އެކި ދާއިރާތަކުން ފަންނީ މީހުން އުފެއްދުމަށްޓަކައި "ވިމެން އޮން ބޯޑު"ގެ ފަރާތުން ކެޕޭސިޓީ ޑިވެލޮޕްމެންޓް ޓްރެއިނިންގ ސެންޓަރެއް ހުޅުވައިފިއެވެ.
މި ސެންޓަރު އިފްތިތާޙްކޮށްފައިވަނީ، ޗަންޕާ ސެންޓްރަލް ހޮޓެލްގައި މިއަދު ބޭއްވި ޚާއްޞަ ރަސްމިއްޔާތެއްގައެވެ. ވިމެން އޮންބޯޑު (ވޮބް)ގެ ކެޕޭސިޓީ ޑިވެލޮޕްމަންޓް ޓްރެއިނިންގ ސެންޓަރ ހުޅުވައިދެއްވީ، ޕެންޝަން އެޑްމިނިސްޓްރޭޝަން އޮފީހުގެ ސީއޯއޯ މުޙައްމަދު ހުސައިން މަނިކެވެ.
މި ރަސްމިއްޔާތުގައި މުޙައްމަދު ހުސައިން މަނިކު ދެއްކެވި ވާހަކަފުޅުގައި މުޖުތަމަޢުގައި އަންހެނުން ބާރުވެރިކުރުވުމަށް ވޮބްގެ ފަރާތުން ކުރައްވަމުން ގެންދަވާ މަސައްކަތްތައް ފާހަގަކުރެއްވިއެވެ.
" އަންހެނުންނަކީ މުޖުތަމަޢުގެ ދެބައިކުޅަ އެއްބައި. އަންހެނުންގެ ޙިއްސާއާ ނުލައި ޤައުމެއް ތަރައްޤީއެއް ނުކުރެވޭނެ. މިފަދަ ޚިދުމަތްތައް ކުރުމަށް އަންހެނުންނަށް ލިބޭ ފުރުޞަތުތަކުގެ ބޭނުން ހިފަންޖެހޭ. ބައެއް ފަހަރު މުޖުތަމަޢުގެ ކަންކަން ހުންނަ ގޮތުން އަންހެނުންނަށް ދަތިތަކާއި ކުރިމަތިވެދާނެ. ނަމަވެސް ހިތްވަރާއެކު އެކަންކަމާއި ކުރިމަތިލާންޖެހޭ." މުޙައްމަދު ހުސައިން މަނިކް ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން ވޮބްގެ ޗެއަރޕާރސަން ފާޠިމަތު ޝަފީޤާ ވިދާޅުވީ، އެ ޓްރެއިންގ ސެންޓަރ މެދުވެރިކޮށް ތަފާތު މަސައްކަތު ބައްދަލުވުންތަކާއި ސެމިނަރތައް ބާއްވާނެ ކަމަށެވެ. އަދި މިއީ ވޮބްއިން ކުރަމުންދާ މަސައްކަތްތަކަށް ލިބުނު އިތުރު ބާރެއްކަމަށްވެސް ޝަފީޤާ ވިދާޅުވިއެވެ.
" އަޅުގަނޑުމެން ކުރިއަށްގެންދާ ޕްރޮގްރާމްތަކުގެ ތެރޭގައި އަންހެނުންނާއި ފިރިހެނުންގެ ކުރިއެރުމަށްވެސް މަސައްކަތްކުރުމާއި، ކެޕޭސިޓީ ޑިވެލޮޕްކުރުމަށް ކުރެވެން ހުރި ހުރިހާ ކަމެއް މި ސެންޓަރުން ކުރިއަށް ގެންދިއުން ހިމެނޭ. މި މަސައްކަތް ކުރިއަށް ގެންދިއުމަށް ވަރަށް ތަޖުރިބާކާރު ޓީމެއް އަޅުގަނޑުމެންނާއެކު އެބައޮތް." މުޙައްމަދު ހުސައިން މަނިކް ވިދާޅުވިއެވެ.
މި ސެންޓަރު އިފްތިތާޙް ކުރުމަށްފަހު، އެ ސެންޓަރުގެ ފަރާތުން ބާއްވާ ފުރަތަމަ ސެމިނަރވަނީ ބާއްވާފައެވެ. ކޯޕަރޭޓް ގަވަރނޭންސްއާ ގުޅޭގޮތުން ކުރިއަށްގެންދާ މި ސެމިނަރ އަމާޒުކޮށްފައިވަނީ، ޑިރެކްޓަރުންގެ ބޯޑުތަކަށް ކުރިމަތިލާފައިވާ ބޭފުޅުންނަށެވެ.
މިސެމިނަރގައި ޑިރެކްޓަރުންގެ ބޯޑުގައި ތިއްބަވާ ބޭފުޅުންގެ މަސްޢޫލިއްޔަތާއި ޒިންމާތައް ފަދަ މަޢުލޫމާތު ދިނުމަށް ހަމަޖެހިފައިވާ ކަމަށް ވޮބްއިން ބުނެއެވެ. ވިމެން އޮން ބޯޑް، (ވޮބް)އަކީ، އަންހެނުންގެ ޙައްޤުޤައި މަސައްކަތް ކުރުމަށް 2015 ވަނަ އަހަރު އުފެއްދި ޖަމްޢިއްޔާއެކެވެ.