ތެލެސީމިއާ ކުދިންނަށް ބޭނުންވާ ބޭސް، ރާއްޖޭގެ ހުރިހާ އަތޮޅަކުންވެސް މިހާރު ލިބޭނެކަމަށް ހެލްތު މިނިސްޓަރ ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ.
ހެލްތު މިނިސްޓަރ މިހެން ވިދާޅުވީ، ބައިނަލްއަޤްވާމީ ތެލެސީމިއާ ކުދިންގެ ދުވަސް ފާހަގަކުރެއްވުމަށް މޯލްޑިވްސް ބްލަޑް ސަރވިސްއިން ބޭއްވެވި ޚާއްޞަ ރަސްމިއްޔާތު ޝަރަފްވެރިކޮށްދެއްވާ ވާހަކަފުޅުދައްކަވަމުންނެވެ. މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ވިދާޅުވީ، ތެލެސީމިއާއަށް މީހުން ހޭލުންތެރިކުރުވުމަށްޓަކައި ސަރުކާރުން ގިނަ މަސައްކަތްތަކެއް ކުރައްވާ ކަމަށާއި އެކުދިންނަށް ލުއިފަސޭހަކަން ހޯއްދަވައިދެއްވުމަށްވެސް ސަރުކާރުން މަސައްކަތްކުރައްވާކަމަށެވެ.
"އަޅުގަނޑުމެންގެ މެނިފެސްޓޯގެ ތެރޭގައި ހިމެނޭ ތެލަސީމިއާ ކުދިންނާގުޅޭ ވަޢުދުތައް އަޅުގަނޑުމެން މިދަނީ ތަންފީޒުކުރަމުން. އެގޮތުން އަތޮޅުތަކުގައި ބޭސްފަރުވާގެ ޚިދުމަތް ލިބެމުން ދިއުމާއި، އަތޮޅުތަކުގައި ތެލަސީމިއާ ސްކްރީން ކުރެވުމާއި، ސަރުކާރުގެ ކުންފުނިތައް މެދުވެރިކޮށް ތެލަސީމިއާ ކުދިންނަށް ލޭ ހަދިޔާ ކުރުމުގެ އިންތިޒާމް މިވަނީ ހަމަޖެހިފައި." މިނިސްޓަރ ވިދާޅުވިއެވެ.
img:http://s1.psmnews.mv/images/660x400/14942565706572.jpg|ތެލެސީމިއާ ދުވަހާއި ގުޅިގެން ބޭއްވި ޚާއްސަ ރަސްމިއްޔާތުގެ ތެރެއިން / ފޮޓޯ: ހެލްތު މިނިސްޓްރީ
މިރަސްމިއްޔާތުގައި ވާހަކަދައްކަވަމުން މޯލްޑިވްސް ތެލަސީމިއާ ސޮސައިޓީގެ އެކްސްކޯ މެމްބަރ ޝިފްނީޒާ ޝާކިރު ވިދާޅުވީ ތެލަސީމިއާ ކުދިންގެ ބޭސްފަރުވާގެ ކަންކަން ހަމަޖެހުމުގެ އިތުރުން އެ ބޭސްތައް ބޭނުންކުރާނެ ގޮތްތަކާމެދު އެކުދިން ހޭލުންތެރި ކުރުމަކީވެސް މުހިންމު ކަމެއްކަމަށެވެ. އަދި އެކުދިންނަށް ބޭނުންވާ ބައެއް ޓެސްޓުތައް ރާއްޖޭގައި ހެދޭނެ އިންތިޒާމް ހަމަޖެއްސެވުމަކީ މުހިންމު ކަމެއްކަން ޝިފްނީޒާ ފާހަގަކުރެއްވިއެވެ.
ތެލަސީމިއާ ކުދިންނަށް މި މަހުގެ ފަސްވަނަ ދުވަހު ބޭއްވެވި" ރެސްކިޔު" ވޯރކްޝޮޕް ގެ ބައިވެރިންނަށް މި ރަސްމިއްޔާތުގައި ހަނދާނީ ލިޔުންދެއްވިއެވެ. އަދި މި ދުވަސް ފާހަގަކުރުމަށް ޚާއްޞަ ކޭކެއްވެސް ވަނީ ފަޅާފައެވެ.