ސަރުކާރު ހިންގާ ޕާޓީ ޕީޕީއެމްއާ މުޅިން އަލަށް 500 މެންބަރުން ގުޅިއްޖެއެވެ. އެމެންބަރުންގެ މެނަބަރޝިޕް ފޯމްތަކާއި ހަވާލުވެވަޑައިގަތީ ޕީ.ޕީ.އެމް.ގެ މުސްތަޝާރު އަދި ރައީސުލްޖުމްހޫރިއްޔާ ޢަބްދުﷲ ޔާމީން އަބްދުލްޤައްޔޫމްއެވެ.
ސަރުކާރު ހިންގާ މައި ޕާޓީ ޕްރޮގްރެސިވް ޕާޓީ އޮފް މޯލްޑިވްސް ޕީ.ޕީ.އެމްއާ އަލަށްގުޅުނު މެންބަރުންގެ ފޯމް އެޕާޓީގެ މުސްތަޝާރަށް އެރުވުމަށް ސްޓެލްކޯގައި ބޭއްވި ރަސްމިއްޔާތުގައި، މާލެއިން އަލަށް އެޕާޓީއާ ގުޅުނު 200 މެންބަރުންނާއި، ރާއްޖޭގެ އެހެން ބައެއް ސަރަހައްދުތަކުން ގުޅުނު ތިންސަތޭކަ މެންބަރުންގެ ފޯނުވަނީ މުސްތަޝާރަށް އަރުވާފައެވެ.
މިރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ، މީގެ ކުރިން އިންތިޚާބުތަކާއި ދިމާކޮށް ސަރުކާރުގެ އިސްވެރިންނާއި، ޕާޓީތަކުގެ އެކި ގިންތިތަކުގެ މީހުން ރަށްރަށް ދަތުރުކުރާ ކަމުގެ ޝަކުވާ އަންނަމުންދާކަމަށާއި، މިސަރުކާރުން ވޭތުވެދިޔަ ތިން އަހަރުދުވަހުގެ ތެރޭގައި ކުރެއްވި މަސައްކަތްކުން އެވިސްނުން މިހާރު ބަދަލުވެފައިވާކަމަށެވެ.
img:http://s2.psmnews.mv/images/660x400/14933042887729.jpg|ޕީޕީއެމްއަށް އަލަށް ގުޅުނު މެމްބަރުންގެ ފޯމް ހާވަލުކުރުމަށް ބޭއްވެވި ރަސްމިއްޔާތުގައި ރައީސުލްޖުމްހޫރިއްޔާ ވާހަކަފުޅުދައްކަވަނީ / ފޮޓޯ: ރައީސް އޮފީސް
ރައްޔިތުންގެ ފުދުންތެރިކަމަށް މިދިޔަ ތިން އަހަރުދުވަހުގެ ތެރޭގައި ކުރިއެރުންތަކެއް ލިބިފައިވާކަމަށާއި، ތަޢުލީމީ ދާއިރާއާއި، ސިއްޙީ ދާއިރާއިން ބޮޑެތި ކާމިޔާބީތަކެއް ލިބިފައިވާކަން ފާހަގަކުރައްވައި ރައީސް ވިދާޅުވީ، ޕްލޭނެއް އޮވެގެން ސަރުކާރުން ކުރާ މަސައްކަތުން ކުރިއެރުންތަކެއް އަންނަކަމަށެވެ.
މިރަސްމިއްޔާތުގައި ވާހަކަފުޅުދައްކަވަމުން ޕީ.ޕީ.އެމްގެ ނައިބުރައީސް އަދި ޓޫރިޒަމް މިނިސްޓަރ މޫސާ ޒަމީރު ވިދާޅުވީ، އެންމެ ވާދަވެރި ޕާޓީއަކީ ޕީ.ޕީ.އެމްކަމަށާއި، ޑިމޮކްރަސީ އެންމެ ހަރުދަނާކުރައްވަން މަސައްކަތް ކުރައްވަނީ ޕީޕީއެމްގެ މުސްތަޝާރު، ރައިސް ޔާމީންކަމަށެވެ. އަދި ޕާޓީގެ އިސްފަރާތްތަކާއި ރާއްޖޭގެ އެކި ސަރަހައްދުތަކުގައި ކުރާ މަސައްކަތްތަކުން ކާމިޔާބީތައް ފެންނަމުންދާކަމަށްވެސް ޒަމީރު ވިދާޅުވިއެވެ.
މިރަސްމިއްޔާތުގައި ވާހަކަދެއްކެވި ޕީ.އެމްގެ މެންބަރުންވަނީ ޒުވާނުންގެ ކުރިއެރުމާއި ރާއްޖެއަށް ކޮންމެހެން ބޭނުންވެފައިވާ ދާއިރާތަކުން ސަރުކާރުން ހޯއްދަވަމުންދާ ކާމިޔާބީތައް ފާހަގަކުރައްވާފައެވެ.