އަޑުއިވުމުން މަޙްރޫމްވެފައިވާ މީހުންނަށް އިހުމާލުވެ، އަނިޔާކުރުމުގެ މައްސަލަތައް މަދުކުރުމުގެ މަޤްސަދުގައި، ޖެންޑަރ މިނިސްޓްރީއިން 75 މީހަކަށް ސައިން ލެންގްއޭޖާ ގުޅޭ ތަމްރީން ދެއްވައިފިއެވެ.
ބޭސިކް ސައިން ލޭންގުއޭޖް ކޯހުގެ ނަމުގައި ކުރިއަށްގެންދިޔަ މި ތަމްރީން ޕްރޮގްރާމް އަމާޒުކުރައްވާފައިވަނީ ކަމާގުޅޭ ތަންފީޒީ އިދާރާތަކާއި، ސަރުކާރުގެ ކުންފުނިތަކަށެވެ. މި ތަމްރީންގެ ސަބަބުން، އެފަދަ ފަރާތްތަކާ މުޢާމަލާތް ކުރުމުގައި ފަސޭހެވެ، ދިމާވާ މައްސަލަތައް ފަސޭހައިން ޙައްލުވެ، ޚިދުމަތް ދިނުމުގައި ފަސޭހަވާނެކަމަށް ޖެންޑަރ މިނިސްޓްރީން ވިދާޅުވެއެވެ. އެމިނިސްޓްރީގެ މުވައްޒަފުންގެ ތެރެއިން އެކަނިވެސް 54 މީހަކު ވަނީ މި ތަމްރީން ފުރިހަމަކޮށްފައެވެ. މީގެއިތުރުން ފުލުހުންގެ 20 އިންވެސްޓިގޭޝަން އޮފިސަރަކުވެސް ކޯސް ފުރިހަމަކުރިއެވެ.
މި ތަމްރީނު ފުރިހަމަކުރި މީހުންނަށް ސެޓްފިކެޓް ދިނުމަށް ބޭއްވި ރަސްމިއްޔާތުގައި މިނިސްޓަރ އޮފް ޖެންޑަރ އެންޑް ފެމިލީ ޒެނީޝާ ޝަހީދު ޒަކީ ވަނީ، ރާއްޖޭގައި ނުކުޅެދުންތެރިކަން ހުންނަ މީހުންނާ ގުޅޭ މައްސަލަތަކާ ބެހޭގޮތުން ވާހަކަފުޅުދައްކަވާފައެވެ. ނުކުޅެދުންތެރިކަން ހުންނަ މީހުންނަށް އަނިޔާކޮށް، އިހުމާލުވުމާގުޅޭ އެތައް މައްސަލައެއް ކޮންމެ މަހަކުވެސް އެ މިނިސްޓްރީއަށް ހުށަހެޅޭކަމަށާ، ފާއިތުވި ތިން މަހުގެ ތެރޭގައި 40 އަށްވުރެ ގިނަ މައްސަލަ ހުށައެޅިފައިވާކަމަށް ޖެންޑަރ މިނިސްޓަރ ވިދާޅުވިއެވެ.
ސައިންލޭންގުއޭޖް ކޯހުގެ ސަބަބުން މުވައްޒަފުންގެ ފަންނީ ޤާބިލްކަން އިތުރުވެ، މައްސަލަތައް ތަޙްޤީޤް ކުރުމުގައި ކުރިއެރުންތަކެއް ލިބުމަކީ އަމާޒެއް ކަމަށް ޒެނީޝާ ވިދާޅުވިއެވެ.
"މިފަދަ ކޯހެއްގެ ސަބަބުން، ނުކުޅެދުންތެރިކަން ހުންނަ މީހުންނަށް ދޭންޖެހޭ އަޅާލުމާއި ރައްކާތެރިކަން ކަށަވަރުކޮށްދެވޭ. އަދި މިދާއިރާއިން ކުރާ މަސައްކަތްތައް އިތުރަށް ހަރުދަނާވެގެންދާނެ ކަމަށް އަޅުގަނޑު އުންމީދުކުރަން." ޒެނީޝާ ވިދާޅުވިއެވެ.
ޖެންޑަރ މިނިސްޓްރީން ކުރިއަށްގެންދެވި ސައިންލޭންގުއޭޖް ކޯހަކީ ޔުނިސެފްގެ އެހީތެރިކަމާއެކު ކުރިއަށްގެންދިޔަ ކޯހެކެވެ.