަދުގެ ހުކުރު ޚުތުބާގައި ބަޔާންކުރައްވައިފިއެވެ.
ބަލިމަޑުކަމަކީ މީސްތަކުންނަށް މާތްﷲ ކުރިމަތިކުރައްވާ އިމްތިޙާނެއް ކަމަށާއި ބައްޔެއް ވެއްޖެނަމަ ބޭސްފަރުވާކުރުމަށް މިއަދުގެ ހުކުރު ޚުތުބާގައި ވަނީ ބާރުއަޅުއްވާފައެވެ. ބައްޔެއް ފެތުރެމުންދާނަމަ އެ ބައްޔަކުން ރައްކާތެރިވުމަށް ބޭނުންވާ ވެކްސިނާއި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އަޅަންޖެހޭ ކަމަށް ޚުތުބާގައި ވަނީ ވިދާޅުވެފައެވެ.
މިއަދުގެ ޚުތުބާ އަމާޒުކުރައްވާފައިވަނީ ނަރުހުންގެ ޚިދުމަތާއި ޢާންމު ސިއްޙަތުގެ މައްޗަށެވެ. އެގޮތުން ބަލިވެއްޖެނަމަ ބާސްފަރުވާ ކުރުމަށް އިސްލާމްދީން ބާރުއަޅާ ކަމަށް ޚުތުބާގައި ފާހަގަކުރައްވާފައިވެއެވެ. އަދި ބޭސްފަރުވާ ކޮށްދޭ ހޮސްޕިޓަލްތަކާއި ސިއްޙީ މަރުކަޒުތަކާއި ކްލިނިކްތަކުގައި މަސައްކަތްކުރާ ނަރުހުންގެ އިންސާނީ ޚިދުމަތް އިސްލާމްދީނުގައި އަގުވަޒަން ކުރާކަމަށް ޚުތުބާގައިވެއެވެ.
މިޒަމާނުގައި ނަރުހުންގެ ދުވަހެއް ފާހަގަކޮށް އެމީހުންގެ ޚިދުމަތުގެ އަގު ބަލައިގަތުމުގެ މާކުރީން ރަސޫލާ ސައްލަﷲ އަލައިހިވަސައްލަމް ވަނީ އެ ޚިދުމަތުގެ އަގުބަލައިގަނެފައިވާކަން ޚުތުބާގައި ފާހަގަކުރައްވާފައިވެއެވެ.
އަދި މުސްލިމުންގެ ތެރޭގައި އިންސާނީ މިފަދަ ޚިދްމަތްތައް ކުރެއްވި އެތައް ސަޙާބިއްޔާތުން ތިއްބެވި ކަމަށާއި އެ ފަދަ ސަޙާބީ ބޭކަނބަލުންގެ ކިބައިން މިއަދުގެ ނަރުހުން ނަމޫނާ ލިބިގަތުމަށް ވަނީ އިރުޝާދު ދެއްވާފައެވެ.
"އެކަލޭގެފާނުގެ ބައެއް ޞަޙާބިއްޔާތުންނަކީ އެކަލޭގެފާނުގެ ޖިހާދުގެ ޙަރަކާތްތަކަށް ވާގިވެރިވެ ވަޑައިގަތުމުގެ ގޮތުން އަގުހުރި ޚިދުމަތްތަކެއް ކުރައްވާފައިވާ ކަނބަލުންތަކެކެވެ. މުޖާހިދުންގެ ތެރެއިން ހަނގުރާމައިގެ މައިދާނުގައި ޒަޚަމްވާ މީހުންގެ ބޭސްއަޅައިދިނުމަށާއި، ޒަޚަމްތަކުގައި ބޭސްއަޅައިދިނުމަށާއި، ޒަޚަމްތަކުން އޮހޮރެމުންދާ ލޭމަނާކުރުމުގެ މަސައްކަތްކުރުމަށާއި، މުޖާހިދުންނަށް ކެއުންބުއިން ތައްޔާރުކޮށް އިންސާނީ ޚިދުމަތްތައް ދިނުމަށްޓަކައި އެކަނބަލުންނަށް ބޭނުންވިހިނދު ރަސޫލާ ސައްލަﷲ އަލައިހިވަސައްލަމް ވަނީ ކަނބަލުން ހަނގުރާމަތަކުގައި ބައިވެރިކުރައްވާފައި"
އާންމު ސިއްޙަތު ދުޅަހެޔޮކަންމަތީ ދެމެހެއްޓުމަށްޓަކައި ވެށީގެ ސާފުތާހިރުކަން ދެމެހެއްޓުމަށް ވެސް މިއަދުގެ ޚުތުބާގައި ވަނީ ގޮވާލައްވާފައެވެ. އެގޮތުން މަގުމަތި ސާފުކޮށް ބޭއްވުމަށާއި މަގުމައްޗަށް ކުނި ނޭޅުމަކީ އިސްލާމްދީން ބާރުއަޅާކަމެއްކަން ފާހަގަކުރައްވާފައިވެއެވެ.
"މުސްލިމް އަޚުންނޭވެ! ސާފުތާހިރުކަމަކީ އެހެން އިޖުތިމާޢީ އަގުތައްފަދަ އަގެއް. ސްކޫލެއް. ރިވެތި އަދަބެއް. ފައިސާއާއި ތަނަވަސްކަމެއް ނެތޭ ބުނެފައި ސާފުތާހިރުކަމާއި ދުރަށް ދެވޭކަށްނެތް. އަޅަމެންގެ ތެރެއިން ކޮންމެ މީހަކު އެމީހެއްގެ މަސްއޫލިއްޔަތު މިކަމުގައި އަދާކޮށްފިނަމަ ރާއްޖޭގެ ރަށްތައް ރީތި ސާފު ރަށްތަކަކަށް ވެގެންދާނެ."
މުސްލިމުންގެ ތެރޭގައި ހޮސްޕިޓަލްތައް އުފެދިގެން އައިގޮތާއި ބޭސްފަރުވާ އަށް ދިން އަހައްމިޔަތަށް މިއަދުގެ ޚުތުބާގައި ވަނީ އަލިއަޅުވާލާފައެވެ.